O Tatou Aiga, O Tatou Auaiga
Fesoasoani i Tamaiti ia Fiafia i le Tusi a Mamona
Ua matou iloa le aoga o nei meafaigaluega i le aoaoina o le ma fanau mai le Tusi a Mamona.
A o ma tausia ma lo’u toalua le ma aiga, sa ma naunau lava e faamautu i loto o le ma fanau e toalima se fiafia i le Tusi a Mamona. E pei o tagata kamuta, na ma iloa ai o ni meafaigaluega eseese o le a le gata ina aoga ae e taua foi i le aoaoina o le ma fanau ia fiafia i tusitusiga paia. Sa oo foi ina ma iloaina o le i ai o meafaigaluega po o auala e aoao ai le ma fanau o se isi auala lena, ae o le iloa o le ala e faaaoga ai o le isi lea auala.
Ma le isi, sa ma iloaina sa manaomia ona ma aoao i le auala e aoao ai le ma fanau e faaaoga le Tusi a Mamona i o latou olaga ma iloa lona taua i le lalolagi o loo latou ola ai. O le mafai ona ma faaaogaina o auala eseese e fesoasoani ai i le ma fanau sa faalagolago muamua lea ma le sili i lo maua malamalamaaga patino i tusitusiga paia, ma a maua molimau i lo latou moni, ma lo maua naunau i ai.
Aoaoina o Fanau Laiti Ifo
Talu ai o le gagana o tusitusiga paia e le taatele tele ma o le vaogagana a se tamaitiiti e tapulaa, o lea e fai ai ma luitau le aoaoina o tamaiti ia fiafia i le Tusi a Mamona. A o laiti le ma fanau, sa puupuu lava se taimi e nonofo lelei ai ma faalogologo, ma sa pupuu foi taimi o a matou suesuega i tusitusiga paia. Sa masani ona ma faaaogaina ia tusi faitau o tusitusiga paia e i ai ata mo suesuega faaleaiga o tusitusiga paia.
Ina ia faamalosia mataupu faavae sa faitauina ma aoaoina e le ma fanau i suesuega o tusitusiga paia, sa masani ai ona ou faaaogaina tala o tusitusiga paia o ni tala e faamatala pe a sauni le fanau e momoe. I ni tausaga mulimuli ane, sa faasoa mai e lo’u afafine le taua o lena faiga. Fai mai o ia, “Ou te manatu o tala sa faamatalaina soo na avea ma tala na sili ona matou fiafia i ai. Sa e nofo i talaane o o matou moega ma faasoa mai tala mai tusitusiga paia. Sa matou fiafia lava i ai ma fai atu ai e toe faamatala ma saga faamatala pea, aua e oo lava i na taimi o laiti na mafai lava ona matou lagona le agaga o le savali latou te auina mai ma iloa o tagata sa e faamatala mai ia i matou sa totoa ma faamaoni. Sa matou fia pei o i latou.”
Fetuunaia o Lesona i Manaoga o o Tatou Aiga
Ioe, a o faasolo ina matutua le ma fanau, sa matou faitau sao mai le Tusi a Mamona ma isi tusitusiga paia. Sa matou taumafai ma le faamaoni e faitau mai tusitusiga paia i taeao uma, e ui lava o nisi o le fanau sa pulupulu i palanikeke ma mata sa le’i feala lelei. Ae ui i lea, ua latou lipoti mai i le taimi nei, sa latou faalogologo, manatua, ma totoina ni fatu mo le lumanai.
Sa ma faamamafaina foi tusitusiga paia i le taimi o afiafi faaleaiga. Mo se faataitaiga, sa masani ona ma faaaofia ai gaoioiga e pei o le faatino ma taumate se tala: e faatino e tagata o le aiga se tala mai tusitusiga paia, ae taumate mai e isi tagata o le aiga le tala. Sa fiafia foi le ma fanau e taaalo i le “O Ai A’u?”—o se taaloga lea ma te tuuina atu ia i latou se faasologa o faaiteite seia oo ina latou mateia le tagata sa matou sueina mai le Tusi a Mamona. A o faasolo ina matutua le ma fanau, sa latou auai i le saunia ma le tuuina mai o lesona.
