Savali a le Au Peresitene Sili
Ola i se Olaga Faamanuiaina
I le amataga o lenei tausaga fou, ou te tuuina atu se lu’i i le Au Paia o Aso e Gata Ai i atunuu uma ina ia faia se sailiiliga patino, filiga, ma le taua mo le mea ua ou ta’ua o le olaga faamanuiaina—o se olaga ua faatumulia i le tele o mea na ausia, mea lelei, ma faamanuiaga. E pei ona tatou aoaoina le AEI i le aoga, ou te ofoina atu foi la’u AEI ina ia fesoasoani ia i tatou uma ia maua le olaga faamanuiaina.
Ia I Ai se Amio po o se Uiga Lelei
O le A i la’u AEI e faatatau lea i le amio. Na tusia e William James, o se paionia Amerika e suesueina le mafaufau ma tulaga faalelotu, faapea, “O le taua sili lava o loo tauina e o tatou tupulaga o le iloaina lea, e mafai e tagata soifua ona suia o latou olaga, e ala mai i uiga po o amio i totonu o o latou mafaufau.”1
O le tele lava o le olaga e fuafua ia tatou amioga ma uiga. O le auala tatou te filifili e vaai ai i mea ma tali atu ai i isi e matua tele lava sona aafiaga. O le faia o le mea sili tatou te mafaia ona filifili lea ia fiafia e uiga i o tatou tulaga, e tusa lava po o le a, o le a mafai ai ona aumaia le filemu ma le faamalieina.
Na fai mai Charles Swindoll—o se tusitala, faiaoga, ma se faifeau Kerisiano—: “Ia te au lava ia, o le amio po o uiga faaalia e sili atu le taua nai lo… mea ua tuanai, … nai lo tupe, nai lo tulaga, nai lo toilalo, nai lo manuia, nai lo manatu po o tala po o mea e fai e isi tagata. E sili atu le taua nai lo foliga vaaia, faameaalofaina, po o le tomai. E mafai ona fausia ai pe gausia ai se kamupani, se ekalesia, se aiga. O le mea sili ona ofoofogia o le i ai lea o sa tatou filifiliga i aso uma e faatatau i le amio o le a tatou opogiina mo lena aso.”2
E le mafai ona tatou faatonuina le matagi, ae e mafai ona tatou fetuunaia ia la o a tatou vaa. Mo le faatapulaaina o le fiafia, filemu, ma le faamalieina, talosia tatou te filifilia se amioga lelei.
Talitonu ia te Oe Lava Ia
O le E e mo le talitonu—ia te oe lava ia, ia i latou o loo siomia oe, ma i mataupu faavae e faavavau.
Ia e faamaoni ia te oe lava ia, i isi, ma lou Tama Faalelagi. O Katinale Wolsey o sē tasi e le’i faamaoni i le Atua seia oo ina ua matua tuai lava ma o lē, sa ta’ua e Siekisipia, na ia faaaluina se taimi umi o lona olaga e auauna atu ai i ni tupu se toatolu ma fiafia ai i le tamaoaiga ma le malosi. Mulimuli ane, na aveesea lona malosi ma le tamaoaiga e se tupu e le lava le onosai. Na tagi Katinale Wolsey ma faapea:
Pe a na fai lava ou te auauna i lo’u Atua ma le afa o le naunautai
Sa ou auauna ai i lo’u tupu, semanu Na te le
Tuua lava a’u ua lē lavalavā i o’u fili.3
O Thomas Fuller, o se tagata lotu Peretania ma se tusitala o talafaasolopito lea na ola i le seneturi lona 17, na tusia le upu moni lenei: “O lē e le ola e tusa ma lona talitonuga, e le talitonu moni lava.”4
Aua e te tuuina oe lava i lalo ma aua e te faatagaina isi e faatalitonu oe faapea e tapulaa mea e te mafai ona faia. Ia e talitonu ia te oe lava ia ma ia e ola ina ia ausia mea e te gafatiaina.
E mafai ona e ausia mea e te talitonu i ai. Faamoemoe ma talitonu ma ia faatuatua.
Ia Lototoa e Fetaiai ma Luitau O le I e mo le lototoa.
E avea le lototoa ma se uiga lelei taua ma le aoga pe afai e le mafaufau tele i ai faapea o se naunautaiga ia oti ai faatamatane, ae o se naunautaiga ina ia ola tauagafau.
Fai mai le tagata tusitala Amerika ma se fatusolo o Ralph Waldo Emerson: “Po o le a lava sau mea e fai, e te manaomia lava le lototoa. Po o le a lava se ala e te filifilia, e i ai pea lava se tasi e ta’uina atu ia te oe e te sese. E i ai pea lava faafitauli o loo tutupu ae e faaosoosoina oe ina ia e talitonu e sa’o lau au faitio. Ina ia fuafuaina se faatinoga e fai ma mulimuli ai seia oo i le iuga, e manaomia le ituaiga lototele lea foi e manaomia e se fitafita. E i ai manumalo i le filemu, ae e moomia ia alii ma tamaitai lototetele ina ia manumalo ai.”5
O le a i ai taimi o le a outou fefefe ma lotovaivai ai. Atonu o le a outou lagona ua faatoilaloina outou. O isi mea e maua ai le manumalo atonu e foliga lofituina. E i ai taimi atonu e te lagona ai le pei o Tavita o loo taumafai e tau ma Koliata. Ae ia manatua—na manumalo lava Tavita!
E manaomia le lototoa e faia ai se uluai taumafaiga e agai atu ai se tasi i se sini o naunau i ai, ae e sili atu le manaomia o le lototoa pe a tautevateva se tasi ma ua tatau ai ona faia se taumafaiga lona lua ina ia ausiaina.
Ia i ai se naunautaiga e faia ai se taumafaiga, o le manatu tasi e galue agai i se sini aoga, ma le lototoa e le na o le feagai ai ma luitau lea e mautinoa lava e oo mai ae e tatau foi ona faia se taumafaiga lona lua, pe a manaomia. “O nisi taimi, o le lototoa o se leo lemu lea e faapea mai i le faaiuga o le aso, ‘O le a ou toe taumafai foi a taeao.’”6
Ia tatou manatua nei AEI a o amata la tatou malaga i le tausaga fou, i le atiina ae o se amio e lelei, se talitonuga e mafai ona tatou ausia a tatou sini ma folafolaga, ma le lototoa e feagai ai ma soo se luitau e oo mai ia i tatou. Ona fai ai lea mo i tatou le olaga faamanuiaina.
Aoao Atu Mai Lenei Savali
Mafaufau e valaaulia tagata o le aiga e faasoa mai ni aafiaga o le tagata lava ia ina ua fesoasoani ia i latou se uiga faaalia lelei, talitonuga ia i latou lava, po o le lototoa. Pe valaaulia foi i latou e sue ni faataitaiga o mataupu faavae nei e tolu i tusitusiga paia. E mafai foi ona e sauniuni e aoao atu e ala i le mafaufau ma le agaga tatalo i mau po o ni ou lava aafiaga.
Ata na tusia e Steve Kropp