Mga Butang Ingon nga Sila Gayud Mao

Hunyo 2010

Mga Butang Ingon nga Sila Gayud Mao

Ni Elder David A. Bednar

Sa Korum sa Napulog Duha ka mga Apostoles

Gikan sa usa ka pakigpulong sa Church Educational Fireside nga gihatag sa Brigham Young University–Idaho niadtong Mayo 3, 2009.

Mopalanog ko og usa ka tingog sa pasidaan sa pagka-apostol kabahin sa makapatuok nga epekto sa paggamit sa Internet ug mga kasinatian diha sa atong mga kalag.

Samtang naghinam-hinam ug nangandam ako alang niining kahigayunan sa pagkat-on uban kaninyo, mas nakasabut ako sa kusog nga mga pagbati ni Jacob, ang igsoong lalaki ni Nephi. Miingon siya, “Ako niining adlawa gibug-atan uban sa dakong … tinguha ug kabalaka alang sa kaayohan sa inyong mga kalag” (Jacob 2:3). Ang mensahe nga gusto nakong ipagkigbahin uban kaninyo karon anaa kanunay sa akong “kalag ingon sa mga yamog nga gikan sa langit” (D&CP 121:45). Modapit ako kaninyo sa inyong madasigong atensyon sa usa ka seryuso nga hilisgutan nga may kalabutan diha-diha dayon ug mahangturon. Nag-ampo ako nga ang Espiritu Santo maanaa ug magtudlo sa matag usa kanato panahon sa atong panag-uban karon.

Dugay na akong nadani sa usa ka yano ug klaro nga kahulugan sa kamatuoran nga anaa sa Basahon ni Mormon: “Ang Espritu namulong sa kamatuoran ug dili mamakak. Busa, kini namulong sa mga butang ingon nga sila gayud mao, ug sa mga butang ingon nga sila gayud mamahimo unya; busa, kini nga mga butang gipakita ngari kanato sa yano nga paagi, alang sa kaluwasan sa atong mga kalag” (Jacob 4:13; tan-awa usab sa D&P 93:24).

Motutok kita sa unang labing importante nga elemento sa kamatuoran nga naila niini nga bersikulo: “mga butang ingon nga sila gayud mao.” Magribyu una kita sa pipila ka importanting elemento sa plano sa kalipay sa atong Langitnong Amahan isip pundasyon sa doktrina sa pagkasayud ug pagsabut sa mga butang ingon nga sila gayud mao. Ikonsiderar dayon nato ang mga pamaagi sa pag-atake nga gigamit sa kaaway aron sa pagsamok kanato o sa pagpugong kanato sa pag-ila sa mga butang ingon nga sila gayud mao. Ug sa katapusan, maghisgut kita sa mga responsibilidad nga anaa sa bag-o nga kaliwatan. Kinahanglan kamong magmasulundon, motahud sa sagradong mga pakigsaad, ug makiala kanunay sa mga butang ingon nga sila gayud mao nga anaa sa kalibutan karon, nga nagkaanam ka libug ug ka dautan.

Ang Atong Walay Katapusan nga Kapalaran

Sa “Ang Banay: Usa ka Pamahayag ngadto sa Kalibutan,” gipahayag sa Unang Kapangulohan ug Konseho sa Napulog Duha ka mga Apostoles nga isip espiritu nga anak nga mga lalaki ug mga babaye sa Dios, atong “gidawat ang Iyang plano nga naghatag og higayon sa Iyang mga anak nga makaangkon og pisikal nga lawas ug makaangkon ug yutan-on nga kasinatian sa paglambo ngadto sa kahingpitan ug sa katapusan makakab-ot sa [atong] walay katapusan nga kapalaran ingon nga mga manununod sa kinabuhing dayon.”¹ Palihug hibaloi ang kaimportante sa pag-angkon og pisikal nga lawas diha sa proseso sa paglambo padulong sa atong walay katapusan nga kapalaran.

Klarong nagtudlo si Propeta Joseph Smith sa kaimportante sa atong pisikal nga lawas:

“Kita mianhi dinhi sa yuta aron kita makaangkon og lawas ug dad-on kini nga putli sa atubangan sa Dios sa celestial nga gingharian. Ang mahinungdanong baruganan sa ebanghelyo naglangkob sa pag-angkon og usa ka lawas. Ang yawa walay lawas, ug kini mao ang iyang silot. Siya malipay kon makaangkon siya og tabernakulo sa tawo, ug sa diha nga gihinginlan sa Manluluwas siya mihangyo sa pag-adto sa panon sa mga baboy, nagpakita nga mipili siya sa lawas sa baboy kay sa wala. Ang tanang mga tawo kinsa adunay mga lawas adunay gahum niadtong wala. …

“Ang yawa walay gahum ibabaw kanato gawas lamang kon ato siyang tugutan; sa higayon nga kita mobatok sa bisan unsang butang nga nagagikan sa Dios, ang yawa makagahum.”²

Ang atong pisikal nga lawas naghimong posible alang sa lain-lain, lawom, ug daghan gayud nga mga kasinatian nga dili mahimo sa atong kinabuhi sa wala pa dinhi sa yuta. Si Presidente Boyd K. Packer, Presidente sa Korum sa Napulog Duha ka mga Apostoles, mitudlo, “Ang atong espiritu ug ang atong lawas gihiusa sa usa ka paagi nga ang atong lawas nahimong instrumento sa atong hunahuna ug pundasyon sa atong kinaiya.”³ Mao nga, ang atong relasyon sa ubang mga tawo, ang atong kapasidad sa pag-ila ug pagbuhat sumala sa kamatuoran, ang atong abilidad sa pagsunod sa mga baruganan ug mga ordinansa sa ebanghelyo ni Jesukristo napalapad pinaagi sa atong pisikal nga lawas. Niining lugar sa pagkat-on sa pagka-mortal, makasinati kita og kalumo, gugma, kamabination, kalipay, kaguol, kapakyasan, kasakit, ug bisan gani mga hagit sa pisikal nga limitasyon sa mga paagi nga nag-andam kanato alang sa kahangturan. Sa yano nga pagkasulti, adunay mga leksyon nga kinahanglan natong makat-unan ug mga kasinatian nga kinahanglan natong maangkon, sama sa gihulagway sa mga kasulatan, “sumala sa unod” (1 Nephi 19:6; Alma 7:12–13).

