Tilotilo i Luga
O le luitau mo i tatou uma o le, aua nei tilotilo i autafa e vaai po o faapefea ona matau mai e isi tagata o tatou olaga, ae ia tilotilo i luga e vaai pe o faapefea ona silasila mai le Tama Faalelagi ia i tatou.
I le avea ai ma se alii talavou, sa valaauina au e auauna atu i se misiona i Hamburg, Siamani. I le Misiona e Aoao ai Gagana—o le nofoaga muamua lena ua suia nei i le nofoaga autu e aoaoina ai faifeautalai—sa ou tauivi lava i le aoaoina o le gagana. A o mavae atu le vaiaso muamua sosoo ai ma le vaiaso lona lua, sa ou matauina ai, sa sili atu le vave o le alualu i luma o isi faifeautalai o la’u itu nai lo a’u. A o latou faasolosolo atu i mataupu faavae e faigata atu, sa o se mala paga a’u dies, ders, ma das es.
Sa amata ona ou popole—ma lotovaivai. E mafai faapefea ona ou faia se misiona faamanuiaina pe afai e le mafai ona ou fesootai atu i tagata na tofia a’u e aoao?
Sa ou tatalo mo le fesoasoani ma saili se faamanuiaga faaleperisitua, lea na tuuina mai ai se faamalosiauga. Ae sa faaauau pea ona ou suesue ma tauivi, ma sa i ai se tasi aso sa sili ai lava ona ou le mautonu ma popole nai lo se isi lava aso. A o ma savavali atu ma la’u soa i le auala savali o le faletele, sa ou tu i se kapoti laitiiti a le teufale. Sa ou fai atu i lau soa e faatali laitiiti mai mo a’u. Sa ou mei atu i totonu o lena potu itiiti ma tootuli i luga o se pulumu e solo ai le fola. Sa amata ona ou augani atu i le Tama Faalelagi mo se toomaga.
Na tali mai le Alii i lena tatalo. Sa ou lagonaina le oo mai o le manatu lenei i lo’u mafaufau: “Ou te lei valaauina oe ia e atamai i le gagana Siamani. Sa ou valaauina oe ia e auauna atu ma lou loto atoa, manatu atoa, ma le malosi atoa.”
O le taimi lava lena na ou faapea ai, “E mafai ona ou faia le mea lena. E mafai ona ou auauna atu ma lo’u loto atoa, manatu atoa, ma le malosi atoa. Afai o le mea lena ua valaauina au e le Alii e fai, e mafai ona ou faia le mea lena.” Sa ou tulai ae ma le lagonaina o le matuai toafilemu.
Mai lava i lena taimi, na sui ai la’u fua faatatau. Ou te lei toe faatusatusaina lo’u alualu i luma ma lo’u faamanuiaina i au soa po o isi tagata o la’u itu. Nai lo lena, sa ou taulai atu i le ala na manatu le Alii sa ou taumafai ai. Nai lo le tilotilo i autafa e faatusatusa a’u lava i isi, sa amata ona ou tilotilo i luga, i se faaupuga faapena, ia iloa po o le a Lona finagalo e uiga i au taumafaiga.
Ou te lei iloa pe na ou aoaoina le gagana i se televave atu pe lelei atu foi mai lena taimi, ae ou te le’i toe lagonaina le popole lea sa ou lagonaina muamua. Sa ou iloa le mea na finagalo le Alii ou te faia, ma sa gafatia ona ou faia.
Sa amata ona ou tatalo i le Tama Faalelagi i le taeao, ma ta’u atu ia te Ia ou te le iloa aluga o le aso ae o le a ou faia le mea sili ou te mafaia. “O le a lava le mea e mafai ona ou aoaoina, faataga mai a’u ou te aoaoina,” sa ou tatalo, “ae po o le a lava, o le a ou tuuina atu i Lau Afio le mea sili ou te mafaia i lenei aso.”
A oo i le po ou te toe tatalo foi ma lipoti atu i mea na ou suesueina ma mea na ou faia. Sa ou faasoa atu i lo’u Tama Faalelagi ou tauiviga faapea foi ma mea na ou manuia ai. Na amata ona ou liliu atu ia te Ia—ae le o isi po o au lava foi—e faamaonia ai lo’u alualu i luma.
