I Tala Fou
Ua Oo Mai le Initoneti i Falelotu i le Lalolagi Atoa
Ua fuafua le Ekalesia ia maua i le 85 pasene o falelotu i le lalolagi atoa le Initoneti e maualuga lona televave, ma filifili ai pe faaaoga se initoneti e leai ni uaea e fetosoai ai.
O le a mafai e le au paia ona maua le saite o galuega a le Ekalesia ma auai i galuega o talafaasolopito o aiga mai o latou falelotu; o le a mafai foi e taitai o le Ekalesia ona vaaia faamaumauga, auina atu talosaga a faifeautalai, ma auai i faasalalauga faaleaoaoga mo taitai; ma o le a mafai ona faaaoga e faiaoga ia ala o faasalalauga i le initoneti e gaosia e le Ekalesia e faaopoopo atu i a latou lesona.
Ua Tuuina Atu e le Ekalesia le Fesoasoani i le Oge i Aferika i Sasae
Faatasi ai ma le silia i le 11.5 miliona tagata i Aferika i Sasae o loo matuai manaomia le fesoasoani i le ogaoga o tulaga o le lamala, ua galulue ai le Ekalesia ma ni faalapotopotoga eseese e ofo atu le toomaga mo le oge e ala i taumafa, vailaau faafomai, sapalai mo le tausiga o le tumama, ma malutaga.
O tagata o le au paia o e fia fesoasoani atu i le taumafaiga e mafai ona foai atu i le tupe mo fesoasoani alofa.
Aoaoga Fou mo Faifeautalai i Totonu o le Misiona ua Faalauteleina ai le Poto Masani i le NAF
O se taumafaiga na amataina ia Aokuso 2011 ua aumaia ai se isi 12 vaiaso faaopoopo o aoaoga faamasani i faifeautalai o e ua faatoa tuua le nofoaga autu e aoao ai faifeautalai.
Na faamalamalama mai e Richard Heaton, o le faatonu o le NAF i Provo e faapea, o le aoaoga faamasani i totonu o le misiona e le o se polokalama fou, ae o se faaopoopoga o aoaoga faamasani e maua e faifeautalai i le NAF.
“O Le [tusilesona] o le 12 Vaiaso Muamua o loo faasino atu ai soa taitai ma a latou soa faifeautalai fou i punaoa o loo i le Tala’i La’u Talalelei lea e sili ona latou manaomia i o latou vaiaso muamua e 12,” o lana faamatalaga lea. “O se faafanua o le auala e … galulue atoatoa ai o ni auauna a le Atua i le vave e mafai ai.”
E amata faaaogaina e toetoe lava o le taimi lena e peresitene o misiona ia mea e faaaoga mo le aoaoina o faifeautalai fou ua i le misiona—lea e aofia ai ni pepa o faamatalaga se tolu mo aoaoga faamasani ma ni vaega fou o vitio e suesue ai se soa.