Makanunayong gitudlo sa mga apostoles ug mga propeta ang mortal ug mahangturong importansya sa atong lawas. Mideklarar si Pablo:

“Wala ba kamo masayud nga kamo templo sa Dios, ug nga ang Espiritu sa Dios nagapuyo diha sa sulod ninyo?

“Kon adunay molaglag sa templo sa Dios, siya pagalaglagon sa Dios; kay ang templo sa Dios balaan, ug kanang temploha mao kamo.” (1 Mga Taga-Corinto 3:16–17).

Ug niining dispensasyon mipadayag ang Ginoo “ang espiritu ug ang lawas mao ang kalag sa tawo” (D&P 88:15). Usa ka kamatuoran nga tinuod gayud ug sa kanunay nga ang lawas ug ang espiritu mao ang naglangkub sa atong pagkatawo ug pagka kita. Kon ang lawas ug espiritu dili na gayud magbulag, makadawat kita og kahingpitan sa himaya, kon kini magkabulag, kita dili makadawat og kahingpitan sa himaya (tan-awa sa D&P 93:33–34).

Gidesinyo ang plano sa Amahan sa paghatag og direksyon sa Iyang mga anak, sa pagtabang kanila nga magmalipayon, ug sa pagdala kanila balik sa panimalay nga luwas ngadto Kaniya uban sa nabanhaw, nahimayang mga lawas. Nagtrabaho si Lucifer aron sa paghimo sa mga anak nga lalaki ug mga babaye sa Ginoo nga maglibug ug magmagul-anon ug sa pagpugong sa ilang mahangturong pag-uswag. Ang hilabihang paningkamot sa amahan sa mga bakak nga kitang tanan mahimong “mauyamot sama kaniya” (2 Nephi 2:27), ug nagtrabaho siya sa pagguba sa mga elemento sa plano sa Amahan nga hilabihan niyang gikasilagan.

Si Satanas walay lawas, ug ang iyang mahangturong pag-uswag wala na. Sama sa usa ka tubig nga nagdagayday sa sapa nga gipugngan sa dam, mao usab ang mahangturong paglambo sa kaaway nahunong na tungod kay siya walay pisikal nga lawas. Tungod sa iyang pagrebelde, si Lucifer mihikaw sa iyang kaugalingon sa tanang mortal nga mga panalangin ug mga kasinatian nga mahimong posible pinaagi sa usa ka tabernakulo sa lawas ug bukog. Dili siya makakat-on sa mga leksyon nga makat-unan lamang sa usa ka espiritu nga adunay lawas. Dili siya makaminyo o makatagamtam sa mga panalangin sa pagpasanay ug kinabuhi nga may pamilya. Dili siya makasunod sa reyalidad sa usa ka literal ug kinatibuk-ang pagkabanhaw sa tanang katawhan. Usa sa labing tataw nga kahulugan sa kasulatan sa pulong nga gipanghimaraut gihulagway nga siya dili makapadayon sa paglambo ug mamahimong sama sa atong Langitnong Amahan.

Tungod kay ang usa ka pisikal nga lawas importante gayud sa plano sa kalipay sa Amahan ug sa atong espirituhanong paglambo, dili nato angayang ikatingala nga nagtinguha si Lucifer sa pagpugong sa atong paglambo pinaagi sa pagtintal kanato ug sa dili pagtarung og gamit sa atong mga lawas. Usa sa labing binali sa kahangturan mao nga ang kaaway, kinsa siguradong mauyamot tungod kay siya walay pisikal nga lawas, nagdapit ug naghaylo kanato sa pag-apil sa iyang pagkauyamot pinaagi sa dili saktong paggamit sa atong mga lawas. Ang himan gayud nga wala siya ug dili niya magamit mao ang iyang nag-unang tumong sa iyang pagsulay sa pagdani kanato padulong sa pisikal ug espiritwal nga kalaglagan.

Ang mga Atake sa Kaaway

Mosulay ang kaaway sa pag-impluwensya kanato sa dili saktong paggamit sa atong pisikal nga lawas ug sa pagpaubos sa kaimportante sa atong lawas. Kining duha ka pamaagi sa pag-atake importante alang kanato nga mailhan ug mapakgang.

Sa panahon nga ang mga anak sa Langitnong Amahan dili mogamit sa sakto sa ilang pisikal nga tabernakulo pinaagi sa paglapas sa balaod sa kaputli, pinaagi sa paggamit og mga druga ug makaadik nga mga butang, pinaagi sa pag-usab sa porma sa ilang kaugalingong lawas, o pinaagi sa pagsimba sa imahe sa lawas, kini ba sa ilang kaugalingon o sa uban, si Satanas nalipay. Kita nga nasayud ug nakasabut sa plano sa kaluwasan, bisan unsa nga paghugaw-hugaw sa lawas usa ka rebelyon ug usa ka paglimud sa tinuod nga pagkatawo isip mga anak nga lalaki ug babaye sa Dios (tan-awa sa Mosiah 2:36–37; D&P 64:34–35).