O lena lesona sa ou aoaoina i totonu o se kapoti itiiti e teu ai pulumu i le silia ma le 35 tausaga ua mavae, na tumau lava ia te au i lo’u olaga atoa, i le taimi atoa i nisi o valaauga ma tofiga. Soo se taimi lava na talosagaina ai au e fai se mea lea e foliga mai e sili atu faamoemoega nai lo lo’u agavaa e fai ai, ou te manatua lava lena aafiaga ma ou fai ifo ia te a’u lava, “Faatali. O ai na valaauina oe? O ai o loo e tautuaina? O ai o loo e taumafai e faamalie?”
O le lalolagi o loo tatou ola ai ua i ai ituaiga uma o fuafaatatau—o le tele lava e i fafo atu o i tatou. Ou te manatu o na ituaiga fuafaatatau e mafai ona sili ona ogaoga i le autalavou. E te alu i le aoga ma maua se togi, ae o lena mea e tele ina le taua ai isi mea e te oo i ai i isi au vasega po o lou aiga po o tulaga o lou olaga. O nisi taimi e faamasinoina ai i tatou i o tatou foliga vaaia pe e ala i le taavale tatou te feoai ai. Tatou te ono faavaeina o tatou lagona o le taua o le tagata lava ia i le pe toafia uo o loo tusitusi i a tatou itulau i saite o fegalegaleaiga i upegafesootai. Tatou te popole i manatu o isi e uiga i le tagata o loo tatou tafafao faamasani po o a manatu o tagata pe a tatou faaipoipo ae lei uma a tatou aoga. E faigofie lava ona tatou paulia i le taumafai e faamalie isi, ae e le mafai ona tatou faatuatuaina na ituaiga fuafaatatau mai fafo atu; e mafai ona televave tele le lalolagi e viia pe faitioina i tatou.
Ou te manatu o le luitau mo i tatou uma lava—ae atonu e faapitoa lava mo le autalavou matutua—o le taumafai e aua le tilotilo i autafa e vaai po o faapefea ona matau mai o tatou olaga e isi tagata ae ia tilotilo i luga e vaai pe o faapefea ona matau mai i tatou e le Tama Faalelagi. E le silasila o Ia i foliga i fafo ae o totonu o le loto (tagai i le 1 Samuelu 16:7). Ma ua Ia silafia, e sili atu nai lo se isi lava tagata, mea o loo manaomia e i tatou taitoatasi.
E faapefea la ona tatou “tilotilo i luga”? O nisi nei o mataupu faavae e mafai ona fesoasoani atu.
Ia Maua le Malosi Faaleagaga
E mafai ona tatou maua le malosi faaleagaga tatou te manaomia i le faia o filifiliga e ala i le amataina o aso taitasi i se tatalo faaletagata lava ia ma le suesue i tusitusiga paia. O lena tatalo e mafai ona aofia ai se talosaga ina ia mataala i le fuafuaga a le Atua mo i tatou. E ui atonu tatou te le iloa le fuafuaga atoa, ae e mafai ona tatou ole atu ia tatou mataala i le vaega o le fuafuaga o le a oo mai i lena aso. A tatou mataala, o le a tatou vaaia fua o a tatou filifiliga e mulimuli ia te Ia. O le a mafai ona tatou galulue i musumusuga tatou te maua. Ma o le a mafai ona tatou faia mea e faigata ona fai, mo mafuaaga tatau, po o le a lava le mea e manaomia ai.
Ia Tumau Faamaoni i le Taitaiga E te Maua
E mafai ona tatou “tilotilo i luga” e ala i le tumau faamaoni i le taitaiga ua tatou maua mai i se Tama Faalelagi alofa, e ala i faaaliga faaletagata lava ia. O isi taimi e faalotovaivai ai i tatou e isi tagata mai le faia o mea ua tatou lagonaina, ma e tusa lava pe lelei o latou faamoemoega, e tatau lava ona tatou faamaoni i mea na tatou lagonaina.
