O Le Iloaina o le Aao o le Atua i o Tatou Faamanuiaga i Aso Taitasi
Mai se faeasaite a le Ofisa o Aoga a le Ekalesia na tuuina atu i le aso 9 o Ianuari, 2011. Mo le anotusi atoa i le Igilisi, asiasi i le speeches.byu.edu.
O le ole atu mo le meaai ma le mauaina o meaai i aso uma i aao o le Atua, e i ai se vaega taua i le aoao e faalagolago ia te Ia ma le onosaia o luitau o le olaga.
Sa tusia e Luka se tasi o soo o le Alii na fesili atu ia te Ia, “Le Alii e, ia e aoao mai ia te i matou i tatalo, e faapei o Ioane foi ona aoao i ona soo” (Luka 11:1). Ona tuuina atu lea e Iesu se mamanu mo le tatalo ua lauiloa o le Tatalo a le Alii (tagai i le Luka 11:2–4; tagai foi i le Mataio 6:9–13).
O loo aofia i le Tatalo a le Alii le talosaga “Ia e foai mai ia te i matou i le aso nei a matou mea e ai e tatau ma le aso” (Mataio 6:11; tagai foi i le Luka 11:3). E tofu uma i tatou ma manaoga i aso uma lea tatou te liliu atu ai i lo tatou Tama Faalelagi. Mo nisi, o se meaai moni lava—o meaai e manaomia e tausi ai le ola i lena aso. E mafai foi ona avea o se malosi faaleagaga ma faaletino e feagai ai ma se isi aso se tasi o gasegase masani po o se togafitiga tiga ma le faifai umi. I isi tulaga atonu o se manaoga e tau le faaletino, e pei o se mea e faatatau i tiute po o gaoioiga a se tagata i lena aso—o le aoao atu o se lesona po o le faiga o se suega, mo se faataitaiga.
Ua aoao mai e Iesu i tatou, o Ona soo, e tatau ona tatou vaai atu i le Atua i aso taitasi mo meaai—le fesoasoani ma le tausiga—tatou te manaomia i lena aso faapitoa. O le valaaulia a le Alii e saili atu a tatou meaai i aso uma i aao o lo tatou Tama Faalelagi ua talanoa mai ai e uiga i se Atua agalelei, e silafia e oo lava i manaoga laiti o Lana fanau i aso taitasi ma e naunau e fesoasoani mai ia i latou, taitoatasi. O loo fai mai o Ia e mafai ona tatou ole atu ma le faatuatua i lena Tamalii “o lē foai tele mai i tagata uma ma le lē toe tautaua; ona foaiina mai ai lea ia te ia” (Iakopo 1:5). O lena mea, e moni lava, e matuai faafiafia loto, peitai e i ai se mea o faatino iinei, e sili atu ona taua nai lo na o se fesoasoani e ola ai mai lea aso i lea aso. A o tatou sailia ma maua meaai faalelagi i aso taitasi, e tuputupu ae lo tatou faatuatua ma le talitonu i le Atua ma Lona Alo.
O Le Vaai Atu i le Atua i Aso Uma
I le tuanai ai o la latou malaga umi tele mai Aikupito, sa faaaluina e ituaiga o Isaraelu tausaga e 40 i le vao a o lei oo atu i le nuu o le folafolaga. O lenei vaega toatele o tagata e silia ma le miliona o tagata na tatau ona fafagaina. E mautinoa lava o lena fuainumera i se nofoaga se tasi e le umi ona ola i le taaloga o le tutuli [manu], ma lo latou ituaiga olaga, o le taimi ua malaga o le taimi ua faato’a ni fanua i se taimi sa le fetaui mo le tausiga o ni togalaau po o ni lafumanu i soo se aofaiga e tofu ai. Sa foia e Ieova le luitau i le tuuina mai faavavega o a latou meaai mai le lagi i aso uma—o le manai. Na ala mai ia Mose, sa faatonuina ai e le Alii ia tagata e faaputu lava na o manai e lava ai aso taitasi mo lena aso, vagana ai le aso na sosoo ma le Sapati, lea sa tatau ai ona latou faaputuina ia lava mo aso e lua.
E ui lava i faatonuga patino a Mose, ae sa taumafai lava isi e ao ia tele atu nai lo le mea na lava ai mo le aso e tasi ae teu mea e totoe:
“Ona fai atu lea o Mose ia i latou, aua nei tuu e se tagata sina toe mea seia aulia le taeao.
