Ang Yawe sa Oportunidad
Pagsaulog sa 10 ka Tuig sa Makanunayong Pundo sa Edukasyon
Usa ka dekada human si Presidente Gordon B. Hinckley mipahibalo sa Makanunayong Pundo sa Edukasyon, ang programa ug mga partisipante milambo.
Niadtong 1850, tulo lang ka tuig human sa pag-abut sa Walog sa Salt Lake, si Presidente Brigham Young (1801–77) misugod sa pag-establisar og mga akademiya ug mga unibersidad aron sa pag-edukar sa mga Santos sa Ulahing mga Adlaw. Ang matag propeta niining dispensasyon miawhag sa edukasyon sa mga miyembro sa Simbahan.
Usa kanila mao si Presidente Gordon B. Hinckley (1910–2008), kinsa mipaila sa Makanunayong Pundo sa Edukasyon (MPE), gisunod gikan sa usa sa mga ika-19 nga siglo nga mga programa ni Brigham Young, ang Perpetual Emigration Fund. Kining bag-o nga pundo sa edukasyon mahimong, diha sa mga pulong ni Presidente Thomas S. Monson, usa sa mga timailhan sa pagdumala panahon ni Presidente Hinckley.1 Si Presidente Hinckley nakakita sa kakabus ug kakulang sa edukasyon ug pagbansay nga nakapugong sa daghang mga young adult sa Simbahan sa pagkab-ot sa ilang potensyal. Siya nangamuyo sa Ginoo alang sa mga tubag.
Sa kinatibuk-ang komperensya niadtong Marso 31, 2001, si Presidente Hinckley mipahibalo sa iyang panan-awon niini nga programa. Siya miangkon nga kini usa ka “agresibo nga programa” apan mituo nga ang “edukasyon mao ang yawe sa oportunidad.”2 Si Presidente Hinckley midapit niadtong tanan kinsa ganahan nga motampo sa pagbuhat niini, ug ang programa gisugdan.
Karon, 10 ka tuig ang milabay, ang mga kontribusyon dako ug gamay gikan sa mga tighatag sa tibuok kalibutan nakapahimo sa programa—ug sa mga partisipante—nga molambo. Si Elder John K. Carmack, emeritus nga sakop sa Seventy ug Executive Director sa MPE, miingon nga kini “nagluwas sa mga Santos gikan sa tunglo sa kakabus.” Kini nagmalampuson niana nga pagluwas, miingon si Rex Allen, usa ka bolunter direktor sa pagbansay ug komunikasyon alang sa MPE, tungod kay kini naestablisar sa mga mahangturong mga baruganan ug adunay mga propetikanhon nga saad nga “adunay epekto nga bisan si kinsa kanato dili gayud makasabut.”
Usa ka Agresibo nga Programa
Sama sa gipasabut ni Presidente Hinckley niadtong 2001, ang pundo namugna gikan sa mga donasyon nga kwarta; ang interes nga gikan niadtong nga pundo mao ang gipa-loan ngadto sa potensyal nga mga estudyante.
Ang mga young adult nga interesado sa pag-apil makaduol sa lokal nga mga lider sa priesthood ug sa mga director sa institute. Uban sa ilang rekomendasyon, kining “ambisyoso nga mga batan-ong lalaki ug babaye,” kadaghanan nila mga returned missionary, nakadawat og mga loan aron makaeskwela sa ilang kaugalingong mga komunidad.3 Samtang nag-eskwela pa, sila mosugod sa pagbayad sa loan, makapahimo sa ubang mga estudyante sa paggamit usab sa pundo.
Sa dekada sukad nga kini nasugdan, ang programa nakapalambo sa mga kinabuhi sa mga 50,000 ka mga partisipante sa sobra sa 51 ka mga nasud, nagtabang kanila sa “paghaw-as sa kakabus nga nahibaloan nila ug sa ilang mga katigulangan,” sama sa giingon ni Presidente Hinckley nga kini mahitabo.4
Si Brother Allen naghulagway sa MPE sa ingon niining paagi: “Ang propeta mihimo og usa ka talagsaon nga butang niadtong adlawa. Sa karaang panahon, si Moises miisa sa iyang sungkod ibabaw sa Pulang Dagat ug ang tubig nabahin. Si Presidente Hinckley misunod niining susama nga hugot nga pagtuo sa dihang sa simbolikanhong paagi mihupot sa iyang propetakanhong kupo ibabaw sa itom nga dagat sa kakabus ug mipasiugda sa MPE.”
Mga Baruganan
Ang Makanunayong Pundo sa Edukasyon natukod diha sa pundasyon sa mga baruganan sa ebanghelyo—hugot nga pagtuo ug paglaum kang Jesukristo, edukasyon, buhat, sakripisyo, pagpaningkamot sa kaugalingon, integridad, ug serbisyo. Ang mga partisipante ug migradwar sa MPE sa tibuok kalibutan misunod niini nga mga baruganan sa ilang mga kinabuhi.