Karon, mga kaigsoonan, dili ako makasulti kaninyo sa tanang mga pamaagi diin dili ninyo saktong magamit ang inyong lawas, “kay adunay daghan nga mga paagi ug hinungdan, gani hilabihan kadaghan nga ako dili makaihap kanila” (Mosiah 4:29). Kahibalo kamo kon unsa ang sakto ug unsa ang sayop, ug kamo adunay indibidwal nga responsibilidad sa pagkat-on sa inyong kaugalingon “pinaagi sa pagtuon ug usab pinaagi sa hugot nga pagtuo” (D&P 88:118) sa mga butang nga kinahanglan ninyo ug dili kinahanglan ninyong buhaton ug ang doktrinal nga mga rason nganong kinahanglan ninyo ug dili ninyo kinahanglan nga buhaton kadtong mga butanga. Mopamatuod ako nga samtang nagtinguha kamo sa pagkat-on, samtang kamo “magbantay sa inyong mga kaugalingon, ug sa inyong mga hunahuna, ug sa inyong mga pulong, ug sa inyong mga buhat, ug magbantay sa mga sugo sa Dios, ug magpadayon sa hugot nga pagtuo sa unsay inyong nadungog mahitungod sa pag-anhi sa atong Ginoo, gani ngadto sa katapusan sa inyong mga kinabuhi” (Mosiah 4:30), kamo mahayagan ug maprotektahan sa espiritwal nga paagi. Ug sumala sa inyong pagkamatinud-anon ug pagkamakugihon, kamo adunay gahum sa pag-ila sa pagpangilad ug mopakgang sa mga atake sa kaaway samtang nagtintal siya kaninyo sa dili saktong paggamit sa inyong pisikal nga lawas.

Naningkamot usab si Satanas sa pagpangilad sa mga anak nga lalaki ug mga anak nga babaye sa Dios sa pagpaubos sa kaimportante sa ilang pisikal nga lawas. Kini nga klase sa pag-atake mao ang labing maliputon ug dautan. Gusto ko nga mohatag og pipila ka mga ehemplo kon sa unsa nga paagi ang kaaway makalukmay ug makadani kanato ngadto sa usa kalibutanon nga kasigurohan (tan-awa sa 2 Nephi 28:21) ug nag-awhag kanato sa pagbutang sa risgo sa nakat-unang mga kasinatian sa yuta nga nakapasinggit kanato sa hingpit nga kalipay sa kalibutan sa wala pa dinhi sa yuta (tan-awa sa Job 38:7).

Pananglitan, kitang tanan mahimong malingaw sa nagkalain-laing maayo, makapahimuot, ug makapadani nga mga kalihokan. Apan gipaubos nato ang kaimportante sa atong lawas ug gikompromiso ang atong pisikal nga pagkatawo pinaagi sa paghimo sa dili sagad ug hilabihang kakuyaw nga mga kalihokan sa pagpangita og mas hilabihan ug mas makapalipay nga “kahinam.” Kita tingali mangatarungan nga siguradong walay dautan nianang ingon og inosenting mga buhat ug mga lingaw-lingaw. Apan, ang pagbutang sa risgo sa mao gayud nga instrumento sa Dios nga gihatag kanato sa pagdawat og mga kasinatian nga makat-unan sa mortalidad—sa pagpadayon lamang sa makapahinam o ingon og makalingaw, sa pagpataas sa kaugalingon, o aron lamang madawat—sa tinuoray makapaubos sa kaimportante sa atong pisikal nga lawas.

Makapaguol, nga pipila sa atong mga batan-ong lalaki ug mga batan-ong babaye sa Simbahan karon dili manumbaling sa “mga butang ingon nga sila gayud mao” ug wala hatagi og bili ang mahangturong relasyon alang sa makasamok nga mga butang nga digital, mga pagsimang, ug mga pagtipas nga wala gayuy mahangturon nga bili. Nasakitan ang akong kasingkasing kon ang batan-ong magtiayon—na-sealed sa balay sa Ginoo alang sa panahon karon ug hangtud sa kahangturan pinaagi sa gahum sa balaang priesthood—makasinati og mga kalisud sa kaminyoon tungod sa makapaadik nga epekto sa sobrang pagdula og video o pakighigalaay sa online. Ang usa ka batan-ong lalaki o babaye mahimong mag-usik-usik og daghang oras, maglangay-langay o dili dayunon ang pagtapus sa bokasyonal ug akademik, ug sa katapusan isakripisyo ang relasyon sa mga tawo tungod kay ang hunahuna ug kasingkasing anaa na gyud sa mga video ug online nga mga dula. Sama sa gipamahayag sa Ginoo, “Busa, Ako mohatag ngadto kanila og sugo … : Ayaw kamo pag-usik sa inyong panahon, ni kamo motago sa inyong kahibalo nga kini dili masayran” (D&P 60:13).

Siguro karon mangutana kamo sa inyong kaugalingon, “Apan, Brother Bednar, nagsugod ka karon pinaagi sa paghisgut kabahin sa kaimportante sa pisikal nga lawas alang sa among mahangturong paglambo. Nagsugyot ka ba nga ang padula og video ug ubang mga klase sa komunikasyon nga gamit ang computer adunay bahin [role] sa pagpaubos sa kaimportante sa among pisikal nga lawas?” Kana gayud mao ang akong gipahayag. Tuguti ko sa pagpasabut.