“A e lei faalogo i latou ia Mose; ua tuu e nisi tagata toe mea i le taeao, i le ua tupu ai ilo, ua elosia” (Esoto 16:19–20).
Peitai, e pei ona folafolaina, ina ua latou faaputuina e faaluaina le tele o le manai e masani ai i aso taitasi, i le aso lona ono, sa lei leaga (tagai i le Esoto 16:24–26). Peitai, o nisi lava foi sa le mafai ona talitonu e aunoa ma le vaai i ai, ma sa latou o atu e sue ma faaputu manai i le Sapati, ae “lei maua se mea e i latou” (tagai i le Esoto 16:27–29).
O le tuuina mai o le tausiga i aso uma e tasi le aso i le taimi, sa taumafai ai Ieova e aoao atu le faatuatua i se nuu na silia ma se vaitaimi o le 400 tausaga na latou le maua ai le faatuatua o o latou tama. Sa Ia aoaoina i latou e faalagolago ia te Ia. O le mea moni, sa tatau i le fanauga a Isaraelu ona savavali faatasi ma Ia i aso taitasi ma faatuatua o le a Ia foai mai ni meaai e lava mo le aso e sosoo ai i le aso e sosoo ai ma faapena ai lava. O lena faiga e le mafai ai ona taumamao o Ia mai o latou mafaufau ma loto.
O le taimi lava na oo ai ituaiga o Isaraelu i se tulaga e mafai ona latou tausia ai i latou lava, sa manaomia loa ona latou faia o lena mea. E faapena foi, a o tatou ole atu i le Atua mo a tatou meaai o le aso—mo le fesoasoani i le taimi e le mafai ai ona tatou tausia i tatou lava—e ao pea ona tatou faamalolosi i le faia ma le aumaia o mea e mafai ona oo i ai lo tatou malosi.
Faatuatua i le Alii
O se taimi a o lei valaauina au o se Pulega Aoao, sa ou feagai ai ma se luitau patino faaletamaoaiga lea sa faaauau ai mo ni nai tausaga. Sa mou ma tafe atu i le ogaoga ma le manaomia vave o se fesoasoani, ae sa le’i aluese ai. Na i ai taimi na taufaamatauina ai e lenei luitau le manuia o lo’u aiga, ma sa ou faapea matou te ono feagai ma se faaletonu tautupe. Sa ou tatalo mo se laveaiga faavavega e faasaoina ai i matou. E ui ina sa ou faia lena tatalo i le tele o taimi ma le faamaoni tele ma le manao faatauanau, o le tali i le iuga o le leai. Mulimuli ane, sa ou aoao ai e tatalo e pei ona sa faia e le Faaola: “Ae aua le faia lo’u loto, a o lou finagalo” (Luka 22:42). Sa ou sailia le fesoasoani a le Alii i laa laiti taitasi i le aluga o le ala i se tautinoga mulimuli.
Sa i ai taimi sa uma lelei ai lava a’u punaoa, sa leai se mea ma leai se tasi e liliu atu i ai mo se fesoasoani e tali i le manaoga faavave na tulai mai. Faatasi ai ma le leai o se isi lava auala, na sili atu ma le faatasi ona ou faapau i luma o lo’u Tama Faalelagi, ma faatauanau atu ma loimata mo Lana fesoasoani. Ma sa fesoasoani mai o Ia. O nisi taimi sa le sili atu lava nai lo na o se lagona o le filemu, o se lagona o le faamautinoaga o le a sologa lelei mea uma. Atonu o le a ou le iloa pe faapefea po o le a foi le ala, ae sa Ia tuuina mai ia te au ia ou iloa lena mea, tuusao pe le tuusao foi, o le a Ia tatalaina se ala. E ono suia tulaga, e ono oo mai i le mafaufau se manatu fou ma le aoga, e ono oso mai se tupe maua sa lei faamoemoeina po o isi punaoa i le taimi tonu lava lea. I nisi o itu, sa i ai lava se tali.
