Maauila ma Matagi Maatiati
C. Lee Bendixsen, Idaho, ISA
I se tasi aso ina ua uma la’u sifi i le Malumalu o Idaho Falls Idaho, sa ou ofo atu ai e momoli ni uso se toalua i le la taavale, sa pe i le auala i le itu i sasae o Idaho Falls, Idaho, ISA. Sa tutu atu i ai se ulugalii agalelei i lena aso malulu maatiati o Tesema ma aumai ia Uso Thompson ma Uso Clark i le mamao na totoe e oo mai ai i le malumalu.
Sa manatu lava Uso Thompson sa manaomia e lana taavale se maa fou. Sa ou aveina o ia e faatau mai se maa fou i se faleoloa o mea tautaavale na latalata ane, ma ona sa i ai a’u meafaigaluega i la’u taavale, o lea sa ou tali atu ai o le a ou suiina.
O le mea na laki ai, sa aumai sa’u pea totinilima fou ma lo’u ofumafanafana o le taumalulu. Sa ou susueina le tapuni o le afi o le taavale, ma ou sauni e aveese le maa ua pe ae sui atu i ai le maa fou.
Ina ia suia le maa, na tatau ona ou talaia ma aveese nisi o vaega o le taavale, e aofia ai le tanevai mo le fufuluina o le tioata tele pito i luma. E le’i leva ae ou iloa ai, na le fetaui a’u meafaigaluega i nati uma ae o nisi o faovilivili sa matuai le minoi lava. Sa ou faaaogaina ni meafaigaluega eseese ma taumafai i ni tulaga eseese, ae sa leai se mea na minoi. O le fua o le malulu o fafo sa tusa ma le 5 tikeri Farenehaite (-15°C), ma o loli tetele foi na fepasiai mai na afua ai ni savili malolosi sa matuai maatiati le malulu. Sa ou oo i se tulaga o le leai o se mea e toe mafaia ona o le maalili, ma le le fiafia.
Sa ou liliu atu i le fesoasoani e tasi na maua. Sa ou tatalo faatauanau, ma faamatala atu ou manaoga i le Tama Faalelagi ma ole atu pe mafai ona Ia faamatagatagaina nati ma faovilivili pe fesoasoani mai foi ia ou maua se auala e fai ai. O le uma ai o la’u tatalo, sa ou toe aumaia ai se palaea ma faaū loa i se faovilivili mau. Ua leva lava ona matagataga! Sa ou faailoa atu ma le filemu ma le naunautai le faafetai, a o ou aveeseina mai le faovilivili ma faaauau ai le galuega.
E lei umi ae ou tau i se nati faaoso ita, ma le ū e mamao i totonu o le taavale. O le toe taia foi, sa ou tatalo faatauanau atili ai mo se fesoasoani, ma sa faia ma le faateleina o lo’u faatuatua. O le taimi lenei, sa ou lagonaina le faatonuina o a’u e aveese muamua nisi o nati sa maualalo teisi atu ona mimilo ai lea o le taofi o le maa, o lea sa ou faia ai. Sa faigofie ona minoi le nati na mau. I se taimi e le’i umi, na ou aumaia ai i fafo le maa tuai.
Sa ou tuuina le maa fou i totonu ma faatasi ai ma ni tamailima na malo tiaa, sa ou toe tuufaatasia ai vaega uma i le lelei sa ou mafaia. Ona ou toe faapipiiina lea o uaea eletise. Sa ki e Uso Thompson le taalvae ma se ataata tele a o ola le afi o le taavale. Sa ou tapunia ma le agaga faafetai le tapuni o le afi o le taavale. Pe tusa ma se itula sa ou i ai i fafo, ma sa matuai malo tiaa o’u vae a o o’u taulaalaa faamalo atu i totonu o la’u taavale.
Sa ou mulimuli atu i le taavale a Uso Thompson ma Uso Clark e tau i le latou fale ina ia mautinoa ua taunuu saogalemu. A o aveina le taavale, sa ou lagonaina le manaia o le ea faamafanafana o la’u taavale, ma sa faasolosolo malie lava le mafanafana o o’u vae. Sa matuai ou faafetai i le Tama Faalelagi mo Lana fesoasoani. I lo’u toe foi mai sa faagaeetia au i le iloa sa Ia taliina talosaga a nei uso e ala i le auina atu o au e fai ma Ana auauna. I Lana ala matagofie sa Ia tali atu ai i o laua manaoga ma toefaamausaliina ai lo’u faatuatua.