Nagpuyo kita sa panahon diin ang teknolohiya mao ang gigamit sa pagpadaghan sa reyalidad, sa pagpadugang sa reyalidad, ug sa pagmugna og mao-mao sa reyalidad [virtual reality]. Pananglitan, mahimong mogamit ang usa ka medikal nga doktor og software nga sinunod sa tinuod [software simulation] aron sa pagbaton og mabungahong kasinatian sa pagbuhat og lisud nga operasyon nga dili ibutang sa peligro ang usa ka tawo nga pasyente. Ang usa ka piloto nga anaa sa gisundog nga paglupad [flight simulator] makabalik-balik og bansay sa mga pamaagi sa pagpatugpa sa eroplano panahon sa emerhensya nga makaluwas og daghang kinabuhi. Ug ang mga architect ug mga enhinyero makagamit sa gibag-o nga mga teknolohiya aron sa paghimo og mga modelo sa labing nindot nga mga desinyo ug mga pamaagi sa pagtukod nga mopagamay sa pagkakalas sa kinabuhi sa tawo ug pagkadaut sa mga building tungod sa linog ug uban pang natural nga mga kalamidad.

Sa matag ehemplo niini, usa ka taas nga pagkatukma sa sinunod sa tinuod o sa modelo makadugang sa pagka-epektibo sa kasinatian. Ang pulong nga pagkatukma nagpasabut sa pagkaparehas tali sa reyalidad ug ang representasyon sa reyalidad. Ang ingon nga sinunod sa tinuod makatabang kon ang pagkatukma taas ug ang mga katuyoan maayo—sama pananglit, paghatag og kasinatian nga makaluwas og kinabuhi o makapalambo sa kalidad sa kinabuhi.

Palihug bantayi ang pagkatukma tali sa representasyon sa reyalidad diha sa imahe nga makita sa computer (pahina 26) ug ang reyalidad sa nahuman nga kwarto diha sa litrato sa sunod pahina.

Diha sa ehemplo, ang taas nga pagkatukma gigamit aron sa paghuman sa usa sa labing importante nga katuyoan—ang desinyo ug pagtukod sa usa ka sagrado ug nindot kaayo nga templo. Apan, ang usa ka sinunod sa tinuod o modelo mosangpot ngadto sa espiritwal nga pagkadaut ug kakuyaw kon ang pagkatukma taas ug ang mga katuyoan dautan—sama sa pag-eksperimento sa mga buhat nga sukwahi sa mga sugo sa Dios o sa paglingla kanato sa paghunahuna o sa pagbuhat sa mga butang nga dili unta nato hunahunaon o buhaton “tungod kay kini usa lamang ka dula.”

Mopalanog ko og usa ka tingog sa pasidaan sa pagka-apostol kabahin sa makapatuok nga epekto sa paggamit sa Internet ug mga kasinatian diha sa atong mga kalag. Ang problema nga gipalanog nako karon dili na bag-o; kini parehong magamit sa ubang mga klase sa media, sama sa telebisyon, mga salida, ug musika. Apan sa kalibutan diha sa internet [cyber world], kining mga hagit mas malukupon ug mas grabe. Mohangyo ako kaninyo nga magbantay sa impluwensya sa teknolohiya gamit ang internet nga makapaluya sa balatian ug makaguba sa espiritwal nga paagi nga gigamit sa paghimo og taas nga pagkatukma ug nagpasiugda sa makapaubos ug yawan-ong mga katuyoan.

Kon ang kaaway dili makalingla kanato sa dili saktong paggamit sa atong pisikal nga lawas, dayon ang iyang labing gamhanan nga taktika mao ang pag-ilad kaninyo ug kanako kinsa mga espiritu nga adunay lawas sa pagpalayo hinay-hinay ug sa pisikal nga paagi gikan sa mga butang ingon nga sila gayud mao. Buot ipasabut, nag-awhag siya kanato sa paghunahuna ug paglihok nga daw kita anaa sa atong kinabuhi sa wala pa dinhi sa yuta, kahimtang nga walay lawas. Ug, kon tugutan nato siya, sa maliputong paagi siya makagamit og pipila ka mga aspeto sa modernong teknolohiya sa pagtuman sa iyang mga katuyoan. Palihug pagmabinantayon nga malunod ug malinga sa hilabihan nga paggamit sa mga pixel, pag-text, paggamit sa ear phone, pag-twitter, pakighigalaay sa online, ug mahimong adik sa paggamit sa media ug sa Internet nga napakyas na kamo sa pag-ila sa kaimportante sa inyong pisikal nga lawas ug dili makasinati sa kanindot sa pagpakig-istorya sa usa ka tawo ngadto sa lain nga tawo. Pagbantay sa mga digital nga mga imahe ug data sa nagkalain-laing porma nga naggamit og computer nga mopuli sa tibuok pisikal nga kapasidad ug kasinatian.

Basaha pag-ayo ang mosunod nga mga kutlo nga naghulagway sa hilabihan ka romantiko nga relasyon sa usa ka babaye ngadto sa iyang hinigugma diha sa internet. Ug bantayi kon sa unsang paagi nga ang pamaagi sa komunikasyon mipaubos sa kaimportante sa pisikal nga lawas. “Ug busa si PFSlider [ang ngalan sa lalaki sa Internet] nahimong kabahin sa akong matag adlaw nga kinabuhi. Nawala ang tanang butang nga mahikap. Wala na ang akong lawas. Wala na koy panit, walay buhok, wala nay mga bukog. Ang tanang tinguha nahimong tubod sa panghunahuna nga walay kapaingnan gawas lamang sa atubangan sa akong hunahuna. Walay mga kalihokan sa gawas, walay sosyal nga kinabuhi, walay panahon. Ang anaa lamang mao ang screen sa computer ug telepono, akong lingkuranan, ug siguro usa ka baso nga tubig.”⁴

Sa pagtandi, kinahanglan kitang mosunod sa tambag ni Pablo: “Nga ang matag usa kaninyo makahibalo unta unsaon niya sa pagpangasawa diha sa kabalaan ug kadungganan” (1 Mga Taga-Tesalonica 4:4).