Si Carolina Tello Vargas, migradwar sa Colombia, miingon nga ang MPE usa ka “silaw sa paglaum” ug ebidensya sa tabang sa Langitnong Amahan, kinsa “naggiya [kaniya] ug nagbukas sa agianan padulong sa kalamboan.”
Siya nakasabut sa kaimportante sa edukasyon ug sa buhat ug sakripisyo nga gikinahanglan niini. Sa wala pa siya mo-loan sa MPE, si Carolina daghan og gitrabahoan ug gipamaligya ang tanan niyang mga alahas aron siya makaeskwela og abogasiya. Ang iyang pamilya misakripisyo usab.
“Ako nasayud nga aron makaeskwela kinahanglan ko nga magsakripisyo,” mipasabut si Carolina. “Andam ko sa pagbuhat niini aron sa umaabut ako adunay mas maayong mga oportunidad sa trabaho.”
Apan adunay mitumaw nga mga hagit sa pamilya sa katapusang tuig sa iyang pag-eskwela, ug siya dili makabayad sa tuition. Siya nakadawat sa loan sa MPE ug gigamit kini aron malampuson nga makatapos sa iyang kurso.
Si Shirley Mwelase sa South Africa nagpakita usab niining mga baruganan. Iyang gigamit ang loan sa MPE sa pagtapos sa iyang kurso sa computer programming ug, sa nakatrabaho na sa usa ka kompanya sa insurance, gihutdan og bayad ang iyang loan, nakatabang kaniya nga mobati nga “masaligan ug kasaligan.”
Si Shirley mipasabut, “Ang trabaho nga mas maayo og sweldo nagpasabut og mas maayong kalidad sa kinabuhi. Kini nagpasabut nga matabangan nako ang akong mga ginikanan ug pamilya, ug ang mga kahanas ug kalamboan [refinement] nga akong naangkon gikan sa pagtrabaho nakatabang kanako og maayo nga mas makaserbisyo sa tanan nakong mga calling sa Simbahan.”
Nagtrabaho isip usa ka programmer, daghan na siya og nahimo. Siya miingon, “Mibati ko nga kon dili pa tungod sa akong pag-eskwela ug sa kanunayng pagtambong sa simbahan, dili ko maangkon kini nga trabaho, ni makakab-ot ko niining mga maayo nga butang.”
Mga Saad ug mga Panalangin
Sa dihang si Presidente Hinckley mipahibalo sa Makanunayong Pundo sa Edukasyon, siya misaad nga kini makahatag og mga panalangin sa mga indibidwal, sa ilang mga pamilya ug komunidad ug sa tibuok Simbahan pinaagi sa mga oportunidad sa pagpanarbaho, serbisyo, ug pagpangulo.
Si Presidente Hinckley misaad nga ang mga partisipante “makaangkon og maayong edukasyon nga makapahaw-as kanila sa kalapukan sa kawad-on. … Sila magminyo ug mopadayon sa unahan uban sa kahanas nga makapasarang kanila nga makakita og maayong sweldo ug maanaa sa ilang dapit sa komunidad diin sila makahimo og dako nga kontribusyon.”5
Kini nga saad natuman alang sa liboan ka mga partisipante sa MPE, lakip na ni Pablo Benitez sa Uruguay. Si Pablo nagtrabaho og 12 ka oras matag adlaw sa usa ka tindahan sa grocery, nagdaginot pag-ayo aron lang mabuhi, sa dihang siya midesisyon nga usbon ang iyang kinabuhi. Siya misugod sa pag-eskwela, apan samtang nagkamahal ang tuition ug mga bayrunon, iyang nakita nga dili siya makabayad sa iyang edukasyon nga siya lang.
Pinaagi sa MPE siya nakatapos sa kurso nga physical education. Isip resulta, siya nakadawat og daghang mga trabaho sa mga katuigan, ang matag usa nakapasaka sa iyang sweldo. Siya gani mi-report, “Kanunay kong makadawat og mga tanyag sa full-time nga trabaho o pag-substitute alang sa uban nga dili na nako madawat tungod kay dili na paigo sa akong panahon. Ug salamat kaayo sa MPE ug sa mga oportunidad nga miabut kanako tungod sa akong pag-eskwela.”
Tungod sa mga oportunidad nga naangkon pinaagi sa edukasyon, si Pablo makasuporta sa iyang pamilya samtang nagserbisyo ug nagtukod sa iyang komunidad isip usa ka magtutudlo.
