O Seevae o Tamā
Priscilla Costa Xavier, São Paulo, Pasila
O ni nai tausaga ua mavae a o fesoasoani ou matua i le Aualofa e ilo nisi o lavalava, seevae, ma isi aitema e foai atu i e lima vaivai, sa matauina e lo’u tamā se pea seevae sa lelei ona tausia i le ogatotonu o se tasi o faaputuga. O le taimi lena, sa ia lagonaina ai se uunaiga malosi e tuu ma ia nei seevae.
Sa ata lo’u tina ma fai atu, “O le pea seevae lenei e faatoluina le laiti mo oe. E le taitai a ofi!”
Ae peitai, sa tauanau malosi atu pea lo’u tama. I le uma ai o nisi o tausuaga mai uso [o le Aualofa], sa iu loa ina latou faatagaina e tuu ma ia na seevae.
O le taimi lava sa taunuu atu ai o ia i le fale, sa ia faamamaina, faatumu i nusipepa, ma teu i totonu o se atigipusa i le pito i luga o lana kapoti lavalava. Sa faatonuina i matou ia aua nei o matou fetagofi i le atigipusa. E lima tausaga na taatia ai lava i lena nofoaga.
I se tasi aso na siitia mai ai se aiga fou i le fale na matou tuaoi. E toalua ni tamaiti ma se pepe e ono masina le matua. Sa vave ona ma faauo atu ma lo’u uso i le la fanau teine e toalua, o e na matou tupulaga. Sa ma faasoa atu i a maua uo fou mea na matou aoaoina i le lotu, ma sa ma valaauliaina i laua i le Peraimeri. Sa fiafia ma naunau i laua e aoao atili i mea na ma faamatala atu i ai.
Ina ua foi mai mai le Peraimeri, sa le’i uma lo laua talanoa i o la’ua matua e uiga i le Ekalesia. Ona valaaulia ai lea e o maua matua le aiga atoa e faalogologo i lesona a faifeautalai ma o mai i le lotu. Sa latou taliaina ma le fiafia. Sa latou fiafia i lesona, ma sa matou fiafia foi e o faatasi ma i latou i le lotu.
Peitai ina ua oo i le Aso Toonai, sa foliga lotovaivai le la fanau teine. Ina ua ma fesili atu pe o le a le mea na faaletonu, sa fai mai i laua, ua le toe mananao o laua matua e o i le lotu.
Sa ma faanoanoa ma fai atu ia Tama e talanoa i o laua matua. Ina ua ia ta’u atu i ai faamanuiaga o le o i le lotu, sa tali mai le tama, “Ioe, ua ou iloa uma lava mea na. Ae o le faafitauli ou te le’i seeina lava se isi ituaiga seevae e ese mai i o’u seevae taalo mo se taimi umi tele, ae ou te iloa e tatau ona matou o atu i sauniga Lotu i ni lavalava lelei.”
O le taimi lea, na tepa mai ai lo’u tama i lo’u tina. Sa ia iloaina lelei le mea e tatau ona fai. E fetaui lelei lava seevae o loo i le atigipusa i le pito i luga o le kapoti lavalava a Tama i le tama o a ma uo, ma sa o atu uma le aiga i le lotu. Sa o se Aso Sa matagofie mo i latou ma mo i matou foi. E lei leva ae avea i latou ma tagata o le Ekalesia, ma o le taimi nei o i latou o se aiga matagofie e faavavau.
Ou te iloa na maua e lo’u tama le taitaiga mai le Agaga Paia e teu na seevae. O se taunuuga, ua ou taumafai lava e le aunoa e saili Lana taitaiga i le vaavaai lea mo aiga ua saunia e faalogo i le talalelei. Ou te iloa ua Ia saunia ni aiga, ma ou te iloa e tatau ona tatou sailia i latou ma aumai ia Keriso.