Ikonsiderar pag-usab ang ehemplo sa akong gihisgutan sa batan-ong managtiayon nga bag-ohay lamang naminyo sa balay sa Ginoo. Ang bata-bataon o wala magiyahi nga kapikas mahimong mogahin og daghang mga oras sa pagdula og mga video game, mag-chat online, o sa bisan unsang mga pamaagi nga nagtugot sa digital nga mga butang nga mopatigbabaw sa mga butang ingon nga sila gayud mao. Sa sinugdanan ang paggahin og oras daw dili makadaut, morason nga nagkinahanglan og pipila lamang ka minutos sa pagpahulay gikan sa kakapoy sa usa ka puno sa iskedyul matag adlaw. Apan ang importanting mga oportunidad ang nawala alang sa pagpalambo og kahanas sa pagpakig-uban sa mga tawo, alang sa dungan nga pagpangatawa ug paghilak, ug sa pagmugna og mabungahon ug mahangturong relasyon sa pagkasuod sa emosyonal nga paagi. Sa ngadto-ngadto, ang daw limpyo nga kalingawan mahimong usa ka porma sa makadaut nga pagkabihag.

Aron sa pagbati sa kainit sa malumong gakos gikan sa usa ka mahangturong kauban o sa pagtan-aw sa kamatinud-anon sa mga mata sa usa ka tawo samtang gipakigbahin ang pagpamatuod—kining tanang butang masinati ingon nga sila gayud mao pinaagi sa instrumento sa atong pisikal nga lawas—mahimong mawala tungod sa usa ka taas nga pagkatukma sa pantasya nga walay mahangturong bili. Kon kamo ug ako dili magmabinantayon, kita mamahimong “walay pagbati” (1 Nephi 17:45), sama kaniadto nila ni Laman ug Lemuel.

Tuguti ko sa paghatag og laing ehemplo nga sa hinay-hinay ug sa pisikal nga paagi nagkalayo gikan sa mga butang ingon nga sila gayud mao. Karon ang usa ka tawo mahimong mosulod sa usa ka gimao-mao nga kalibutan [virtual world], sama sa Gimao-mao nga Ikaduhang Kinabuhi, ug moangkon og bag-ong pagkatawo. Makahimo ang indibidwal og usa ka avatar, o usa ka tawo sa internet, nga mopareha sa iyang kaugalingong panagway ug batasan. O makamugna ang usa ka tawo og kontra nga wala gayud nahiuyon sa mga butang ingon nga sila gayud mao. Hinoon kon klarohon ang bag-ong gimugna nga pagkatawo mahimong sama sa indibidwal, ang mao nga kinaiya mao gayud ang ehemplo sa mga butang nga dili gayud mao. Kaganina gihatagan ko og kahulugan ang pagkatukma sa usa ka sinunod sa tinuod o modelo. Karon hatagan nako og gibug-aton ang kaimportante sa personal nga pagkatukma—ang kalainan tali sa usa ka tinuod nga tawo ug ang gimugna lamang, nga pagkatawo diha sa internet [cyberspace identity]. Palihug bantayi ang kakulang sa personal nga pagkatukma sa mosunod nga mga hugna nga gireport sa Wall Street Journal:

Si Ric Hoogestraat usa ka “dako og lawas [53-anyos] nga lalaki nga may taas abuhon nga buhok, baga og patilya ug may bungot nga sagol puti ug itom. … [Si Ric mogahin] og unom ka oras sa gabii ug kanunay moabut og 14 ka oras sa katapusan sa semana samtang si Dutch Hoorenbeek, ang iyang unom ka pye ug siyam ka pulgada, macho … ang iyang kaugalingon sa internet. Ang karakter mas batan-on, bersyon sa gipanindot sa pisikal nga paagi ni [Ric]. …

“… [Siya] molingkod sa iyang computer nga ang mga kurtina sa bintana nakasirado. … Samtang ang iyang asawa, si Sue, nagtan-aw og telebisyon sa sala, si Mr. Hoogestraat nag-chat sa online nga makita sa screen nga ingon og taas, yagpis nga pulahon og buhok.

“Wala pa gayud niya igkita ang babaye sa gawas sa kalibutan sa computer sa Gimao-mao nga Ikaduhang Kinabuhi, usa ka digital nga kalibutan sa pantasya nga maayo kaayong pagkasulat. … Wala pa gyud siya makaistorya kaniya sa telepono. Apan ang ilang relasyon nahitabo diha sa daw tinuod nga kalibutan [dimension]. Aduna silay duha ka iro, dungan nga mobayad sa utang sa balay ug mogahin og mga oras [sa ilang kalibutan diha sa internet] mamalit sa mall ug sige lamang magsakay-sakay sa motor. … Ang ilang pagkasuod hilabihan ka lig-on nga sa milabay nga tulo ka bulan, si Mr. Hoogestraat mihangyo ni Janet Spielman, ang 38 anyos nga babaye nga taga-Canada kinsa mao ang nagkontrolar sa redhead, mahimo niyang asawa sa internet.

