Atong mga Panimalay, Atong mga Pamilya
Wala sa Tuno apan Makapadasig
Ang akong amahan mokanta og usa ka linya sa musika nga iya-iya lang—dili tenor, dili bass, medyo anaa diha ug mosobra pa nianang duha. Bisan tuod dili siya makaila sa middle C gikan sa A flat, si Papa mokanta og kusog kaayo.
Wala ko makahinumdom nga naulawan ko sa kinantahan sa akong amahan, apan ako makahinumdom nga nalingaw ug naglibug sa iyang malipayong kasaba. Wala ba siya makahibalo nga ang ubang mga tawo naminaw?
Ang akong papa ganahan kaayo sa mga himno sa ebanghelyo, ug wala niya tuguti nga ang kakulangan sa talento mobabag sa pagsimba pinaagi sa musika. Siya mikanta uban sa hingpit nga kalipay, kadasig, ug emosyon. Ganahan kaayo ako sa paagi nga siya mokanta og himno sama sa “Ang Espiritu sa Dios” uban sa kalagsik ug kombiksyon ug sa pipila ka minuto nga molabay mokanta og himno sa sakrament uban sa kalumo ug may balaang pagtahud.
Usa ka hapon ang akong amahan mitudlo kanako og usa ka makapatandog kaayo nga leksyon pinaagi sa himno. Mipatugtog ko sa piano sama sa kanunay nakong himoon aron sa pagpahulay gikan sa eskwela atol sa high school. Ang akong papa, nga kanunay mangita og mubong higayon nga kami lang, miabut ug miapil kanako. Kini usa ka naandan nga buluhaton nga pamilyar ko: siya mopakli sa mga pahina sa songbook, mangita og kanta, ug dayon iya kong patugtugon samtang siya mokanta.
Niining piho nga adlaw, si Papa mikuha og hymnbook ug mipakli ngadto sa usa ka himno.
“Kini usa ka talagsaon nga kanta. Usa sa akong mga paborito,” siya miingon, nagbutang sa libro diha sa piano. Kadto mao ang “A Poor Wayfaring Man of Grief.” Si Papa misulti kanako nga kadto mao ang paborito nga himno ni Propeta Joseph Smith ug si Joseph mihangyo kang John Taylor sa pagkanta niini sa Carthage sa hapit na gipangpatay sila si Joseph ug Hyrum.
Dayon gikanta ni Papa ang tanang pito ka mga bersikulo samtang giduyugan nako siya. Nianang higayuna, duha ka talagsaong mga butang ang nahitabo. Ang una mao nga ang akong amahan miawit sa tibuok kanta nga naigo gyud ang mga nota. Ang iyang mga A flat sa tinuoray mga A flat! Ang tingog ni papa natural ug yano, ug alang kanako nindot kaayo kining paminawon. Ang ikaduhang talagsaon nga butang dili kaayo makatingala apan mas importante. Samtang siya mikanta, ako nasayud nga siya nahigugma ni Joseph Smith ug adunay pagpamatuod sa iyang propetikanhon nga tawag. Ang Espiritu mipamatuod kanako nga si Joseph Smith usa ka propeta.
Ang akong amahan namatay paglabay sa pipila ka tuig, ug ako kanunay maghunahuna niana nga adlaw ug ang epekto niini ngari kanako. Usa ka importante nga bahin sa akong pagpamatuod sa ebanghelyo nalig-on tungod sa usa ka amahan kinsa “dili maayong mokanta” mipili nga mokanta uban sa iyang tibuok kasingkasing.
Paghulagway pinaagi ni Diane Hayden