Kalingawan ug Media

Ang atong katilingban puno og mga kapilian sa media. Kita kinahanglang magbantay sa mga imahe ug panghunahuna nga atong gihunahuna kay “kon unsay [atong] mabasa, madungog, o makita adunay epekto ngari [kanato]” (Alang sa Kalig-on sa mga Kabatan-onan [booklet, 2011], 11). Si Adrian Ochoa, ikaduhang magtatambag sa kinatibuk-ang kapangulohan sa Young Men, nagsulat kabahin sa kalingawan ug media sa pahina 48 niini nga isyu.

“Hinumdumi nga sa pagkatinuod ania kamo niini nga kinabuhi aron sa pagpalambo og hugot nga pagtuo, aron sulayan, ug aron makat-on ug magmalipayon,” siya nagsulat. “Isip usa ka miyembro sa tinuod nga Simbahan ni Kristo, kamo adunay dakong gahum nga motabang kaninyo. Kamo adunay gahum sa Espiritu Santo sa pagpasidaan ninyo kon ang inyong giatubang dili eksakto. Kamo usab adunay gahum sa kabubut-on, mao nga kamo makapili unsay inyong buhaton o dili buhaton.”

Mga Sugyot sa Pagtudlo sa mga Batan-on

Paghisgut uban sa inyong mga batan-on sa mga salida nga tan-awon isip pamilya. Pagpaminaw sa ilang musika. Paghisgut uban kanila sa unsang paagi kana nga media nahisubay sa mga baruganan diha Alang sa Kalig-on sa mga Kabatan-onan.
Pag-adto sa youth.lds.org ug i-klik ang “For the Strength of Youth” ubos sa Youth Menu. Didto makakita mo og mga video, kapanguhaan sa kasulatan, programa sa radyo sa Mormon Channel, mga pangutana ug tubag, ug artikulo (tan-awa, sama pananglit, “Getting Real”), lakip ang mga pakigpulong sa mga General Authority.
Pagkonsiderar nga mag-family home evening sa kaimportante sa pagpili og maayo nga media (ang nindot nga kapanguhaan mao ang David A. Bednar, “Mga Butang Ingon nga Sila Gayud Mao,” Liahona, Hunyo 2010, 22–31.

Mga Sugyot sa Pagtudlo sa mga Bata

Sa istorya sa “Ang Lagda sa Paggrado,” nga makita sa pahina 70, si Ethan nasayud nga ang media luwas lang niyang gamiton kay ang iyang pamilya naghisgut ini. Mahimo ninyong basahon kini nga artikulo uban sa inyong mga anak ug magsugod sa kaugalingon ninyong panaghigsut gamit ining mga pangutanaha:

Kinsa ang makatabang nato nga makahimo og maayong desisyon sa media ug kalingawan?
Unsa nga media ang maayong tan-awon, basahon, o paminawon?
Kanus-a ang media OK nga gamiton?
Asa ta angayng mogamit og media?
Nganong importante nga magmabinantayon kabahin sa kalingawan?

Pagkonsiderar sa paghimo og family media guide pinaagi sa pagpilo sa blangko nga papel ug i-staple kini sa tunga aron mapormang booklet. Sa kada pahina, isulat ang matang sa media nga inyong gigamit sa balay, uban sa mga baruganan sa pamilya ug propetikanhong tambag nga magamit kabahin niini nga media.

Mahimo usab ninyong basahon ang “Dali-daling Palungon ug Isumbong” ni Danielle Kennington (Liahona, Hunyo 2011, 64) sa pagtabang kaninyo sa pagsugod og hisgut sa hustong media nga gamiton.

Paghulagway pinaagi ni Taia Morley