“Wala malipay ang iyang asawa kinsa iyang gipakaslan. ‘Makapahugno gyud kini,’ miingon si Sue Hoogestraat, … kinsa naminyo ni Mr. Hoogestraat sulod sa pito ka bulan.”⁵

Mga kaigsoonan, palihug sabta. Wala ako magsugyot nga ang tanang teknolohiya makadaut gayud; dili kini tinuod. Ni miingon ko nga kinahanglang dili kita mogamit sa daghang kapabilidad niini sa saktong mga pamaagi sa pagkat-on, sa pagpakig-istorya, sa pagpabayaw ug pagpahayag sa mga kinabuhi, ug sa pagtukod ug paglig-on sa Simbahan; siyempre kita kinahanglang mogamit. Apan mopalanog ako sa usa ka tingog sa pagpasidaan nga kinahanglang dili nato usik-usikan ug gub-on ang tinuod nga relasyon pinaagi sa hilabihang kalinga sa mga artipisyal nga butang. “Dul-an sa 40% sa mga lalaki ug 53% sa mga babaye kinsa modula og mga online game miingon nga ang ilang mga higala sa internet susama o mas labaw pa kaysa ilang tinuod nga mga higala, sumala sa survey sa 30,000 ka mga magdudula nga gihimo pinaagi sa … usa ka bag-ong migradwar sa Ph.D. gikan sa Stanford University. Labaw sa ikaupat ka bahin sa mga magdudula [kinsa mitubag miingon nga] ang labing nindot nga kasinatian sa emosyon sa miaging semana nahitabo sa kalibutan sa computer.”⁶

Unsa kaimportante, unsa kamahangturon, ug unsa ka sakto sa panahon ang kahulugan sa Ginoo sa kamatuoran: “mga butang ingon nga sila gayud mao.” Nangutana si Propetang Alma, “O unya, dili ba kini tinuod?” (Alma 32:35). Namulong siya kabahin sa kahayag ug kamaayo nga daling maila nga kini mahimong matilawan. Tinuoray, “sila kinsa mopuyo diha sa atubangan [sa Amahan] … nakakita ingon nga sila nakit-an, ug nahibalo ingon nga sila nahibaloan, ingon nga nakadawat sa iyang kahingpitan ug sa iyang grasya” (D&P 76:94).

“Minahal kong mga kaigsoonan, pagmabinantayon! Hangtud ang personal nga pagkatukma mopaubos sa mga komunikasyon gamit ang computer ug ang mga katuyoan sa ingon niining komunikasyan matuis, mausab, ug madaut, ang espiritwal nga katalagman hilabihan gayud. Mangamuyo ako kaninyo sa pagpalayo diha-diha dayon ug permanente gikan nianang mga dapita ug mga kalihokan (tan-awa sa 2 Timoteo 3:5).

Karon gusto kong mohatag og dugang dagway sa mga atake sa kaaway. Kanunay si Satanas nagtanyag og mapakadani nga ilusyon nga dili mailhan. Kanunay nga nagtinguha si Lucifer sa pagtuman sa iyang buluhaton sa tago (tan-awa sa Moises 5:30). Hinoon, hinumdumi, nga ang apostasiya makita tungod kay kini nahitabo lamang sa usa ka blog o pinaagi sa usa ka hinimo-himo nga tawo sa usa ka chat room o sa gimao-mao nga kalibutan. Ang imoral nga mga panghunahuna, mga pulong, ug mga binuhatan kanunay gayud nga imoral, bisan diha sa internet. Ang mga buhat sa pagpanikas nga gihimo sa sekreto, sama sa dili legal nga pag-download sa musika gikan sa Internet o pagkopya og mga CD o mga DVD aron ipanghatag sa mga higala ug pamilya, usa ka pagpanikas. Manubag kitang tanan sa Dios, ug sa katapusan pagahukman kita sumala sa atong mga buhat ug mga tinguha sa atong kasingkasing (tan-awa sa Alma 41:3). “Kay maingon [ang tawo] nagahunahuna sa sulod sa iyang kaugalingon, sa ingon niana mao man siya” (Proverbio 23:7).

Nasayud ang Ginoo kon si kinsa gayud kita, unsa ang atong gihunahuna, unsa gayud ang atong gipangbuhat, ug si kinsa gayud kita nga mamahimo. Nagpasidaan Siya kanato nga “ang mga masukulon madutlan sa tuman nga kagul-anan; kay ang ilang pagkadautan ipamulong diha sa atup sa mga balay, ug ang ilang tinago nga mga lihok ipadayag” (D&P 1:3).

Nagpalanog ako og tingog sa pasidaan kabahin sa pipila ka espirituhanong kakuyaw diha sa atong kalibutan nga nagsalig sa teknolohiya ug pas-pas ang kausaban. Tuguti ako sa pagsulti niini pag-usab: dili ang teknolohiya o ang pas-pas nga kausaban o kini mismo mao ang maayo o dautan; ang tinuoray nga hagit mao ang pagsabut sa kinatibuk-ang kahulugan sa mahangturong plano sa kalipay. Moawhag kaninyo si Lucifer sa dili paggamit sa husto ug sa pagpaubos sa kaimportante sa inyong pisikal nga lawas. Mosulay siya sa pagpuli sa kapuol nga pagbalik-balik nga makita sa internet alang sa daghang walay katapusan nga gilalang sa Dios ug mokombinsir kanato nga kita mga mortal lamang nga palihukon lamang imbis ang mahangturong mga kalag napanalanginan sa moral nga kabubut-on sa paglihok sumala sa atong kaugalingon. Yawan-on, midani siya sa mga espiritu nga adunay lawas aron sa pagsalikway sa mga panalangin ug mga kasinatian sa pagkat-on “sumala sa unod” (1 Nephi 19:6; Alma 7:12–13) nga nahimong posible tungod sa plano sa kalipay sa Amahan ug sa Pag-ula sa Iyang Bugtong Anak.

