Ia Avea ma se Faataitaiga Susulu
Alii talavou o le Ekalesia—tiakono, aoao, ma ositaulaga o le Perisitua Arona matagofie—ua outou tauaveina i o outou luga le suafa o le Faaola; ua outou tauaveina Lona perisitua paia; ua valaauina outou e fai Lana galuega ma faamanuia ai i latou uma e iloa outou. O le taimi lenei mo outou e faataunuu ai o outou tiute o le perisitua ma “susulu atu” o se “tagavai mo atunuu” (MF&F 115:5).
O le taimi lenei ia “faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi” (Mataio 5:16). O Iesu Keriso o le faataitaiga atoatoa lea. Taumafai ia iloa o Ia, mulimuli ia te Ia, ma avea atili e faapei o Ia e ala i le usitaia o Ana poloaiga ma le tausia o tulaga faatonuina o le Ekalesia e pei ona faamatalaina i le Mo le Malosi o le Autalavou. A o outou faia, o le a avea outou ma malosiaga susulu o le malosi faaleagaga ia i latou e siomia outou.
Na fetalai le Alii, “Ia mama outou o e e tauaveina ipu a le Alii” (MF&F 133:5). O lo outou amio mama o le a mafai ai ona outou susulu atu o se malamalama faapitoa i tagata o o outou uarota po o paranesi, a o outou fai ma sui agavaa o le Faaola i le tuuina atu o le faamanatuga paia ia i latou i Aso Sa taitasi.
Ia vaavaai ma puemau mai avanoa i aso uma e auauna atu ai i ou aiga, uo, tagata o le korama, ma isi. O le a avea outou ma auauna mataina o le malamalama ia i latou ma e e matauina le leoa outou.
Ia susulu atu i faauoga faamaoni ma agalelei i tagata uma. Faasoa atu faamanuiaga matagofie o gaoioiga a le Ekalesia ma aoaoga o le talalelei i a outou uo. Ia lototele ma valaaulia i latou e o mai i le Malamalama ma le Ola o le Lalolagi—o Iesu Keriso lea.
Matou te alolofa ia te outou. Matou te tatalo mo outou. Matou te molimau atu e alofa le Alii ia te outou ma e manaomia outou e fesoasoani e fausia Lona malo. O le taimi lenei mo outou e “tutulai ai ma susulu atu” o e ua umia Lana perisitua paia. A o outou faalauteleina lenei perisitua ma faataunuu lou tiute i le Atua, o le a avea lou malamalama “ma tagavai mo atunuu.”