Walay Paglubad nga mga Istorya sa Ebanghelyo
Natukod diha sa Bato
Niadtong 1847 ang mga Santos sa Ulahing mga Adlaw, ubos sa pagdumala ni Presidente Brigham Young, … [gisugo] sa pag-organisar sa ilang mga kaugalingon ngadto sa grupo sa ginatus, kalim-an, ug matag napulo, pangandam alang sa taas ug makapoy nga panaw nga mogamit lamang og mga baka padulong ngadto sa Walog sa Salt Lake.
Ug karon ganahan akong mangutana og pipila ka mga pangutana: Maalamon ba o may kahulugan ba ni bisan kinsa niining panahona sa pagsulay sa pagbuhat sa mga kondisyon nianang pagpadayag? Unsa kaha ang hunahuna ninyo sa usa ka tawo, nga anaa sa panahon nga adunay mga tren ug mga sakyanan ug mga eroplano, kinsa mopasiugda og grupo nga mogamit og mga baka sa pagpanaw dinhi sa Utah, ug mopaingon ngadto sa Suba sa Missouri? …
Ang leksyon nga gusto nakong ipaabut mao kini: kita malamboon nga mga tawo, kay mga anak kita sa Dios, ug sa ingon aduna kitay katungod sa paggamit niining modernong mga pamaagi, niining napalambo nga mga siyentipikong mga pasilidad, diin ang Ginoo misangkap ug mibutang sa atong mga kamot aron sa pagpasiugda sa Iyang katingalahan nga buhat. …
Unsa May Nakalahi Nato?
Daghang katuigan ang milabay adunay miabut sa Utah nga usa ka pari sa [lain] nga simbahan … , ug nagka-istoryahay kaming duha. Nakatambong na siya og usa ka sakrament miting sa “Mormon” ug daghang nasaway sa atong pamaagi sa pagpahigayon sa Katapusang Panihapon sa Ginoo, ilabi na gyud sa paggamit nato sa tubig imbis bino niadtong okasyon. Miingon siya nga kini nakapakurog kaniya sa dihang iyang nakita nga miinom ang mga tawo sa tubig; ug mihatag siya og usa ka kamatuoran, tungod kay kini tinuod gayud, nga sumala sa Biblia ang Manluluwas, sa dihang mipasiugda Siya sa sakrament diha sa mga Judeo, migamit og bino, nagdeklarar nga kini Iyang dugo o nagrepresentar kini sa Iyang dugo. Mahimo nakong idugang nga nahisulat usab sa Basahon ni Mormon nga migamit ang Manluluwas og bino sa dihang gipaila Niya ang sakrament ngadto sa mga Nephite.
Ang akong … higala, nahibalo man siya o wala, nakaobserbar sa dakong kalainan nga nakapalahi sa Simbahan sa Dios gikan sa uban nga mga simbahan sa kalibutan—mao kini, nga samtang sila natukod diha sa mga libro ug mga tradisyon ug mga lagda sa mga tawo, kining Simbahan natukod diha sa bato ni Kristo, sa baruganan sa direkta ug padayon nga pagpadayag. Ang mga Santos sa Ulahing mga Adlaw wala mobuhat sa mga butang tungod kay kini naimprinta lamang sa usa ka libro. Wala sila mobuhat sa mga butang tungod kay misulti lamang ang Dios ngadto sa Judeo sa pagbuhat niini; ni mobuhat sila o dili mobuhat sa bisan unsa nga butang tungod lamang sa mga instruksyon nga gihatag ni Kristo ngadto sa mga Nephite.
Bisan unsa nga butang nga gibuhat niining Simbahan tungod kay ang Ginoo, nagsulti gikan sa langit alang sa atong panahon, nagsugo niining Simbahan sa pagbuhat niini. … Mao kana ang konstitusyon sa Simbahan ni Kristo. Kon naggamit kita og tubig imbis bino diha sa sakrament sa Katapusang Panihapon sa Ginoo, tungod kay si Kristo ang nagmando niini.
Magpadayon ang Buluhaton sa Dios
Mopahiangay ang balaang pagpadayag sumala sa sirkumstansya ug kondisyon sa katawhan, ug mausab sigon sa paglambo sa buluhaton sa Dios paingon sa iyang padulngan. Walay libro nga paigo aron sa pagdumala niining Simbahan.
