Vaavaaiga ma le Auaunaga e ala i Faiaoga Asiasi

Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalolosia ai ou uso ma avea ai le Aualofa ma se vaega ola o lou lava olaga.

Faatuatua, Aiga, Toomaga

Na aoao mai Peresitene Henry B. Eyring, Fesoasoani Muamua i le Au Peresitene Sili, “O le alofa moni o lona [uiga], e matua sili atu i lo na o se lagona o le agalelei. O le alofa moni e afua mai i le faatuatua i le Alii o Iesu Keriso ma o se aafiaga o Lana Togiola.”¹ Mo uso o le Aualofa, o faiaoga asiasi e mafai ona avea ma se faatinoga o le alofa moni, o se auala taua e faaaoga ai lo tatou faatuatua i le Faaola.

E ala atu i faiaoga asiasi, tatou te tuuina atu ai le vaavaaiga e ala i le faafesootaia o uso taitoatasi, faasoa atu se savali o le talalelei, ma saili ia iloa ona manaoga ma manaoga o lona aiga. Ua faamalamalama mai e Julie B. Beck, peresitene aoao o le Aualofa. “E avea faiaoga asiasi ma galuega a le Alii pe a tuu atu la tatou tulimata’iga i tagata ae le o pasene. O le mea moni, e le uma lava faiaoga asiasi. E mafuli i se ala e ola ai nai lo se feau. O le tautua ma le faamaoni e avea o se faiaoga asiasi, o se faamaoniga lea o lo tatou tulaga o ni soo.”²

A o tatou tuuina atu e le aunoa ma le agaga tatalo le vaavaaiga ma le puipuiga, tatou te aoao ai auala e sili ona lelei e auauna atu ai ma taulima ai manaoga o uso taitoatasi ma lona aiga. O le auaunaga e tele ituaiga auala e faia ai—o nisi e tetele ae o nisi e le tetele tele foi. Na aoao mai Peresitene Thomas S. Monson, “E masani lava o nai faatinoga laiti o le auauna atu ona pau na o mea o loo moomia e siitia ai ma faamanuia ai se tasi: o se fesili e faatatau i le aiga o se tagata, o upu faatopetope o le faamalosiauga, o se faamalo mai le loto, o sina faaupuga laitiiti o le faafetai, o se valaau puupuu atu i le telefoni. Afai tatou te mataitu ma iloa, ma afai tatou te faatino i uunaiga ia e oo mai ia te i tatou, e mafai ona tele mea lelei tatou te faataunuuina. … E le mafaitaulia faatinoga o le auaunaga ua faia e le toatele o faiaoga asiasi o le Aualofa.”³

Mai Tusitusiga Paia

Ioane 13:15, 34–35; 21:15; Mosaea 2:17; Mataupu Faavae ma Feagaiga 81:5; Mose 1:39

Mai lo Tatou Talafaasolopito

I le 1843, sa vaevaeina ai tagata o le Ekalesia i Navu, Ilinoi i ni uarota se fa. O Iulai i lena tausaga, sa tofia ai e taitai o le Aualofa se komiti asiasi o tuafafine e toafa mo uarota taitasi. O tiutetauave o komiti asiasi na aofia ai le fuafuaina o tulaga manaomia ma le aoina o foai. Sa faaaogaina e le Aualofa nei foai e saunia ai fesoasoani ma le toomaga mo e le tagolima O Iulai i lena tausaga, sa tofia ai e taitai o le Aualofa se komiti asiasi o ni tuafafine e toafa mo uarota taitasi. O tiutetauave o komiti asiasi na aofia ai le fuafuaina o tulaga manaomia ma le aoina mai o foai. Sa faaaoga e le Aualofa nei foai e tausia ai e le tagolima.⁴

E ui ina le toe aoina mai e faiaoga asiasi ia foai, ae o loo latou tauaveina pea le tiutetauave o le fuafuaina o tulaga manaomia —faaleagaga ma faaletino—ma galulue e faafetauia na manaoga. Sa faamalamalama mai e Eliza R. Snow (1804–87), o le peresitene aoao lona lua o le Aualofa: “O se faiaoga … e tatau ona matuai tele ai le Agaga o le Alii, pe a ia ulufale atu i se fale e iloa ai po o le a le agaga la te feiloai iina. … Ole atu i le Atua ma le Agaga Paia ia maua [le Agaga] ina ia mafai ona e feiloai i lena agaga o loo i ai i lena fale … ona mafai lea ona e lagona e tautala atu i upu o le filemu ma le mafanafana, ma afai e te maua atu se uso o maalili, ia e aveina o ia i lou loto e faapei ona e opoina o se tamaitiiti i lou fatafata ma faamafanafana [ia te ia].”⁵

Ata na saunia e Matthew Reier