Sueina o Tali i le Tusi a Mamona
O la tatou faigamalaga i le olaga e mafai ona luitauina, peitai e lei auina mai i tatou iinei e lo tatou Tama Faalelagi alofa ina ia tatou taulimaina na o i tatou ia faigata o le olaga. O le tasi o fesoasoani sili na Ia tuuina mai ia i tatou o le Tusi a Mamona. E le gata ina aoao mai ai le atoaga o le talalelei ae e taiala ai foi i tatou i faafitauli tatou te oo i ai. A o tatou suesue i le Tusi a Mamona, o le a fesoasoani le Agaga i le sueina o tali i o tatou faafitauli ma fesili.
Na molimau mai Elder M. Russell Ballard o le Korama a Aposetolo e Toasefululua:
“O Le Tusi a Mamona, e sili atu i isi tusi uma lava i lo’u iloa, o se puna sili lea ua tatou maua mo tali i faafitauli o le olaga. …
“E fia ea taimi ua oo ai le filemu i le olaga o i latou o e tauivi ma faafitauli moni o le lalolagi pe a latou faitauina le Tusi a Mamona! O faatusa o le taitaiga faaleagaga lena e suluia mai le tusi, e le mafaitauina.”1
O tala o loo i lalo, ua faasoa mai ai e le au paia auala na latou maua ai i le Tusi a Mamona ia tali na latou sailia.
O Le Oo i se Liliuga o le Loto
E ui ina sa ia iloa le talalelei a o laitiiti, mulimuli ane na se ese Greg Larsen (ua suia le igoa) o Kalefonia, ISA. Sa amata ona aafia i fualaau oona ma solitulafono ma e lei leva ae oo i le falepuipui. Sa manao o ia e toe suia lona olaga ae sa ia le mautinoa pe faapefea.
Sa tusia e Greg, “Sa aoaoina e alii mai le uarota i le lotoifale le Aoga Sa i le falepuipui. O se tasi o i latou na fai mai ia te au, o le a lelei atu le olaga pe a ou faitau i le Tusi a Mamona. Ma o le mea lena sa ou faia.
“Ina ua ou aluese mai le falepuipui, sa ou toe alu i le lotu, ae sa ou lagonaina lava le manao e toe foi i tua i au amioga tuai. A o faaauau ona ou faitau i le Tusi a Mamona, sa ou aoao ai e uiga i le nuu o le Tupu o Lamonae i le Alema 19:33, ua ‘liua o latou loto; ua le toe i ai ia te i latou se manao e fai mea leaga.’ Sa amata ona ou tatalo mo lenei liua o le loto.”
Na maua e Greg le tali i lana tatalo i le Helamana 15:7, lea o loo aoao mai ai o le “faatuatua ma le salamo lea ua aumai ai se liliuga o le loto.”
“A o ou faitauina na upu, na maligi ou loimata. Sa molimau mai le Agaga e alofa lo’u Tama Faalelagi ia te au ma o le a fesoasoani mai ia te au. Sa ou lagonaina afai e lava lo’u faatuatua e talanoa atu ai i lo’u epikopo, o le a lava lea. Ina ua lafoai au agasala i aao o le Faaola, sa ou mauaina se liliuga moni o le loto.”
Mauaina o Lona Ala
Sa sau Laura Swenson o Idaho, ISA, i le fale i se tasi aso ma le le fiafia ma le tagi. Sa le’i faaipoipo o ia, ma o ana fuafuaga mo le kolisi ma le galuega sa ia moemiti i ai talalautasi. Sa ia tusia, “sa ou mafaufau pe sa i ai se mea na ou agai i ai.”
“Sa musuia au ou te liliu atu i le Tusi a Mamona. I fuaiupu muamua e fa o le 1 Nifae 18, sa ou maua ai se tali i ou popolega. O nei fuaiupu o loo faamatala mai ai le vaa na fauina e Nifae e ave atu ai lona aiga i le nuu o le folafolaga. Sa o se ‘gaosiga uiga eseese’ ma sa le’i fauina ‘i ala a tagata’; ae, sa fauina ‘i le ala na faaali mai e le Alii’ (fuaiupu 1–2). Sa masani ona talanoa Nifae ma le Alii a o fauina le vaa. Ina ua uma le vaa, sa ‘lelei, ma … o lona gaosiga sa matua lelei’ (fuaiupu 4).
“Sa ou iloaina o la’u lava faigamalaga sa o se ‘gaosiga uiga eseese.’ Sa le fetaui ma mamanu a le lalolagi ae o le a ou tau atu ai i le mea e tatau ona ou alu i ai pe afai ou te sailia le taitaiga a le Alii. O nei fuaiupu sa o se sulu o le malamalama i se taimi pogisa. Sa lei uma ou faafitauli i se taimi vave, ae na ou maua le vaaiga sa ou manaomia. Ua ou i ai nei i se galuega faamanuiaina lea ou te lei mafaufauina.”
Mauaina o se Isi Molimau
A o talavou, sa mafaufau ai Adrián Paz Zambrano o Honetura pe aisea ua ta’ua ai e le Tusi Paia na o le eria faataamilo i Ierusalema ma manatunatu ai pe na asiasi Iesu Keriso i isi atunuu.
Na tusia e Adrián, “O ni tausaga mulimuli ane, na o mai ai ni faifeautalai se toalua O Le Ekalesia a Iesu Keriso o le Au Paia o Aso e Gata Ai i lo’u fale. Sa la faaali mai ia te au le Tusi a Mamona ma valaaulia au e faitau i le 3 Nifae, lea o loo tau mai ai le asiasi atu o Keriso i le atu Amerika.