Sa pagsulti niini, mosulti ako uban sa tanang may balaan nga pagtahud sa mga nahisulat sa pulong sa Dios, nga naimprinta na diha sa mga basahon, ang ubang bahin niini mahimong karaan na, nakatuman na sa iyang katuyoan ug gibutang na sa estante, samtang ang ubang bahin niini may kapuslanan, puno sa kinabuhi, ug magamit sa atong kahimtang karon—sa atong kalamboan karon. Apan bisan kining bahina kinahanglan gayud nga hubaron sa husto. Walay tawo nga angay molalis kon unsay anaa sa mga libro, agig pagbatok sa usa ka propeta sa Dios, kinsa namulong alang Kaniya ug naghubad sa Iyang pulong. Sa pagbuhat sa ingon mas gipalabi ang karaang sulat kay sa usa ka buhi nga propeta, diin usa gayud ka sayop nga pagtuo.
Kon unsa man ang gisulti sa Ginoo ngadto sa mga Judeo ug sa mga Nephite mga 2,000 ka tuig na ang milabay o unsa man ang gisulti Niya ngadto sa mga Santos sa Ulahing mga Adlaw mga 50 o 60 ka tuig na ang milabay dili magamit bisan kanus-a niining panahona gawas kon nahiuyon kini sa pagpadayag karon, uban sa labing bag-o nga instruksyon sa Ginoo ngadto sa Iyang katawhan pinaagi sa Iyang pinili o gitudlo nga mga sulugoon o sulugoon; ug kinsa kadtong mobaliwala niining kamatuoran mahimutang sa peligro. Ang labing bag-o nga mga pulong gikan sa Dios ang kinahanglang sundon, mas unahon kaysa bisan unsang nag-una nga pagpadayag, bisan kini tinuod.
Ang sama nga Dios kinsa nag-ingon sa pagbuhat sa ingon ug sa karon makabakwi nianang sugo sa umaabut, nga dili mausab-usab o dili makanunayon. Ang balaoranan, mag-miting kaduha sa usa ka tuig, pagwagtang sa daang mga balaod o bisan unsa nga nahimong balaod nga nakatuman na sa iyang katuyoan; apan walay nakahunahuna sa pagpasangil sa mga magbabalaod sa pagkadili makanunayon o panagsumpaki sa kaugalingon. Dayon sa unsang paagi nga ang Dios makonsiderar nga dili makanunayon kon Siya mosulti og usa ka butang karon ug usabon kini inigka-ugma o sunod bulan o sunod tuig aron ipahiangay sa nausab nga mga sirkumstansya?
Misugo Siya kang Abraham sa pagpatay sa iyang anak nga lalaki, ug dihang hapit na kini buhaton ni Abraham ang sama nga Dios miingon, “Dili mo pagbakyawon ang imong kamot batok sa bata” [Genesis 22:12]. Si Abraham ubos sa obligasyon … sa pagsunod sa ikaduhang sugo kaysa sa una; ug siya mahimong makasasala kon siya napakyas.
Kinahanglan Kitang Mopadayon
Mahimo unta nakong ipadayon ang tema nga walay kahumanan apan tapuson ko kini karon uban niining panghunahuna. Ang buluhaton sa Dios malamboon. Mausab ang panagway niini apan dili ang mga baruganan niini. Ang kamatuoran diin kini natukod mahangturon, dili mausab, apan adunay daghang mga lagda nga mag-usab-usab, samtang ang buluhaton sa Dios nagpadayon. Ang mahangturong ebanghelyo usa ka butang nga labaw pa kaysa fire escape, ang agianan paggawas sa usa ka peligroso nga sitwasyon. Usa kini ka balaanong plano alang sa kalamboan sa tawo, ang dalan padulong sa kahingpitan; ug ang diwa sa ebanghelyo mao ang diwa sa paglambo, sa pag-uswag.
Magpadayon ang buluhaton sa Dios, apan ikaw ba ug ako moapil niini? … Sa unsang paagi nga kita moapil sa buluhaton sa Ginoo? Adunay usa lamang ka paagi, ug kana mao ang pagbuhat sa mga butang nga Iyang gimando ug likayan ang mga butang nga Iyang gidili. …
O akong mga kaigsoonan sa Simbahan ni Kristo! Pagmata, ug bangon ug mobuhat kita. … Padayon sa pagbuhat og usa ka butang alang sa Dios, nga ang diwa sa Iyang buluhaton magauban kaninyo ug mogiya kaninyo subay sa dalan “mag-anam og labaw kahayag ug labaw sa kahayag hangtud sa hingpit nga adlaw” [tan-awa sa D&P 50:24].
Ang Ginoong Jesukristo, ni Del Parson
Ang Pagsakripisyo ni Isaac, ni Jerry Harston, © IRI