E ui ina sa ou pagatia i lena taimi, ou te faafetai i le taimi nei ona sa leai se tali vave i lo’u faafitauli. O le mea moni e faapea sa faamalosia au e liliu atu i le Atua mo le fesoasoani na toetoe lava o aso uma mo se vaitaimi faaumiumi, ua aoaoina ai au i le auala e tatau ona tatalo moni atu ai ma maua mai ai tali i tatalo, ma aoao ai au i se auala lelei ia ou faatuatua i le Atua. Sa oo ina ou iloa lo’u Faaola ma lo’u Tama Faalelagi i se auala ma se maualuga lea na semanu e le tupu pe ana o se isi auala, pe semanu foi e umi atili ai se taimi ou te [sailia ai se fofo]. Ua ou aoaoina o meaai i aso uma o se oloa faapelepele. Ua ou aoaoina o le manai i aso nei e mafai ona mo’i e pei lava o le manai faaletino i le talaaga faaletusi paia. Ua ou aoaoina e faatuatua i le Atua ma lo’u loto atoa. Ua ou aoaoina e savavali faatasi ma Ia i lea aso ma lea aso.
Galulue i Faafitauli
O le ole atu i le Atua mo a tatou meaai mo lea aso ma lea aso, nai lo a tatou meaai o le vaiaso, masina, po o le tausaga o se auala foi tatou te taulai tonu atu ai i faafitauli laiti e faigofie atu ona taulima. O le taulimaina o se faafitauli tele, atonu e manaomia ai ona tatou galulue i ai i ni faiga laiti i aso taitasi. O nisi taimi e pau lava mea e mafai ona tatou taulimaina o se aso e tasi—pe na o se vaega foi o le aso e tasi—i le taimi.
I le vaitaimi o le 1950 sa manuia ai lo’u tina mai se taotoga tele o le kanesa, lea na sosoo ai ma le tele o togafitiga tiga e fai i le leisa. Sa ia manatua sa aoaoina o ia e lona tina i lena taimi i se mea sa fesoasoani ia te ia mai lava i lena vaitaimi:
“Sa matuai ou ma’i tigaina ma vaivai, ma sa ou fai atu ia te ia i se tasi o aso, ‘Se, Tina, e le mafai ona ou onosaia le isi 16 o na togafitiga.’
“Sa fai mai o ia, ‘Pe mafai ona e alu nei?’
“‘Ioe.’
“‘Ia, lau pele, e na o le pau lava lena o le mea e tatau ona e faia nei.’
“Sa fesoasoani ia te au i le tele o taimi pe a ou manatua e taulima le aso e tasi po o le mea e tasi i le taimi.”
E mafai e le Agaga ona taiala i tatou i le taimi e tilotilo atu ai i luma ma le taimi e tatau ai ona tatou taulimaina na o lenei aso e tasi, i lenei taimi e tasi.
Ausia o Mea Tatou te Gafatia
O le ole atu ma le mauaina o meaai i aso taitasi i aao o le Atua, e i ai se sao taua i le aoao e faatuatua ia te Ia ma i le onosaia o luitau o le olaga. Tatou te manaomia foi se vaega o le meaai faalelagi i aso taitasi ina ia avea ai i tatou ma tagata e tatau ona avea ai. O le salamo, alualu i luma, ma iu ai ina ausia “le fua o le ua matua e tatau ma le tumu o Keriso” (Efeso 4:13) o se faagasologa o le laasaga ma lea laasaga. O le faaaofia ai o amioga fou ma le aoga i o tatou uiga po o le faatoilaloina o amioga le lelei po o mausa e masani ona faauigaina o se taumafaiga i le taimi nei ma sosoo ai ma le isi a taeao ma le isi, atonu mo ni aso se tele, po o ni masina ma ni tausaga, seia oo ina tatou ausia le manumalo. Ae e mafai ona tatou faia aua e mafai ona tatou talosaga atu i le Atua mo a tatou meaai o le aso, mo le fesoasoani tatou te manaomia i aso taitasi.