“A o ou faitau, sa ou manatuaina au fesili sa i ai a o ou talavou. Sa ou mauaina ia tali. Ona o le Tusi a Mamona, na ou iloa ai sa asiasi atu Iesu Keriso i le atu Amerika ina ua mavae Lona Toetu. Sa tumu a’u i le fiafia ona ua ou iloaina e alofa le Atua i Ana fanau uma lava e tusa lava po o fea e nonofo ai ae po o a foi tulaga.”
Sa tatalo faatasi Adrián ma lona toalua ia iloa pe moni le Ekalesia, ma sa maua e i laua uma se molimau. Sa papatisoina ma faamauina i laua, ma i le tasi tausaga mulimuli ane, na faamauina ai lo laua aiga i le malumalu.
Tausiga mo Lona Aiga
I le 30 o tausaga, na ma’i ai Eric James o Mekisiko Fou, ISA i se faamai o le fatugao. I le avea ai ma se tamā talavou, sa matuai faanoanoa o ia ma mafaufau pe mata o le a mafai ona ia tausia lona aiga.
Sa faitau o ia i le Tusi a Mamona ma sa mafaufau foi faapena Nifae ina ua gau lana aufana na faia i le sila na sili ona lelei. Ae ina ua uma ona [ia] faia se aufana mai se laau, sa faapea ona toe mafai e Nifae ona fafaga lona aiga. (Tagai i le 1 Nifae 16:18–23, 30–32.)
Fai mai Eric, “O le tala a Nifae sa faatumulia ai lo’u agaga i se malamalama matagofie. O le tino maloloina sa ou fiafia ai seia oo mai i lena taimi sa pei lava o le aufana sila a Nifae. Ina ua faaletonu lo’u ola maloloina, sa pei lava ua gau la’u aufana. Ae na ou iloaina na faamanuiaina au e le Alii i se aufana laau i le ala o se taotoga e sui ai [lo’u] fatuga’o. O lenei suiga o le fatuga’o o le a aumai ai ia te au le malosi e tausi ai lo’u aiga. O lenei mea na aumaia ia te au le faamoemoe. Ua toeitiiti 10 tausaga mulimuli ane, o loo faaauau pea ona ou tausia lo’u aiga ma auauna atu i le Alii i le mea sili ou te mafaia.”
Aoaoina o le Fanau i le Usiusitai
A o laiti lana fanau, sa liliu atu Juan Jose Resanovich o Atenitina i le Tusi a Mamona, pe a i ai ni ana fesili i le ala e aoao ai ma tausi ai lana fanau. Sa ia tusia,“Sa ma suesueina ma lo’u toalua ia ona itulau mo musumusuga mo le ma fanau, ma ma te maua ai i taimi uma ia tali.”
Sa aoaoina e le au Resanoviches le la fanau i le usiusitai i le faasino atu o i latou i le faataitaiga a Nifae i le 1 Nifae 3:5–6:
“Ua muimui ou uso, fai mai o se mea faigata ua ou faatonuina ai i laua; ae faauta ou te lei faatonuina ai i laua, ae o se poloaiga mai le Alii.
“O lea ia e alu ai, lo’u atalii e, ma o le a alofagia oe e le Alii, ona ua e le muimui.”
Sa tusia e Juan, “Sa ma aoaoina le ma fanau sa faaaloalo Nifae i ona matua faalelalolagi ma mea a le Atua. Sa matou faia se sini o se aiga, o le a matou maua uiga o Nifae o le faaaloalo ma le usiusitai.
“Sa faamisiona uma le ma fanau. Ma te lei tauanauina i latou e auauna atu. Sa avea i latou ma ni tamaiti aooga lelei, uo lelei, ma ni fanau lelei. E tele lava mea e ao ona faaleleia atili e lo matou aiga, ae o le Tusi a Mamona o se fesoasoani maoae lea i le ausiana o a matou sini.”
Sao mai Maea ua Fai ma Vaisu
A o tauivi ai ma se vaisu o meaai, sa tatalo Susan Lunt o Iuta, ISA mo se fesoasoani. Sa liliu atu o ia i le Tusi a Mamona ma faitau ai sa laveaiina Nifae mai maea na saisai ai e ona uso ia ona lima ma vae:
“Le Alii e, e tusa ma lo’u faatuatua ia te oe, sei e laveaia au … ; ioe, foai mai ia te au le malosi ia mafai ai ona ou motusia o nei maea ua noatia ai au.
“Ma sa oo ina … matala ese maea” (1 Nifae 7:17–18).
Sa tusia e Susan, “O lenei mau sa faamatalaina tonu lava ou lagona—saisaitia i maea o mea ua fai ma vaisu. Na vave ona matala ese maea faaletino a Nifae ina ua ia ole atu mo le laveaiga. O au maea sa le faaletino ma ou te lei faatoilaloina mea na fai ma au vaisu i se taimi puupuu, ae a o ou faitau i na upu, sa ou lagonaina le suia o se mea i totonu o au. Na pei sa ou lagonaina le matala ese o maea mai lo’u loto, mafaufau, ma le tino, ma sa ou iloaina e mafai ona ou faatoilaloina mea na fai ma a’u vaisu.”
Ua tele se alualu i luma ua faia e Susan ma, ona o le musumusuga sa ia maua i le Tusi a Mamona, na mafai ai ona ia motusia isi mausa na saisaitia ai o ia, e aofia ai le ita, manatu faapito, ma le faamaualuga. Sa ia faamatala mai, “Ua ou iloa o le Tusi a Mamona o le afioga lea a le Atua, ma o le tali i soo se fesili o le olaga e mafai ona maua i totonu o itulau o lena tusi.”
Ata na tusia e Welden C. Andersen
Taumatau: ata na pueina e Christina Smith