Pe o i ai ni agelu o le puipuiga? Pe o i ai se agelu o le puipuiga ua tofia mo a’u?

O le faaupuga “agelu o le puipuiga” e le o faaaogaina i tusitusiga paia; ae, o agelu o loo taua e faapea e “auauna” (tagai i le Ominae 1:25; Moronae 7:22–29). “E tautatala agelu i le mana o le Agaga Paia” (2 Nifae 32:3) ma e masani ona soosoo tauau i le misiona a le Agaga Paia e faamafanafana, taiala, puipui ē faamaoni, ma faaali mai pe faamautinoa mai le mea moni. O lea la, o le Agaga Paia lava Ia e mafai ona ta’ua o se agelu o le puipuiga.

Na aoao mai Elder Jeffrey R. Holland o le Korama a Aposetolo e Toasefululua: “Mai lava i le amataga seia oo mai i le auga tisipenisione, sa faaaoga lava e le Atua ia agelu … e faailoa mai ai Lona alofa ma le popolega mo Ana fanau. … Ae pe vaaia pe le vaaia, e latalata mai lava i taimi uma” (“O Le Auaunaga a Agelu,” Liahona, Nov. 2008, 29).

E le’i faaalia mai e le Alii pe ua tofia se agelu faapitoa se toatasi e vaaia tagata taitoatasi, ae e mafai ona e mautinoa e i ai le puipuiga ma le faamafanafanaga faalelagi. Afai e faaaoga lou faatuatua, o le a e maua le fesoasoani a le Atua, e aofia ai agelu e auina mai e faamalosia ma faamafanafana oe ma tuuina atu ia te oe le lototele e fai ai le mea sao.