Tala ia Iesu
O Loo Aoao Mai le Tusi a Mamona e uiga ia Iesu Keriso
O le Feagaiga Tuai o loo ta’u mai ai ia i tatou e uiga ia Iesu Keriso a o le’i afio mai o Ia e nofo i le lalolagi. Sa ta’ua o Ia o Ieova. O loo ta’u mai i le Feagaiga Tuai e uiga i ni tagata na mulimuli ia Ieova.
O le Feagaiga Fou o se tusi o mau o loo ta’u mai ai ia i tatou e uiga i le soifuaga o Iesu i le lalolagi. Sa tusitusi Ona soo e uiga i Lona soifuaga ma Ana aoaoga.
O le Tusi a Mamona o loo aoao mai foi e uiga ia Iesu Keriso ma tagata na mulimuli ia te Ia.
O le Tusi a Mamona o loo amata i Ierusalema i le taimi o le Feagaiga Tuai, pe a ma le 600 tausaga a o le’i fanau mai Iesu. O loo faamatala mai ai le tuua e le perofeta o Liae ma lona aiga ia Ierusalema ma sa taitaiina atu i latou i se nuu o le folafolaga, e mamao na sopoia ai le vasa i se Lalolagi Fou.
Na aoao mai perofeta o le Tusi a Mamona o le a afio mai Iesu i le lalolagi. Sa latou aoao mai foi o le salamo ma le mulimuli ia Iesu Keriso o le a aumai ai le fiafia.
Ina ua mavae le faasatauroga ma le toetu o Iesu i Ierusalema, sa asiasi atu o Ia i le Lalolagi Fou e aoao atu i tagata. Sa ia aoao atu e uiga i le papatisoga, le faamanatuga, ma le ala e alolofa atu ai i isi. Sa ia faatulagaina se ekalesia ma ni Aposetolo e toasefululua. Sa ia faapotopotoina tamaiti ma faamanuia i latou, e pei lava ona sa Ia faia i le Feagaiga Fou.
E pei foi o perofeta i le Tusi Paia, na faasoa atu e perofeta o le Tusi a Mamona a latou molimau e uiga ia Iesu Keriso.
O le perofeta mulimuli lava o le Tusi a Mamona o Moronae, o le sa ola pe tusa ma le 400 tausaga talu ona mavae le asiasiga a Iesu i le Lalolagi Fou. A o le’i maliu o ia, sa tusia e Moronae, o tagata uma lava e faitau i le Tusi a Mamona e mafai ona latou iloa e moni pe afai e tatalo o ia ma le faatuatua. Sa valaaulia e Moronae tagata uma e “o mai ia Keriso” (Moronae 10:32).
E mafai foi e tamaiti i aso nei ona tatalo ia maua se molimau e moni le Tusi a Mamona, ma o Iesu Keriso o lo latou Faaola.
Na vaai le uso o Iareto ia Iesu Keriso.
Na oo mai le siufofoga o le Alii i le mafaufau o Enosa ina o tatalo o ia.
Sa vaai Liae ia Iesu Keriso i se miti po o se faaaliga.
Sa aoao atu le Tupu o Peniamina i tagata e uiga i le Togiola a Iesu.
Agavale: ata na tusia e Robert T. Barrett; taumatau: ata na tusia e Paul Mann ma Gary Kapp