Na Auai le Au Paia i Pasila, Malo Aufaatasi i Aso o Auaunaga

Talu lava ona valaaulia e le Au Peresitene Sili ia tagata uma o le Ekalesia ia Aperila na te’a nei, ia auai i se aso o auaunaga i le tausaga a sau, ua faapea ona tali atu i ai le Au Paia i le salafa o le lalolagi. I ni atunuu se lua, o iunite—o le Malo Aufaatasi ma Pasila—na auai i se taumafaiga tuufaatasi ma isi tagata o le ekalesia i totonu o o laua atunuu.

Malo Aufaatasi

I le Aso Gafua, 5 Setema, 2011, sa faatasitasi ai le au paia mai siteki e 11 o Egelani, faatasi ai ma le Peresitene o le Eria o Erich W. Kopischke o le Au Fitugafulu, mo se galuega faatino o Lima Fesoasoani i Tottenham Marshes.

O le fuafuaga sa faailogaina ai e le gata o le 75 tausaga o le polokalama uelefea a le Ekalesia ae faapea foi le toe faalauiloaina aloaia o le Faatosinaga i le 2011 a Lonetona mo le Faamamaina o le Laumua. E lima itula, na faatasi ai le au paia—ma le ofisa o le pulenuu—i le veleina, faiga o togalaau, tataina o fafie, faagata pupulaau ua ola tetele, ma taalao le otatoa mai le Paka o Lee Valley.

O le aso lava foi lena na auai ai tagata o le au paia i isi eria o Lonetona i galuega faatino o Lima Fesoasoani i Fale e Tausi ai Tamaiti i le Maota i Haven ma le Maota i Richard.

I le Maota i Richard, e toa 18 tagata o le au paia o le Uarota a Stratford sa valiina se avanoa mo se ofisa, veleina, salaina o laauiti, salu le malae, ma faaleleia ni meafaigaluega. O le taimi muamua lenei ua fesootai ai le maota e tausi ai tamaiti ma le Ekalesia, o le faamatalaga lea a Charlotte Illera, o le pule o galuega faatino mo le galuega faatino i le Maota i Richard.

“Sa faagaeetia au i le ala na fai ai e volenitia la latou galuega ma le naunautai ma le fiafia,” o lana tala lea. “E oo lava i se galuega faigofie e pei o le saluina o se auala sa faia lava i le mea na gata ai le lelei.”

I le aluga o nai masina ua mavae atu, sa faatulagaina ai ma auai tagata o le Ekalesia i Peretania Tele ma Aialani i Matu i nisi o galuega fesoasoani i le atunuu atoa.

Pasila

I le aso 30 o Iulai, 2011, sa avea taoofu sasama ma se vaaiga taatele i le faitau selau o galuega fesoasoani i Pasila e faamanatu ai le 12 tausaga o Mamona Lima Fesoasoani, o se polokalama a Le Ekalesia a Iesu Keriso o le Au Paia o Aso e Gata Ai, e saili e tuuina atu ni auaunaga i le lotoifale ma toomaga mo faalavelave faafuasei ia i latou e lima vaivai.

O Mamona Lima Fesoasoani (Mãos que Ajudam) na afua muamua mai i Pasila o se auala e faamasani ai uo ma tuaoi i taumafaiga o fesoasoani alofa a le Ekalesia. Ua faapea ona avea nei ma se fuafuaga taua faaletausaga.

O le aso o auaunaga i le tausaga lenei sa faatumulia i pesega, taliega, ma le patipati faamālō a o galulue le 120,000 o alii, tamaitai, ma tamaiti i le saluina o auala, faamamaina o aoga, toe fauina o fale, faamatagofieina o paka, ma le auai i isi galuega fesoasoani i le atunuu aupito tele ma sili ona toatele ona tagata i Amerika Latina. Sa auai faatasi tagata o le Ekalesia ma tagata i le lotoifale e tuuina atu le auaunaga o le a faamanuiaina ai tagata uma.

I Belo Horizonte, Recife, ma Bahia, e sili atu ma le 6,000 volenitia na faatasitasi e tetee atu i le fiva po o le faama’i e feaveai e namu [dengue fever]. I Rio de Janeiro, sa faamamaina ai e volenitia ia faleaoga a le malo ma fale e vaai ai tamaiti laiti. I Porto Alegre, e 1,500 volenitia, na faamamaina faleaoga, ae auai isi i aoaoga e faatatau i le puipuiga mai le faaaogaina o fualaau faasaina.

I le lua masina a o lei oo i le aso o le galuega fesoasoani, e silia ma le 50 volenitia na galulue e ao mai taumafa sa foai mai, lea na tuuina atu i aiga lima vaivai e 175 i São Jose i le aso 30 o Iulai.

Sa foai atu e tagata o le Ekalesia i Blumenau le tusa ma le 300 pauna (136 kg) o taumafa i le Casa de Apoio às Crianças Portadoras de Mielomeningocele e Neoplasia (Maota e Fesoasoani i Tamaiti e Afaina Maeaalio ma Gasegase o le Tuma). Na aoao atu foi e volenitia i le faalapotopotoga ia mataupu faavae autu mo le teuina o meaai.

“O auala ua matou aoaoina o le a fesoasoani ia i matou e teuina ai meaai i le potu e teu ai a matou meaai, ona o le tele o a matou meaai e faaleagaina ona o le susu o le siosiomaga,” o le tala lea a Adriane J. Backes Ruoff o se tagata faigaluega mo tagata lautele.

Faamatalaga a le Faatonu: Faasoa mai lou aafiaga o le Aso o Auaunaga i le LDS.org/service/welfare-75th-anniversary.

E silia ma le 11 siteki mai Egelani na auai faatasi i le aso 5 o Setema, 2011, e faatino ni galuega fesoasoani i ni eria eseese se tolu i totonu ma faataamilo i Lonetona.

Ata mai faaaloaloga a lindsey phillips