Ang pagtrabaho og taas nga oras nga paigo lang ikabayad sa mga galastuhan ug ikapulo makapalisud sa pagserbisyo sa Simbahan, miingon si Brother Allen. Kini usa ka panlimbasug alang sa daghang mga miyembro sa tibuok kalibutan, apan si Presidente Hinckley misaad niini ngadto sa mga partisipante sa MPE: “Sila mahimong mga lider niining talagsaong buhat sa ilang lumad nga mga kayutaan. Sila mobayad sa ilang mga ikapulo ug mga halad, nga makapahimong posible sa pagpalapad sa buhat sa Simbahan sa tibuok kalibutan.”6
Daghang mga partisipante ang nakakaplag nga ang edukasyon nga naangkon pinaagi sa MPE mosangput sa mas maayo nga mga trabaho nga makahatag kanila og mas daghang panahon sa pagserbisyo sa Simbahan. Si Miriam Erquiza, usa ka returned missionary gikan sa Pilipinas, nakahuman og duha ka tuig sa web design program ug, pinaagi sa “hingpit nga pagtuo sa pag-ampo,” nakatrabaho sa usa ka travel agency. Kini nga posisyon nakapahimo kaniya sa pagsuporta sa iyang pamilya ug naghatag og panahon sa pagserbisyo isip presidente sa Young Women ug isip usa ka magtutudlo sa institute.
Si Vanderlei Lira sa Brazil miserbisyo og unom ka tuig isip presidente sa branch, nagtabang sa iyang branch nga molambo gikan sa 18 ngadto sa 110 ka aktibo nga mga miyembro, samtang nagtrabaho isip usa ka trabahador tungod sa iyang kakulang og edukasyon. Sa dihang ang MPE gipahibalo, siya nakaeskwela og occupational safety ug nakakita og bag-ong trabaho, nga nakatabang kaniya nga moumento ang iyang sweldo ug daling nakaimpas sa iyang loan. Nagpadayon siya sa pagserbisyo sa Simbahan karon. Ang iyang presidente sa stake mihulagway kaniya isip usa ka talagsaon nga lider ug amahan, “usa ka tawo nga nakalingkawas tungod sa oportunidad.”
Si Presidente Hinckley miingon sa mga miyembro sa Simbahan nga ang programa molambo tungod kay ang Simbahan adunay “organisasyon … ug mapahinungoron nga mga sulugoon sa Ginoo” nga mahinungdanon alang sa kalampusan.7 Tinuod, ang Makanunayong Pundo sa Edukasyon nagmalampuson tungod kay kini naglakip sa kooperasyon sa mga partisipante ug sa lokal nga mga lider sa priesthood ubos sa direksyon sa Unang Kapangulohan, Korum sa Napulog Duha ka mga Apostoles, ug sa ubang kinatibuk-ang mga lider sa Simbahan. Ang mga employment resource center ug ang seminaries and institutes sa Simbahan hingpit usab nga nalakip niini nga buhat.
Ang epekto sa pundo kay makanunayon dili lamang sa pinansyal nga paagi, samtang ang kwarta bayaran ug dayon ipa-loan ngadto sa ubang mga estudyante, ingon man usab sa espirituhanon ug sosyal nga paagi samtang ang mga partisipante, tighatag, tigdumala, ug sa uban pang dili direkta nga napanalanginan. “Ang edukasyon mao ang yawe,” miingon si Brother Allen, “sa pag-abli sa pultahan sa usa ka gahi nga bong-bong, dili lamang para sa mga indibidwal apan alang usab sa ilang mga pamilya ug komunidad.”
Sa milabay nga 10 ka tuig, ang teknolohiya ug kasinatian nakatabang sa paghashas sa proseso alang sa mga partisipante ug mga facilitator, apan ang Makanunayon nga Pundo sa Edukasyon nagpadayon sa pagtuman sa propetikanhon nga panan-awon nga giestablisar alang niini. Kining “mapangahason nga programa” magpabilin nga usa ka propetikanhon nga paningkamot. Si Presidente Monson nagpadayon sa pagtrabaho alang sa pundo, diin, siya nag-ingon, “molungtad og dugay sa umaabut.”8
Sa dekada sukad sa pagsugod niini, ang Makanunayong Pundo sa Edukasyon nakapalambo sa kinabuhi sa mga 50,000 ka partisipante sa 51 ka mga nasud, sama ni Kevin Moore sa West Indies ug mga partisipante sa Peru (sa wala).
Si Miriam Erquiza, usa ka returned missionary gikan sa Pilipinas, nadawat sa usa ka travel agency; ang oras sa trabaho mitugot kaniya sa pagserbisyo isip presidente sa Young Women ug institute teacher.
Si Vanderlei Lira sa Brazil miserbisyo isip presidente sa branch sulod sa unom ka tuig samtang nagtrabaho isip trabahador. Human makapadayon sa iyang edukasyon salamat sa loan MPE, siya nakakaplag og bag-ong trabaho nga may umento sa sweldo. Ang iyang presidente sa stake mihulagway kaniya isip “usa ka tawo nga nakalingkawas tungod sa oportunidad.”
Mga litrato pinaagi ni Brian Wilcox; mga icon pinaagi ni Brent Croxton