Alang sa inyong kalipay ug proteksyon, modapit ako kaninyo sa pagtuon nga mas makugihon sa doktrina sa plano sa kaluwasan—ug mainampoong mamalandong sa mga kamatuoran nga atong naribyu. Motanyag ako og duha ka pangutana nga inyong ikonsiderar sa inyong personal nga pagpamalandong ug mainampoong pagtuon.

1. Ang paggamit ba sa nagkalain-laing teknolohiya ug media makadapit o makapugong sa makanunayong pagpakig-uban sa Espritu Santo sa inyong kinabuhi?

2. Ang oras ba nga inyong igahin sa paggamit sa nagkalain-laing teknolohiya ug media mopalapad o mopagamay sa inyong kapasidad sa pagpuyo, sa paghigugma, ug sa pagserbisyo sa makahuluganong mga paagi?

Makadawat kamo og mga tubag, inspirasyon, ug instruksyon gikan sa Espiritu Santo nga angay sa inyong indibidwal nga mga kahimtang ug mga panginahanglan. Balikon nako ug mopamatuod sa pagtulun-an ni Propeta Joseph: “Ang tanang mga binuhat nga adunay mga lawas adunay gahum ibabaw niadtong wala. Ang yawa walay gahum ibabaw kanato gawas kon kita motugot kaniya.

Kining mahangturong mga kamatuoran kabahin sa kaimportante sa atong pisikal nga mga lawas mopalig-on kaninyo batok sa pangpangilad ug mga atake sa kaaway. Usa sa akong labing dako nga tinguha alang kaninyo mao ang mahangturong pagpalig-on sa pagpamatuod ug pasalamat sa Pagkabanhaw—gani ang atong kaugalingon nga pagkabanhaw uban sa usa ka celestial, gihimayang lawas “tungod sa inyong hugot nga pagtuo ni [Ginoong Jesukristo] sumala sa saad” (Moroni 7:41).

Ang Bag-o nga Kaliwatan

Gusto kong mamulong kaninyo sa piho kon si kinsa gayud kamo. Kamo ang tinuoray nga bag-o nga kaliwatan sa Ang Simbahan ni Jesukristo sa mga Santos sa Ulahing mga Adlaw. Niadtong Oktubre 1997, si Elder Neal A. Maxwell (1926–2004) sa Korum sa Napulog Duha ka mga Apostoles mibisita sa Brigham Young University–Idaho aron mamulong sa usa ka debosyonal. Sa adlaw nga anaa siya sa campus, nag-istoryahanay kaming duha og daghang mga hilisgutan sa ebanghelyo sa kinatibuk-an ug partikular kabahin sa kabatan-onan sa Simbahan. Nakahinumdom ako ni Elder Maxwell nga namahayag nga nakapahimuot gayud kanako. Miingon siya, “Ang kabatan-onan niining henerasyon adunay mas dakong kapasidad sa pagkamasulundon kay sa bisan unsa nga milabay nga henerasyon.”

Mipasabut dayon siya nga ang iyang pamahayag gibase diha sa usa ka kamatuoran nga gitudlo ni Presidente George Q. Cannon (1827–1901), Unang Magtatambag sa Unang Kapangulohan: “Ang Dios nagreserba og mga espiritu alang niining dispensasyon kinsa adunay kaisug ug determinasyon sa pag-atubang sa kalibutan, ug sa tanang gahum sa yawa, makita ug dili makita, sa pagsangyaw sa ebanghelyo ug sa pagpabilin sa kamatuoran ug sa pag-establisar ug pagtukod sa Zion sa atong Dios nga dili mahadlok sa tanang mga sangputanan. Mipadala Siya niining mga espiritu sa karon nga henerasyon sa pagpahimutang sa pundasyon sa Zion nga dili na gayud matumpag, ug sa pagpasanay og katawhan nga mahimong matarung, ug motahud sa Dios, ug motahud Kaniya labaw sa tanan, ug magmasulundon ngadto Kaniya sa tanang mga sirkumstansya.”⁷

Kanunay nga naghatag og gibug-aton ang mga ginikanan ug mga lider sa Simbahan nga ang mga batan-ong lalaki ug mga batan-ong babaye niining henerasyon gireserba alang niini nga panahon sa kasaysayan sa kalibutan ug mao ang pipila sa labing isug nga mga anak sa Langitnong Amahan. Sa pagkatinuod, ang ingon nga mga pahayag tinuod. Apan kanunay akong naghunahuna kon ang mga batan-on nakadungog ba kanunay niining deskripsyon nga kini nasobrahan paggamit ug nagbalik-balik—ug ang kaimportante ug lawom nga kahulugan niini wala panumbalinga. Nasayud kita nga “ngadto kinsa daghan ang gihatag daghan ang gikinahanglan” (D&P 82:3). Ug ang mga pagtulun-an nila ni Presidente Cannon ug Elder Maxwell makatabang kanato sa pagsabut pag-ayo unsa ang gikinahanglan sa atoa karon. Kamo ug ako kinahanglan nga magmaisugon ug “magmasulundon ngadto Kaniya sa tanang mga sirkumstansya.” Mao nga, ang pagkamasulundon mao ang labing importanting hinagiban nga kinahanglang saligan sa bag-o nga kaliwatan sa gubat sa ulahing adlaw tali sa maayo ug dautan.