A o ma fetuunaia a matou afiafi faaleaiga i manaoga o lo matou aiga na i ai i le taimi lea, sa matou faaaogaina ai tala ma aoaoga mai le Tusi a Mamona e fesoasoani ai e aoao atu ia mataupu faavae. Mo se faataitaiga, sa matou aumaia ni lesona e uiga i amioga lelei ma le aloese i ponokalafi mai le fautuaga a Alema i lona atalii o Korianetona i le Alema 39. O se lesona lelei i le aloese mai i le tataina o pe’a i o tatou tino na maua mai i le tala i le au sa Amiliki i le Alema 3.
Sa ou saunia lesona i le taulimaina faalelei o finauga a tamaiti e faavae lea i olaga o Nifae (tagai i le 1 Nifae 7:20–21; 16:4–5), Iakopo (tagai i le 2 Nifae 2:1–3), ma Korianetona (tagai i le Alema 39:1, 10). O le tala faatupu manatu e uiga ia Alema ma Amoleka i le Alema 14:12–28 o loo aoao mai ai le onosai i mafatiaga. O se tasi o mataupu faavae taua sa matou aoaoina i nei mataupu ma le tele o isi mataupu, o le ia mautinoa lea matou te talanoaina ma le ma fanau a o lei avea moni ma se popolega po o se faafitauli i o latou olaga.
Fai Atu Fesili
E faaopoopo atu i le faitauina o tusitusiga paia faatasi ma le ma fanau, sa ma iloaina sa taua le fai atu o fesili o le a fesoasoani latou te iloa ai le taua o mea na latou faitauina. O le faigata o nei fesili e eseese lava e faalagolago i lo latou matutua, ae o le manatu ia aoao i latou ia vaavaai mo aoaoga ma faatatauga ma fesoasoani ia latou iloa le tele o mea o loo i ai e maua mai i le Tusi a Mamona.
Mo se faataitaiga, sa ou fesili i ai pe aisea na latou manatu ai na fai mai Nifae sa ia “vaai i puapuaga e tele i le gasologa o [ona] aso” ae o le laina na sosoo ai, na ia fai mai ai se mea na foliga mai na feteenai ai: e faapea sa “alofagia tele [o ia] e le Alii” (1 Nifae 1:1). O le matou talanoaga, sa iloa ai e le ma fanau e ui ina sa laveaiina e le Alii ia Nifae mai ona puapuaga, ae sa Ia tuuina atu foi ia Nifae se malamalamaaga sili atu o Ana mealilo (tagai i le 1 Nifae 1:1, 20).
E sili atu ona aoao tamaiti ma le autalavou pe a tatou fesoasoani ia latou iloa upumoni mo i latou lava. A o latou faia, o le a latou lagonaina le musuia ia fiafia ma faaaoga le Tusi a Mamona i o latou olaga atoa ma o le a lagona le saunia e fesoasoani atu i isi ia faapena foi ona fai.
Na oo ina iloa e le ma fanau na ma iloa o le Tusi a Mamona o loo i ai ni tala moni o ni tagata moni. Sa oo ina latou vaaia mea na ma vaaia, iloa mea na ma iloaina, ma lagona o ma’ua lagona e uiga i le Tusi a Mamona. O lenei mea na faamalolosia ai a latou molimau, fesoasoani ia latou fiafia i le Tusi a Mamona, ma taitai atu ai i latou e taumafai e fai lea lava mea mo a latou lava fanau.
Sa masani ona ma faaaogaina tala o tusitusiga paia o ni tala e faamatala pe a sauni le fanau e momoe.
Ata na tusia e Beth M. Whittaker