Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nai faataitaiga nei.

“O Le Iloaina o le Aao o le Atua i o Tatou Faamanuiaga i Aso Taitasi,” itulau e 24: Mafaufau e faitau le Tatalo a le Alii (tagai i le Mataio 6:9–13) ma fesili atu i lou aiga mo ni o latou manatu po o le a le uiga o le “foai mai ia te i matou i le aso nei a matou meaai e tatau mo le aso.” Ona otooto lea o le vaega muamua o le tusiga, lea o loo talanoaina ai e Elder Christofferson ia “meaai e tatau mo le aso.” Mafaufau e faaopoopo atu lau molimau o Iesu Keriso o le Areto o le Ola.

“Siaosi Alapati: Sa Soifua e pei ona Ia Aoao Mai,” itulau e 32: Sa talitonu Peresitene Siaosi Alapati Samita “afai e i ai moni sa tatou molimau o le talalelei a Iesu Keriso, o le a faaalia lea i o tatou olaga.” Toe faamanatu ma lou aiga le tusiga. Atonu o le a e fesili atu i tagata o le aiga po o le a se mea ua latou aoaoina mai le faataitaiga a Peresitene Samita o le faia o isi tagata ma le agalelei. Fesili atu pe faapefea ona latou faaali atili atu le agalelei.

“Tiloilo i Luga,” itulau e 42: Mafaufau e faasoa atu le aafiaga na oo ia Elder Cook a o avea ma se faifeautalai talavou ona fai lea o se aotelega o vaega o totoe o le tusiga. Fesili atu i tagata o le aiga pe faapefea ona latou taulai atu i le finagalo o le Tama Faalelagi ia te i latou nai lo manatu o tagata ia i latou. E mafai ona e faaiuina i le faitauina o le 1 Samuelu 16:7.

“Tausia o Feagaiga,” itulau e 48: Afai o loo sauni se tagata o lou aiga e fai se misiona, atonu e te manao e faitau atoa le tusiga lenei ma saunia se lisi o itu taua na ta’ua e Elder Holland. Ia faamamafa atu le faamatalaga “O le ki lava i le galuega lenei o le tausia o a tatou feagaiga.” Toe faamanatu pe o le a le feagaiga ma fesili atu i tamaiti pe faapefea ona latou saunia i le taimi nei e osia feagaiga.

“O Loo i Ai o Ia Iina,” itulau e 69: Mafaufau e usu le pese “O Le Tatalo a se Tamaitiiti” (Tusipese a Tamaiti, 6). Faitau e uiga i le aafiaga o Sister Wixom i le tatalo, ma uunaia tagata o le aiga e faasoa mai o latou lava aafiaga i tatalo faaletagata lava ia. Atonu e te fesili atu, “E mafai ona e mafaufau i se taimi na faamafanafanaina ai oe i le tatalo?” Ia faaiu i lau molimau i le tatalo.

O Se Gaoioiga Malie, o se Savali e Faavavau

A o avea au ma se talavou, sa ou auai ai ma le musuā i afiafi faaleaiga. Sa ou mafaufau faapea, sa i ai au mea e sili atu ona taua e fai.

I se tasi po o le Aso Gafua, ina ua mavae ni nai Afiafi Faaleaiga faigata, sa solo e lo’u tina le laulau o le umukuka ma tuu se tamai pai sieri i luma o i matou taitoatasi. Sa ou ou autilo solo ma le naunautai mo ni tui—ae sa leai se mea! Sa faamalamalama mai e Tina o le a fai le matou tauvaga ’ai pai, ae e le mafai ona matou faaaogaina ni tui po o ni sipuni po o o matou lima. O le tagata e manumalo e maua ni avanoa e gugutu ai.

Sa matou aai i le vave na matou mafaia. E lei leva ae lilo uma le laulau, o matou foliga, e oo lava i o matou lauulu i pai sieri. Ou te le manatua po o ai na manumalo, ae na ou manatua le le mafai ona taofiofi o la’u ata ma sa ou fiafia moni i lo’u aiga. Ou te le’i iloa atoa i lena po, ae o le taimi nei ua ou talisapaia lava le manaia o le i ai o se nofoaga saogalemu ma le alofa e ta’ua o le aiga ma i ai ni tagata e vaaia a’u.

Ou te mautinoa lava sa usu sa matou pese ma fai se lesona i lena po, ma sa tele se taimi na faaalu e lo’u tina e tapena ma faamama ai [le matou fale]. Ae ou te faafetai mo se gaoioiga na aoaoina ai au i se savali e uiga i le taua o aiga lea sa ou manaomia—i lena taimi ma talu mai lena taimi.

Heather Mockler Teuscher, Kalefonia, ISA