Aisea ua malosi ai le uunaiga i alii talavou e o e fai se misiona? Pe le o se filifiliga ea lea a le tagata lava ia?

O le filifiliga patino a alii talavou taitoatasi e ao ona fai o le, pe alu pe leai e faataunuu lona tiute faaleperisitua o le auauna atu i se misiona. E pei ona sa saunoa Peresitene Thomas S. Monson: “O alii talavou agavaa uma lava, malolosi e tatau ona saunia e auauna atu i se misiona. O le galuega faafaifeautalai o se tiute faaleperisitua—o se matafaioi ua faamoemoeina e le Alii mai ia i tatou ua tele naua mea ua tuuina mai i ai. Alii talavou, ou te apoapoai atu ia te outou, ia saunia mo le galuega faafaifeautalai.” (“A o Tatou Toe Potopoto Faatasi Ai,” Liahona, Nov. 2010, 5–6).

O le saunia mo se misiona o se vaega o le aafiaga o le Perisitua Arona o se alii talavou. O lona tiute lea, ma e tatau ona ia lagonaina le mamafa talafeagai o lena tiute. Ioe, e le tatau ona ia faia se misiona i le na o le faapea o se mea ua faamoemoeina mai ia te ia, pe ona o lona lagonaina o le uunai malosi; e tatau ona ia auauna atu aua na te naunau e faasoa atu le talalelei toefuataiina a Iesu Keriso i isi.

Peitai a o tatalo o ia e uiga i le faia o se misiona, e tatau foi ona ia manatua o le mauaina o le perisitua, ua ia taliaina ai le tiutetauave paia e “lapatai atu, faamalamalama atu, apoapoai atu, aoao atu, ma valaau atu i tagata uma ia o mai ia Keriso” (MF&F 20:59), e aofia ai le auauna atu o se faifeautalai faamisiona. Afai e le mafai e alii talavou ona auauna atu ona o le faaletonu o le soifua maloloina po o se le atoatoa o le malosi, e tuusaunoaina i latou ma le mamalu.