Kinahanglan nga Mag-usab Sila
Sa dihang gibunyagan ako, ang akong pamilya misalikway sa Simbahan. Karon, kinahanglan nga akong mahibaloan unsay akong buhaton kon ang ilang estilo sa kinabuhi magasukwahi sa mga baruganan sa ebanghelyo.
Sa dihang gibunyagan ko, ako lamang ang sakop sa pamilya nga midawat sa ebanghelyo. 19 ang akong edad, ug nalipay ako mahitungod sa akong bunyag. Gi-welcome ako sa mga kaigsoonan sa Panuco First Branch sa Veracruz, Mexico. Agi og dugang, akong gisugdan ang pagpangandam alang sa pagserbisyo og full-time nga misyon diha dayon sa akong pagkamiyembro sa Simbahan sulod sa usa ka tuig. Talagsaon kaayo nga mahibalo sa tinuod nga Simbahan, ug gusto kong mopaambit sa ebanghelyo ngadto sa uban.
Ang akong amahan, akong ina-ina (ang akong mama namatay sa nag-edad ako og 12), ug ang akong tulo ka igsoong lalaki misalikway sa Simbahan dihang ako gibunyagan. Malas lang kay, dili maayo ang akong pagbalos niini. Dili maayo ang akong pagtahud kanila. Wala nako hunahunaa ang akong amahan o ang iyang mga opinyon. Sa dihang siya akong giingnan nga hapit na ko moadto og misyon, wala siya malipay tungod kay mohunong man ko og trabaho ug ilabi na tungod kay moadto ko og layo. Mahasol ako sa matag higayon nga ang estilo sa kinabuhi sa akong pamilya mosukwahi sa akong mga baruganan, sama sa ilang pagtan-aw og TV o maminaw og mga programa sa musika nga akong gibati nga dili haum sa adlaw nga Dominggo o kon imbitahon ako sa akong amahan og paniudto sa tingpuasa nga Dominggo.
Akong hatagan og katarungan ang negatibo nakong kinaiya ngadto sa akong pamilya pinaagi sa pag-ingon sa akong kaugalingon nga wala man koy gihimong sayop—isip miyembro sa Simbahan, kinahanglan nga akong sundon ang mga baruganan sa ebanghelyo bisan kon ang mga sakop sa akong pamilya maghasol kanako. Giingnan nako ang akong kaugalingon nga sila ang kinahanglan nga mag-usab. Tungod niini nga pangatarungan, ang akong relasyon sa akong amahan dili maayo. Misamot pa gayud tungod sa akong batasan ug garbo. Nagpadayon ako niini nga paagi—wala maghunahuna sa espirituhanon niyang kaayohan.
Usa ka adlaw samtang nagtuon ko alang sa akong klase sa institute, naabut ako sa 1 Nephi 16, diin naguba ni Nephi ang iyang puthaw nga pana, nga lisud na ang pagkuha og pagkaon. Ang tanan nagsugod sa pagbagulbol—si Laman ug Lemuel, nga maoy ilang naandan, uban sa ilang amahan, ang propeta nga si Lehi. Si Nephi miresponde pinaagi sa paghimo og pana nga kahoy ug nangutana sa iyang amahan kon asa siya moadto sa pagkuha og pagkaon. Ang iyang amahan nag-ampo alang sa giya ug gikasuk-an sa Ginoo sa iyang pagbagulbol. Nausab ngadto sa maayo ang lihok ni Lehi ug gihimo ang iyang tahas isip lider sa pamilya ug isip propeta sa Ginoo. Si Nephi wala mohukom sa iyang amahan sa huyang niya nga kahimtang, wala usab siya maghunahuna nga dili na siya angay nga propeta, bisan dihang si Nephi nakigsulti na sa Ginoo ug nakadawat og mga panan-awon.
Sa dihang akong nabasa ug nasabtan kini nga asoy, diha dayon akong nahunahuna kon unsa ka ngil-ad ang akong kinaiya ngadto sa akong pamilya. Naulaw ako sa akong batasan—sa pagbati nga mas maayo ako kay kanila—ug mibati og hilabihan ka lain tungod sa akong walay pagtahud nga pagtagad sa akong amahan. Naguol ako nga wala himoa nga prayoridad ang pagpaambit sa ebanghelyo ngadto kanila.
Wala nako makita ang angay nga mahitabo sa akong pamilya. Ang ilang mga kahuyang lamang ang akong gitutukan. Sukad nianang adlawa, ang akong batasan ug kinaiya anam-anam nga nausab. Naningkamot ako nga kanunayng morespeto sa mga opinyon sa akong amahan, bisan sa daghang panahon nga dili ako mouyon kaniya. Kon iya akong imbitahon alang sa paniudto samtang nagpuasa ako, miingon ko og pasensya nga dili makadungan kaniya sa pagkaon. Wala na ako mahasol sa mga programa o musika nga ilang gitan-aw o gipaminaw sa adlawng Dominggo, sa paghinumdom nga sila wala pa makahimo og mga pakigsaad sa atong Langitnong Amahan, sama sa akong nahimo.
Usa ka buntag samtang mitabang ako sa akong amahan alang sa pagpangaon, siya akong gisultihan kon unsa ko siya ka mahal ug sa dako nakong pagbasol tungod sa ngil-ad nakong kinaiya. Siya akong giingnan nga mapasigarbuhon ako nga siya akong amahan ug ako gusto nga adunay malinawon nga relasyon uban kaniya.
Ang tanan nagsugod sa pagkausab. Ang panaglalis nagkaminus ug nawala. Bisan naghunahuna ako nga dugay pa gayud una mahimong miyembro ang akong pamilya sa Simbahan, ang ilang kinaiya ngari kanako ug sa Simbahan milambo. Wala untay ingon niini nga mga kausaban ang mahitabo kon wala pa ko mag-una og usab.
Human sa akong pagkamiyembro sa Simbahan sulod sa usa ka tuig, miserbisyo ako isip usa ka full-time nga misyonaryo sa Mexico Tijuana Mission. Tulo ka bulan sa wala pa ko mopauli, nakadawat ako og sulat nag-ingon nga ang akong pamilya midawat sa ebanghelyo ug bunyaganan sila. Dihang mipauli ko, mga miyembro na sila sa Simbahan.
Sa akong 15 ka tuig isip miyembro sa Simbahan, usa sa pinaka-mahinungdanon nakong mga leksyon nakuha gikan sa akong pagtuon sa Basahon ni Mormon uban sa mga anak sa Dios nga suod kaayo kanako: ang akong pamilya.
Paghulagway pinaagi ni Dan Burr