Auaunaga i le Ekalesia
O Le Ala a le Alii e Taitai Ai
A o tatou auauna ma taitai i le ala ua faatonuina mai e le Alii, po o le a lava lo tatou valaauga, o le a tatou faamanuiaina isi ma faamanuiaina foi i tatou.
Ina ua tofia Uso Sione ma lona atalii o ni faiaoga o aiga i le auaiga o Viliamu, sa amata ona la faia ni asiasiga faalemasina. Na ala atu i na asiasiga, na iloa ai e Time, o se afafine o le aiga, sa alolofa i laua [faiaoga o aiga] ia te ia. Sa tele ni ana fesili sa i ai e uiga i le talalelei ma sa fiafia i a latou talanoaga ma i laua.
I se tasi taumafanafana a o taumafai Time ia iloa pe na i ai sana molimau, sa talosagaina ai Uso Sione, ma se isi alii na umia le Perisitua Mekisateko, e auai atu i le tolauapiga a Tamaitai Talavou. Sa fai mai mulimuli ane Time i le taua ia te ia o le i ai o lona faiaoga o aiga iina. Sa ia ta’u atu i lona aiga sa ia maua se molimau i le alofa o le Faaola mo ia, ina ua tuuina atu e Uso Sione ma le isi alii e umia le perisitua, ina ua ia talosagaina, sona faamanuiaga faaleperisitua i le tolauapiga.
O ona faiaoga o aiga na avea, i le agaga moni lava, o ni uo i le auaiga o Viliamu. Na taua la la’ua uunaiga ia Time ma ona matua—ma i le Alii.
Taitaiga ma Valaauga
I le lalolagi i aso nei, e masani ona fua le tuputupu ae patino o se tagata i tulaga tofi e faateleina pea i galuega, pe e ala i le siitaga o totogi lea e faailoa ai le faateleina o mea e ausia e le tagata lava ia. E masani ona tatou vaai i tulaga tofi e iloagofie o se faailoaga o le tagata o se tagata fai saofaga taua. E le o se mea la e faateia ai le toatele o tagata e tauivi ia iloa le auala e sili ona lelei e fua ai lo latou tuputupu ae i mea faaleagaga.
Ua ou faalogo i le toatele o le Au Paia o Aso e Gata Ai o fesiligia o latou lava tulaga ona e le’i valaauina i latou i ni tofiga faaleautaitai i le Ekalesia. Ae pe o fuaina lelei ea lo tatou alualu i luma i valaauga faaleautaitai?
O le mea moni, o le taitaiga e le manaomia ai se valaauga. O nisi o tagata o e faaaogaina uunaiga faagaeetia ma faamalosiau e faavae ai taitaiga moni, e faia lea ma le leai o se valaauga po o se tofiga. O loo aoao mai i le Mataupu Faavae ma Feagaiga 121 nisi o lesona taua e uiga i le tulaga faaletaitaiga:
“Ua tatou aoao e ala i mea faanoanoa e tutupu mai e faapea o le natura ma le uiga o le toeitiiti lava o tagata uma, o le vave lava latou te maua ai sina pule itiiti, e pei lava ona latou manatu i ai, e vave lava ona latou faaaogaina o le puleaga amioletonu.
“O lena e toatele ai e e valaaulia, ae toaitiiti e ua filifilia.
“E leai se mana po o se aafiaga e mafai pe tatau ona faatumauina ona o le perisitua, nao i le faatauanau, i le tali-tiga, i le agamaualalo ma le agamalu, ma le alofa faamaoni;
“I le agalelei, ma le malamalama manino, lea o le a faalautele tele ai le agaga e aunoa ma le pepelo, ma aunoa ma le faa’ole’ole” (fuaiupu 39–42).
