Usa ka Sigurado nga Saksi
Tungod kay gipadako ako sa usa ka aktibong pamilya nga Santos sa Ulahing mga Adlaw, sa akong pagtuo nagtubo ako nga adunay pagpamatuod. Sa tinuoray wala gayud ako magduhaduha sa katinuod sa ebanghelyo. Sama sa daghang mga tin-edyer, panagsa makapangutana ako sa akong hunahuna, apan wala gayud ako mobati nga ang Simbahan dili tinuod.
Mao kini ang hugot nga pagtuo nga nagdasig kanako sa pagserbisyo og misyon. Nahibalo ako nga kinahanglan akong moserbisyo. Apan bisan og wala akoy seryusong mga pagduda mahitungod sa Simbahan, akong naamgohan nga kinahanglan akong makabaton og pagpamatuod sa akong kaugalingon.
Nagsugod ako sa akong misyon niadtong Pebrero 1961, mibiya sa tingtugnaw sa Salt Lake City alang sa kainit sa ting-init sa Argentine. Walay pagbansay sa pinulongan alang sa mga misyonaryo nianang panahona, apan ang akong presidente sa misyon misaad kanamo nga makapamulong kami og tarung nga Spanish human mabasa og kusog ang Basahon ni Mormon. Nakakat-on ako og Spanish isip usa ka bata ug hanas namulong sulod sa unang pipila ka semana, apan sa gihapon akong gisunod ang mga instruksyon sa akong presidente sa misyon.
Sa unang lungsod diin ako gi-assign, ako ug ang akong kompanyon nagpuyo sa balay nga luyo sa usa ka karaang tindahan. Dili kami maka-proselyte inig ka hapon panahon sa Argentine nga pagpahulay, mao nga sagad nakong gamiton kana nga panahon sa pag-ampo ug pagbasa sa Basahon ni Mormon sa atubangan nga pultahan sa karaang tindahan.
Usa ka adlaw, liboan ka milya gikan sa akong panimalay sa atubangan niana nga tindahan, mihunong ako aron sa paghunahuna mahitungod sa unsay akong gibasa. Kon kamo mag-ampo ug mamalandong mahitungod sa Basahon ni Mormon, ang Espiritu makaimpluwensya kaninyo. Akong gipamalandungan unsa ang gitudlo sa Basahon ni Mormon, naghunahuna ako mahitungod kang Joseph Smith nga naghubad sa mga palid, ug adunay kalit nga mga pagbati nga miabut kanako. Nianang higayona nahibalo ako nga tanan nga natudlo kanako sa tibuok nakong kinabuhi matuod. Sa kalit nahimong tin-aw kaayo ngari kanako nga si Joseph Smith usa ka propeta ug ako nagbasa sa mga pulong sa Dios. Tanan kadto tinuod.
Kadto nga kalit nga pagbati nakapadasig. Mabati kini sa tibuok nakong lawas gikan sa ulo ngadto sa tumoy sa akong mga tiil. Dili kadto pagpanugnaw, ug dili kadto pagpanginit. Apan usa kadto ka sigurado nga saksi.
Wala gayud ako makalimot niana nga adlaw, ug ako mibati sa Espiritu Santo sa daghang higayon sukad. Tungod niadto nga kasinatan, makamatikod ako sa Espiritu Santo kon Siya magpamatuod ngari kanako. Kana nga pagbati dili kanunay nga pareho ra gayud, apan kanunay kini nga init ug sigurado.
Bisan og ang Espiritu personal nga makigsulti kanato, ang saad ni Moroni alang gayud sa tanan (tan-awa sa Moroni 10:3–5). Ang saad ni Moroni sa Basahon ni Mormon mao nga ang Espiritu mopamatuod kaninyo sa kamatuoran sa Basahon ni Mormon kon kamo mobasa, magtuon, mamalandong, ug dayon mag-ampo uban sa tinuoray nga katuyoan. Kana nga saad magamit diri kanako, kaninyo, ug sa tanan dinhi sa kalibutan. Ang sigurado nga saksi moabut ngadto sa mangita niini.
Paghulagway pinaagi ni Keith Larson