Na saunoa Peresitene N. Eldon Tanner (1898–1982), Fesoasoani Muamua i le Au Peresitene Sili, e faapea: “A o tatou manatunatu i le taua o le faia o se faaiuga e faia ia sili atu ona lelei, ia tatou filifili e pulea lelei i tatou lava ia filifili ma le faaeteete sini ua tatou faia, ina ia mafaufau i le faamoemoega ua faia ai ia mea, ma le mea mulimuli ia faia tautinoga ina ia tausia ma ia aua nei faatagaina se mea e taofia i tatou. Ia tatou faamanatu ia i tatou lava i le amataga o aso taitasi e mafai ona tatou tausia se sini mo lena lava aso.”1
Talu ai nei na aoao mai ai Elder David A. Bednar o le Korama a Aposetolo e Toasefululua e faapea, o le tumau i le faia o faatinoga faigofie i aso taitasi e pei o tatalo faaleaiga, suesueina o tusitusiga paia, ma afiafi faaleaiga e taua i le fausia o aiga manuia. Fai mai o ia, “O lo tatou faia pea e le aunoa o nai mea iti faigofie, e mafai ona tulai mai ai taunuuga faaleagaga maoae.”2
Na tuuina mai e Peresitene Ezra Taft Benson (1899–1994), le fautuaga lenei a o saunoa e uiga i le salamo: “E tatau ona tatou faaeteete, a o tatou saili ia avea atili i tatou [faapei o Keriso], ina ia aua nei o tatou atuatuvale ma lē maua le faamoemoe. O le avea faapei o Keriso o se taumafaiga e faia i le olaga atoa, ma e masani ona aafia ai le tuputupu ae ma le suia lena e oo mai lemu ma faifai malie.”3
Sailia o le Fesoasoani a le Alii i le Auauna Atu
Ia manatua e le gata ina tatau ona tatou vaai i totonu pe a tatou sailia se fuataga o aso taitasi o meaai faalelagi. Afai tatou te fia faapei atili o le Matai, o Le na “le sau ina ia auauna tagata ia te ia, a e peitai ia auauna o ia” (Mareko 10:45), o le a tatou sailia Lana fesoasoani i le auauna atu i isi i lea aso ma lea aso.
Ua sili atu le soifua ai o Peresitene Thomas S. Monson i lenei mataupu faavae nai lo se isi lava tagata ou te iloa. E i ai pea lava i lona loto se tatalo ia faaali mai e le Atua ni manaoga ma ni auala mo ia e fesoasoani ai ia i latou o siomia o ia i soo se aso po o se taimi o le aso. O se tasi o faataitaiga mai lona taimi a o avea ma se epikopo ua faaalia ai le mea moni e faapea, o nisi taimi e oo lava i se taumafaiga laitiiti e mafai, faatasi ai ma galuega a le Agaga, ona maua mai ai ni fua matagofie.
“O se tasi o i latou na aapa atu i ai [Peresitene Monson] o Harold Gallacher. Sa malolosi lona toalua ma lana fanau i le Ekalesia, ae sa le malosi Harold. Sa talosaga atu lona afafine o Sarona ia Epikopo Monson pe mafai ona ia ‘faia se mea’ e toe toaga mai ai lona tama. I le avea ai ma se epikopo, sa ia lagonaina le uunaia o ia i se tasi aso e alu atu ia Harold. Sa o se aso vevela o le taumafanafana na tuitui atu ai o ia i le faitotoa valavala a Harold. Sa mafai ona iloa atu e le epikopo o saofai mai Harold i lona nofoa, o loo ula lana tapaa ma faitau le nusipepa. ‘O ai lea?’ na fesili lē fiafia mai ai Harold, e aunoa ma le ea ae i luga.
“‘O lou epikopo,’ na tali atu ai Tom. ‘Ua ou sau ta te faamasani ma fautua atu tou te o atu ma lou aiga i a tatou fonotaga.’
“‘Leai, ou te pisi tele,’ o le tali inoino mai lea. Sa le’i tepa ae lava o ia i luga. Sa faafetai atu i ai Tom mo lona faalogo mai ma aluese loa mai le faasitepu o le faitotoa. Sa siitia ese le aiga e aunoa ma le auai atu o Harold i sauniga.
“O ni tausaga mulimuli ane … na telefoni atu ai Uso Gallacher i le ofisa o Elder Thomas S. Monson ma talosaga mo se avanoa la te feiloai ai.
“… Ina ua feiloai le toalua lea i se taimi mulimuli ane, sa la feopoai. Na fai atu Harold, ‘Ua ou sau e faatoese atu ona o lo’u le alu ese mai i lo’u nofoa ma avatu oe i totonu o le fale i lena aso o le taumafanafana i le tele o tausaga ua alu.’ Sa fesili atu Elder Monson ia te ia pe [ua] ia toaga i le Lotu. Sa tali atu Harold ma ataata: ‘Ua avea nei au ma fesoasoani lua i le au epikopo o le matou uarota. O lau valaaulia ou te sau i le lotu, ma la’u tali le lelei, sa faatalutaluā ia te au, o lea na ou naunau ai loa e fai se mea e uiga i ai.’”4
Faia o Filifiliga i Aso Taitasi
O le mafaufau i a tatou meaai o le aso tatou te nofouta ai i vaega auiliili o o tatou olaga, i le taua o mea laiti e alu ai o tatou aso. Ua aoao mai aafiaga e faapea, i se faaipoipoga, mo se faataitaiga, o le faifai pea o le agalelei faigofie, fesoasoani, ma le gauai atu e sili atu mea latou te faia i le faaolaolaina o le alofa ma le fafagaina o se mafutaga nai lo o se faatinoga maoae pe taugata e seasea ona faia.