E masani ona fenumia’i le taitaiga ma le ta’u atu i tagata o le mea e fai. O lena mea e mafai ona oo atu ai i puleaga amioletonu. O le a le talafeagai le faapea atu, “E tatau ona e faia le mea ou te fai atu ai aua ua ou (umia le perisitua pe ua valaauina e ala i le perisitua) fai atu ai.” O se lesona taua i le vaega e 121 e faapea, o se taitai moni e le tuuina atu le taitaiga ma faamoemoe ia mulimulitaia ona o le tofiga. Ae, o le taitaiga faaleperisitua e faatatau i le valaaulia. O se valaaulia agalelei, e faavae i le malamalama mama ma le alofa moni, o le a avea ma se faaosofiaga sili atu nai lo o le “Ona ua ou fai atu ai.”
E moni o taitai o e matele i le tuuina atu o faatonuga e tele ni mea e mafai ona faia ai. Peitai latou te le o taitai i le ala ua faaalia mai e le Alii. Ma latou te le o atiina ae le malosi e faalagolago ai le tagata ia te ia lava ma le talitonuga lea e tatau ona i ai ia i latou o loo latou taitaia.
Taitaiga Moni
Ia matau o se valaauga po o se tulaga e pule ai e le o lisiina i fuaiupu e 41 po o le 42 o se tasi o auala talafeagai e faaaoga ai le pule po o faamalosiauga. Ae, o le pule ma faamalosiauga a se taitai moni e faaaogaina e ala i le faatauanau, tali-tiga, agamaualalo, agamalu, ma le alofa faamaoni, agalelei, ma le malamalama manino. O uiga nei o le taitaiga moni e mafai ona faaalia e tagata uma, e tusa lava po o le a le valaauga po o le tulaga.
O valaauga faaletaitai e pei uma lava o ni pa’u e i autafa o se uila. O pa’u i autafa o se uila e mafai ai e se tamaitiiti ona aoao i auala e faapaleni ai ma tietie ai ma le to’a lelei. O se valaauga faaletaitai e tuu ai tagata i se tulaga e aoao ai ia alofa, ia onosai, ma faatauanau atu e ala i le malamalama manino ma le agalelei. E mafai foi ona latou iloa o soo se taumafaiga lava e faamalosi se amioga, e o faatasi ma le aveesea ai o le Agaga ma faaitiitia ai le ta’uaogaina.
A uma ona faamalolo i tatou, o le a tatou iloa ai pe na tatou tuputupu ae ma aoaoina a o tatou i ai i lo tatou valaauga. Pe na tatou aoao ea ia alofa ma auauna atu i isi e aunoa ma le valaauga e uuna’i ai? Pe na tatou aoaoina ea ia auauna atu ma le mana o se faatosinaga mo le lelei ona o tagata ua avea ai i tatou?
O le a valaau mai pea lava pea le Alii ia i tatou i o tatou olaga. Na te silafia o tatou loto. O le a Ia valaau mai ia i tatou pe a Ia manaomia o tatou tomai faapitoa, atamai, po o le mataala i le Agaga. O le a Ia valaau ia i tatou e tusa ai ma lo tatou naunautai e faalogo i Lona siufofoga ma alofa atu e pei ona Ia alofa mai.
A tatou iloa ona avea ma se faatosinaga mo le lelei i le ala a le Alii, o le a avea i tatou ma tagata o e siitia isi aua o tagata na e i ai i tatou. O le a le avea valaauga ma pogai autu mo a tatou faatosinga lelei. Ae, pe a talosagaina ai, o le a tatou tautua lelei i mea e tofia i ai i tatou i le Ekalesia.
Pe tatou te auauna atu i le Aoga Sa po o polokalama a le autalavou, o se faiaoga o aiga po o se faiaoga asiasi, po o se epikopo foi po o se peresitene o le Aualofa, o la tatou auaunaga i isi o le a avea o se faaaliga o lo tatou alofa i le Faaola. A o tatou auauna atu ma taitai i le ala ua Ia faasino mai, po o le a lava lo tatou valaauga, o le a faapea ona tatou faamanuia atu ma faamanuiaina ai foi.
O le ata e le mafai ona kopiina