Pagbag-o sa mga Pakigsaad pinaagi sa Sakrament

Itudlo kini nga mga kasulatan ug mga kinutlo o, kon gikinahanglan, pagtudlo og lain nga baruganan nga mopanalangin sa mga sister nga inyong bisitahan. Pagpamatuod kabahin sa doktrina. Dapita kadtong inyong gitudloan sa pagpakigbahin unsay ilang gibati ug nakat-unan.

Si Jesukristo Mipasiugda sa Sakrament

“Si Jesus mikuhag tinapay, ug sa nakapanalangin na siya niini, kini iyang gipikaspikas ug ngadto sa mga Apostoles gihatag niya nga nag-ingon, ‘Kumoha ug kumaon’ (Matt. 26:26). “Kini mao ang akong lawas nga gihatag alang kaninyo: buhata ninyo kini sa paghandum kanako” (Lucas 22:19). Sa samang paagi gikuha niya ang kopa sa bino, sa naandan nga paagi gisagulan og tubig, misulti og panalangin sa pagpasalamat alang niini, ug gipasa niadtong nag-alirung kaniya, miingon: ‘Kining kopa mao ang bag-ong pakigsaad diha sa akong dugo,’ ‘nga igaula … alang sa kapasayloan sa mga sala.’ ‘Buhata ninyo kini sa paghandom kanako.’ …

“Sukad niana nga kasinatian diha sa ibabaw nga lawak una pa sa Getsemani ug Golgota, anaa na ubos sa pakigsaad ang mga anak sa saad sa paghinumdom sa sakripisyo ni Kristo niining mas bag-o, mas taas, mas balaan ug personal nga paagi.”¹

Elder Jeffrey R. Holland sa Korum sa Napulog Duha ka mga Apostoles.

Bag-ohon Nato ang Atong mga Pakigsaad sa Bunyag pinaagi sa Sakrament

“Sa dihang nabunyagan kita, gidala nato sa atong kaugalingon ang sagradong pangalan ni Jesukristo. Ang pagdala sa Iyang ngalan ngari kanato mao ang usa sa labing importante nga kasinatian nga atong maangkon sa kinabuhi. …

“Matag semana sa miting sa sakrament nagsaad kita sa paghinumdom sa maulaong sakripisyo sa atong Manluluwas samtang atong bag-ohon ang atong pakigsaad sa bunyag. Nagsaad kita sa pagbuhat sama sa gibuhat sa Manluluwas—nga magmasulundon ngadto sa Amahan ug magsunod kanunay sa Iyang mga sugo. Ang panalangin nga madawat nato mao ang kanunay nga pakig-uban sa Iyang Espiritu ngari kanato.”²

Elder Robert D. Hales sa Korum sa Napulog Duha ka mga Apostoles.

“Nakauban nako ang usa ka otso anyos nga batang babaye sa adlaw sa iyang bunyag. Sa natapos na ang adlaw siya masaligon nga miingon, ‘Ako nabunyagan sulod sa tibuok adlaw, ug ako wala gayud makasala bisan og kausa!’ Apan ang iyang perpekto nga adlaw wala mohangtud, ug nakasiguro ako nga sa pagkakaron, sama nga kita makat-on, nga bisan kon unsaon nato sa pagpaningkamot, dili kita kanunay nga makalikay sa tanang dili maayo nga sitwasyon, sa tanang sayop nga pagpili. …

“… Dili posible ang paghimo og tinuod nga pag-usab sa ato lamang nga kaugalingon. Ang atong kaugalingong kabubut-on ug maayong mga tinguha dili pa paigo. Kon kita makahimo og mga sayop o dili maayo nga pagpili, kita nagkinahanglan og tabang sa Manluluwas aron makabalik sa saktong dalan. Kita moambit sa sakrament kada semana aron sa pagpakita sa atong hugot nga pagtuo sa Iyang gahum sa pag-usab kanato. Kita mokumpisal sa atong mga sala ug mosaad sa pagsalikway niini.”³

Julie B. Beck, kinatibuk-ang Presidente sa Relief Society.

Gilitratohan pinaagi ni Jerry Garns