E faapena foi, i filifiliga i aso uma, e mafai ona tatou puipuia ni faatosinaga matautia mai le ofi mai i o tatou olaga ma avea ai ma vaega o tagata tatou te i ai. I se talanoaga faasamasamanoa sa ma faia ma Elder Neal A. Maxwell (1926–2004) i ni tausaga ua mavae, sa ma matauina ai e mafai e se tasi ona aloese mai le tele o ponokalafi ma ata ponokalafi i le na o le faia o filifiliga sao. Mo le tele lava o itu, e na o se loto pulea ia le alu ai i nofoaga e maua ai ponokalafi—faaletino pe faaeletonika. Ae ui i lea, matou te iloa, ona ua matuai taatele, e mafai ai e ponokalafi ona osofaia faafuasei se tagata sa faia ni ana lava fuafuaga. “Ioe,” o le manatu lea o Elder Maxwell, “ae e mafai ona ia vave teenaina. E le tatau ona ia valaauliaina e sau i totonu ma ofo atu i ai se nofoa e saofai ai.”
E faapena foi i isi faatosinaga ma mausa faataumaoi. O lo tatou gauai atu i aso taitasi ina ia aloese i le taimi muamua lava o na mea e mafai ona puipuia ai i tatou mai le alafa’i mai i se aso o i luma ma le iloaina ona o le le mataala, ua mauaa ai se mea leaga po o ni vaivaiga i o tatou loto.
O le mea moni, e le tele ni mea i se aso e faapea e matuai leai lava se aoga. E oo lava i mea masani ma le fai faafia e itiiti ae o ni mea taua, ma o le aluga o taimi o le a atiina ae ai le amio pulea ma uiga ma le faatulagaga e manaomia e malamalama ai i a tatou fuafuaga ma miti. O le mea lea, a o e ole atu i le tatalo mo au mea e ai o le aso, ia mafaufau ma le totoa i ou manaoga—i mea atonu e te le o maua ma mea e tatau ona puipui mai ai oe. A o e sauni e moe, mafaufau i mea na faamanuiaina ma mea e lei faamanuiaina o le aso, ma mea o le a faaleleia teisi ai le aso o le a sosoo ai. Ma faafetai i lou Tama Faalelagi mo le manai na Ia tuuina i lou ala e tausi ai oe i le aso. O lou tomanatu o le a faateleina ai lou faatuatua ia te Ia a o e vaaia Lona aao o fesoasoani atu ia te oe e onosaia ai nisi o mea ma sui ai isi mea. O le a mafai ona e olioli i se isi aso se tasi, i se isi laasaga se tasi agai atu i le ola e faavavau.
Manatuaina o le Areto o le Ola
O le mea e sili i na mea uma, ia manatua ua i ai o Ia o le sa avea ma ituaiga ma faailoga o le manai, o le Togiola.
“O a’u o le areto o le ola.
“Na aai e o outou tama le manai i le vao, a ua oti i latou.
“O lenei le areto ua alu ifo mai le lagi, ai se ai ai ona le oti lea o ia.
“O a’u le areto ola na alu ifo mai le lagi: pe a ai se tasi i lenei areto ona ola ai lea o ia e faavavau: o le areto foi ou te avatua, o lo’u tino lea, ou te avatua ma ola o le lalolagi” (Ioane 6:48–51).
Ou te molimau atu i le soifua moni o le Areto o le Ola, o Iesu Keriso, ma le mana e le iu ma le o’oo’o o Lana Togiola. O le iuga, o Lana Togiola ma Lona alofa tunoa o la tatou mea e ai o le aso. E tatau ona tatou sailia o Ia i aso uma, e fai Lona finagalo i aso taitasi, ia tasi ai ma Ia e pei ona tasi o Ia ma le Tama (tagai i le Ioane 17:20–23). A o tatou faia faapea, tau ina foai mai e lo tatou Tama Faalelagi a tatou mea e ai o le aso.
Ata na tusia e Diane Hayden