O Loo I Ai o Ia Iina
“O lea na sasaa atu ai o matou agaga i le Atua i le tatalo, ina ia faamalosia e ia i matou” (Alema 58:10).
A o 11 tausaga o se tasi o o ma atalii, sa ala ae ai o ia ma se ulu sa matuai tiga lava. O le taimi muamua sa ou faapea, o loo faifaiaga e alu i le aoga, ae na vave ona ou iloaina sa maualuga lona fiva. Sa ou aveina o ia i le fomai, ma sa lei umi ae matou nanati atu i le falemai. O iina sa iloa ai na maua o ia i le ma’i o le fiva faiai o le maeaalio, ose ma’i matautia.
A o faasolo ina tigaina tele o ia, sa amata ona oso faamai lili. Na fai mai le fomai ou te alu i fafo o le potu. A o ou savali atu i le auala savali, sa ou fefe ma amata ai ona ou tagi. Sa faauouo a’u e se tamaitai ou te le masani ai. Sa ou tatalo leotele ina ia fesoasoani mai le Tama Faalelagi i lo’u atalii ma ia lelei mea uma. Ou te manatua lo’u lagonaina o se filemu maoae.
Sa faia se taotoga o lo’u atalii ma ni vaiaso se tele na taumafai ai ia malosi lelei. O le taimi nei o loo maloloina o ia, ua faaipoipo, ma o se tamā o se fanau teine aulelei e toalua. O lenei aafiaga o se faataitaiga lea ia te au o le mana o le tatalo.
E i ai se pese a le Peraimeri e ta’ua “O Le Tatalo A Le Tamaitiiti.” O loo i ai se fesili, “Le Tama e, o e i ai iina? Pe o lagona mai tatalo uma?” (Tusipese a Tamaiti 6–7).
Ma o le tali moni lava o le: ioe, Na te lagonaina.
Afai e i ai se taimi e te tomanatu ai pe o soifua le Tama Faalelagi, ia ua oo i le taimi e te tootuli ai ma fesili atu, “Le Tama Faalelagi e, pe o E i ai moni iina? Pe na ou i ai ma Lau Afio ae ou te le’i sau i le lalolagi? Pe mafai ona ou toe foi atu e nofo faatasi ma Lau Afio?
O le a Ia tali mai i au tatalo. O le a Ia faailoa atu ia te oe o loo i ai o Ia iina. E le o tuua na o oe. Tatou te manaomia o ia i itula uma, ma o loo i ai o Ia iina mo i tatou.
Ata na tusia e Keith Larson