O i maua ma lo’u toalua, e i ai lo ma afafine o loo faamisiona i Sepania. O lena afafine sa faaaluina ona tausaga o aoaoga maualuga i Niu Sila, a o avea ai au ma se peresitene o le misiona. Ina ua 21 ona tausaga, sa fai mai o ia, “Tama, Tina, ou te manatu e tatau ona fai sau misiona.” Ioe, sa ma fiafia i lenei faaiuga amiotonu, ae o le iloaina sa o se ositaulaga mo ia le aluese atu mai ana uo ma aiga i le taimi o lona olaga talavou, sa ou fai atu ai ia te ia, “Ua uma ona fai lau misiona.”
Sa ataata o ia ma fai mai, “E leai, Tama, o oe ua uma. O lea ua ou fia alu e auauna atu i le Alii.”
“Ua lelei,” sa ou ataata ai. “Ia e faia lena misiona. Ia e mulimuli i lena musumusuga e auauna atu.”
O le taimi nei, ua ou matuai fiafia lava ona e le gata ina auauna atu o ia i lona Tama Faalelagi ma Lana fanau i Sepania, ae o loo mulimuli foi o ia i le musumusuga sa ia lagonaina. Sa ia le faatagaina e oo lava ia te a’u—o se matua sa taumafai e fia fesoasoani—e tauanau o ia e fai soo se mea lava e ese mai i lo le mea sa ia lagonaina sa sa’o mo lona olaga ma le fuafuaga a le Tama Faalelagi mo ia.
Aua le Fefe e Faatino
E ui i le taua o le iloa o le fuafuaga a le Tama Faalelagi mo o tatou olaga, ae o nisi taimi tatou te lāvea ai i le fia iloa lea o faamatalaga uma, mai le amataga e oo i le faaiuga, lea e oo ai ina tatou fefefe e faatino. Aua nei outou pauu i lenei mailei. Fai ni filifiliga lelei e faaaoga ai lau faamasinoga sili ona lelei ma agai i luma i lou olaga. E faamanuiaina i tatou a o tatou faia filifiliga. Aua le fefe e fai filifiliga ona e te fefe i le faia o mea sese. Aua le fefe e faataitai i mea fou. O le faia o lena mea, o le a e maua ai le fiafia i le aluga o le olaga.
Ia Tu i Lou Tulaga
A o nonofo lo matou aiga i Niu Sila, o nisi taimi sa lofituina ai i matou i le tele o luitau na oo i tagata sailiili, tagata fou liliu mai, faifeautalai, ma isi. Sa tele ina matou tatalo mo ni tali—ma le faamoemoe ia maua vave mai!
O i tatou uma lava e manaomia le fesoasoani. Ma o nisi taimi o tali tatou te sailia e vave oo mai. Ae o isi taimi e oo mai i isi auala nai lo le mea na tatou faamoemoeina. Pe oo mai i se taimi mulimuli ane lava nai lo le mea na tatou manatu i ai. Ma e seasea lava, ae e foliga mai, e le oo mai lava.
I tulaga faapena, ia faaaoga le uiga o le “tu i lou tulaga” seia oo ina auina mai e le Alii se fesoasoani, e tusa lava pe o le a le umi. O le tu i lou tulaga e le faapea o le tu faasasa’o e le minoi. E pei ona ou ta’ua, aua le fefe e faatino. Ia faaauau pea ona fai o mea lelei. Ia faaauau pea ona usitai i poloaiga. Ia faaauau pea ona tatalo ma suesue ma fai le mea sili e te mafaia seia oo lava ina e maua se taitaiga faaopoopo. Aua nei e tiaia lou tulaga. I Lana lava taimi, o le a faatagaina ai e le Alii ia galulue mea uma mo lou lelei.
Ua atulasi ona faamanuiaina lo’u olaga i le “tilotilo i luga” talu mai lena aafiaga i le Misiona e Aoaoina ai Gagana. E pei ona faamalamalama mai e Mamona i le Helamana 3:27, “E alofa mutimutivale le Alii ia te i latou uma o e e valaau atu i lona suafa paia, ma le faamaoni o o latou loto.” Sa ou lagonaina ma maua Lona alofa mutimutivale ma le alofa. Ou te iloa o le a oo mai lona alofa mutimutivale ia i tatou uma pe a tatou talitonu ma valaau atu i Lona suafa.
Ata pue na tusia e Matthew Reier