Faasilasilaina o le Autu o le Mutuale mo le 2012: “Tutulai Ia ma Susulu Atu”

O le autu o le Mutuale mo le 2012 o le “Tutulai ia ma susulu atu, ina ia avea lo outou malamalama ma tagavai mo atunuu” (Mataupu Faavae ma Feagaiga 115:5).

O lenei mau, na tuuina mai o se vaega o se faaaliga i le Perofeta o Iosefa Samita i Sisifo Mamao, Misuri, ISA, i le 1838, sa faatatau i taitai pulefaamalumalu o le Ekalesia i lena vaitaimi, ae i le avea ai ma autu o le Mutuale, ua faatatau foi i le autalavou o le vaitausaga 12 i le 18 i le Ekalesia atoa.

E mafai ona faaaoga le autu e faatamaoaiga ai sauniga amata o le Mutuale, o se autu mo tautalaga a le autalavou mo le sauniga faamanatuga, ma ia tuuina atu ai se taulaiga mo gaoioiga a le autalavou e pei o tolauapiga, konafesi a le autalavou, ma faigalotu. E mafai foi ona faaaoga e avea ma taulaiga o gaoioiga faapitoa faaleaganuu ma isi gaoioiga o siva, musika, ma tala faatino.

Ua fautuaina e taitai o le Ekalesia ia faalauiloa atu e taitai o le autalavou i le lotoifale le autu i se DVD, Strength of Youth Media 2012: Arise and Shine Forth, lea o le a auina atu i iunite ia Novema 2011.

O lenei DVD e mafai ona faaaogaina e faaopoopo atu i fonotaga a korama, vasega, ma konafesi a le autalavou, ma isi gaoioiga a le autalavou i le aluga o le tausaga, ma o le a maua i gagana Kenitonisia, Peretania, Farani, Siamani, Italia, Sapani, Korea, Meniterini, Potukale, Rusia, ma le Sipaniolo.

O le a maua isi anomea faaopoopo e lagolago atu ai i le mekasini o le Liahona ma le New Era ma i le LDS.org i le amataga o le 2012.