Mai le Misiona
Na Tali le Atua i Tatalo Uma e Lua
A o ou auauna atu o se faifeautalai i Durango, Mekisiko, na luiina le matou misiona e le matou peresitene misiona e faataitai se “vaiaso o le ositaulaga.” Sa ia talosagaina i matou e tuuina atu se taumafaiga faaopoopo nai lo le mea na masani ai e ala i le galulue malosi ma le setiina o sini patino i le aluga o le vaiaso. Sa ma faatuatua ma la’u soa afai ma te ositaulaga i lenei faiga, o le a faamanuia i maua e le Alii, ma o le a ma maua ni tagata se toatele e aoao.
Peitai, i le aluga o le vaiaso o le ositaulaga, sa le’i tele se tulaga manuia. Ma te le’i maua ni aiga e aoao, ma sa ma le fiafia.
I se tasi taeao na sosoo ai mai i lena vaiaso, sa ma tilotilo ai ma la’u soa i le faafanua o le ma eria. Sa tele tele le ma eria, ae sa ma lagonaina na tatau ona ma o atu i le vaega na aupito mamao ese.
Ina ua ma taunuu atu iina, sa ma tatalo ma ole atu i le Tama Faalelagi po o le fea auala ae o le fea le fale ma te o i ai. Ina ua uma le ma tatalo, sa ma liliu loa e autilo atu i auala uma. Sa ma vaaia se pa e le’i mamao atu ma tuufalo atu ai i luga. Sa ma vaaia ai se tamaitai o saofai ma moeiini ona mata, ma se salu na uu i ona lima.
Sa fai atu la’u soa, “Talofa!” ma ina ua faalogo mai le tamaitai ia i maua, sa tu ae i luga ma faaauau lana saluga otaota e pei lava na leai se mea na tupu. Ona ma fai atu lea o i maua o faifeautalai mai le Ekalesia a Iesu Keriso o le Au Paia o Aso e Gata Ai, ma sa ia i maua se savali mo ia. Sa ia faatagaina i maua i totonu o lona fale, ma sa matou faia ai se lesona na sili ona faaleagaga. Sa ma ta’u atu ia te ia e uiga ia Iosefa Samita ma le ala na ia alu atu ai i le togavao e tatalo e saili ai le mea moni, ma o le tali i lana tatalo, na faaali mai ai le Atua le Tama ma Iesu Keriso ia te ia.
Sa faasalavei mai o ia ma fai mai, “E sa’o le mea lena. Ou te iloa e tali mai le Atua i a tatou tatalo. A o oulua talanoa mai ia te a’u, sa ou tatalo ma ole atu i le Alii e auina mai se tagata e mafai ona taitaia au i Lona ala, ma sa vave ona oulua oo mai.”
Sa ma lagonaina le Agaga, ma sa ma molimau atu na auina atu e le Alii i maua ia te ia, ma sa ma’ua tatalo foi i le taimi lena ia iloa po o le fea o ana fanau na manaomia le ma fesoasoani. E le’i leva ae papatisoina loa Tuafafine Rufina. I vaiaso na mulimuli ane ai, na papatisoina ai lana fanau, fanau a lana fanau, faapea foi ma nisi o ona tuaoi—o se aofaiga atoa e 20 o tagata liliu mai i lena vaega o le ma eria. Sa taitaiina atu i maua e le Alii ia Tuafafine Rufina, ma sa avea o ia ma faitotoa i le faasoaina atu o le talalelei i lona aiga ma tuaoi.
Ou te iloa e faamanuiaina i tatou e le Tama Faalelagi pe a tatou ole atu ia te Ia, ae le seiiloga e uma ona Ia tofotofoina o tatou faatuatua. Ou te faafetai ona sa mafai ona avea i ma’ua ma la’u soa o ni meafaigaluega i aao o le Alii ma maua mai ai tagata o e na saunia e faalogo i le savali o le talalelei. Ou te iloa e alofa le Atua ia i tatou ma o le a taialaina i tatou pe afai tatou te ole atu.
ata na tusia e Dilleen Marsh