Magmalipayon kita nga ang Ginoo pinaagi sa Iyang gitugutan nga mga sulugoon “mipasaka sa mga sumbanan” alang sa mga batan-ong mga lalaki ug mga batan-ong babaye karon. Tungod kay nasayud kita kon si kinsa kita ug nganong ania kita dinhi sa yuta, ang ingon nga dinasig nga direksyon gidawat ug gipasalamatan. Ug kinahanglan natong ilhon nga si Lucifer walay hunong sa pagpaningkamot sa “pagpaubos sa sumbanan” pinaagi sa paglingla kanato sa dili saktong paggamit ug pagpaubos sa kaimportante sa atong pisikal nga mga lawas.

Nagpasidaan og balik-balik kanato ang Manluluwas nga magbantay sa mga pagpangilad sa kaaway:

“Ug si Jesus mitubag, ug miingon ngadto kanila: Pagbantay nga walay tawo nga molingla kaninyo; …

“Kay niana nga mga adlaw usab adunay motungha nga mini nga mga Kristo, ug mini nga mga propeta, ug magpakita og dagko nga mga timailhan ug mga kahibulongan, hangtud nga, kon, mahimo, sila molingla sa labing pinili, kinsa mga pinili suma sa pakigsaad. …

“Ug kinsa kadto nga magmahal sa akong pulong, dili malingla” (Joseph Smith—Mateo 1:5, 22, 37).

Ang pagkamasulundon gikinahanglan aron sa pagtagamtam sa makanunayon nga panag-uban sa Espiritu Santo. Ug ang mga espirituhanong gasa ug abilidad nga palihokon pinaagi sa gahum sa Espiritu Santo makahimo kanato sa paglikay sa pangpangilad—ug sa pagtan-aw, sa pagbati, sa pagkasayud, sa pagsabut, ug sa paghinumdom sa mga butang ingon nga sila gayud mao. Kamo ug ako gitugahan uban sa mas dakong kapasidad sa pagkamasulundon alang niini nga mga rason. Mipahayag si Moroni:

“Patalinghug sa mga pulong sa Ginoo, ug pangayo sa Amahan pinaagi sa pangalan ni Jesus alang sa bisan unsa nga butang nga kamo nagkinahanglan. Ayaw pagduha-duha, apan pagmatinuohon, ug pagsugod sama sa karaan nga mga panahon, ug duol ngadto sa Ginoo uban sa tibuok ninyong kasingkasing, ug buhata ang inyong kaugalingon nga kaluwasan uban sa kahadlok ug pagpangurog sa iyang atubangan.

“Pagmaalamon sa mga adlaw sa inyong pagsulay; tangtangi ang inyong mga kaugalingon sa tanan nga mga kahugaw; ayaw pangayo, nga kamo mousik-usik niini diha sa inyong kahigal, apan pangayo uban sa kaugdang nga dili matarug, nga kamo dili magpadala sa bisan unsa nga pagtintal, apan nga kamo moalagad sa tinuod ug buhi nga Dios” (Mormon 9:27–28).

Samtang mosunod kita nianang dinasig nga tambag, makahimo kita ug mapanalanginan sa pag-ila ug sa pagpakgang sa mga pag-atake sa kaaway—karon ug sa umaabot nga mga adlaw. Makatuman ug motuman kita sa atong gi-orden nang daan nga mga responsibilidad ug motampo ngadto sa buluhaton sa Ginoo sa tibuok kalibutan.

Mopamatuod ako nga ang Dios buhi ug mao ang atong Langitnong Amahan. Siya mao ang tigpasiugda sa plano sa kaluwasan. Si Jesus mao ang Kristo, ang Manunubos, kansang lawas napangos, nabalian, ug nasamdan alang kanato samtang Siya naghalad sa maulaong sakripisyo. Nabanhaw Siya, nabuhi Siya, ug nagbarug Siya sa ulohan sa Iyang Simbahan niining ulahing mga adlaw. Aron “maliyokan sa kahangturan sa mga bukton sa iyang gugma” (2 Nephi 1:15) mahimong tinuod ug dili usa ka kasinatian sa internet.

Mopamatuod ako nga kita mahimo ug mapanalanginan uban sa kaisug ug determinasyon sa pag-atubang sa kalibutan ug sa tanang gahum sa yawa. Mopatigbabaw ang pagkamatarung. Walay dili balaan nga kamot ang makapugong sa buhat sa paglambo. Mosaksi ako ug mopamatuod niining mga butang ingon nga sila gayud mao ug sa mga butang ingon nga sila gayud mahimo unya, sa sagradong pangalan ni Ginoong Jesukristo, amen.

Kini usa ka imahe gikan sa computer sa sealing room sa Templo sa Newport Beach California. Kini ug ang susama nga mga imahe gigamit isip kabahin sa pagplano ug proseso sa pagdesinyo sa matag templo nga itukod. Ang imahe nagpakita sa mga panapton, mga kagamitan, suga, sukdanan, ug pagbahin-bahin aron sa pagpakita kon sa unsang paagi nga ang matag parte tan-awon ug bation inig kahuman. Buot ipasabut, ang tibuok templo ug ang tanang mga elemento niini gidesinyo sa detalye sa dili pa magsugod ang pagtukod.

Kini mao ang litrato sa tinuod nga sealing room sa Templo sa Newport Beach California.

Paghulagway sa litrato pinaagi ni Steve Bunderson

PAGHULAGWAY SA LITRATO PINAAGI NI Craig Dimond

PAGHULAGWAY SA LITRATO PINAAGI NI Welden C. Andersen