Mga Naluwas Nagtabang sa mga Naluwas
Bisan human ang Bagyong Ketsana milunop sa Manila, kaulohan sa Pilipinas, ug sa palibut nga mga dapit sa sa ulahing bahin sa Septyembre 2009, ang pagkagun-ob wala pa matapos. Wala pa gihapon kini matapos human ang Bagyong Parma dali-daling miigo sa amihanang mga rehiyon sa Pilipinas mga walo lamang ka adlaw ang milabay. Ang katalgman wala pa matapos bisan human si Parma mibalik sa giagian ug miigo pag-usab sa yuta mga pipila lamang ka adlaw isip usa ka tropikal nga unos, naghimo og dugang pang kadaot.
Hinoon, ang mga Santos sa tibuok Pilipinas, bisan kadtong nanlimbasug sa pagbarug gikan sa nauna nga mga bagyo, wala magpaabut sa ikatulo ug katapusang katalagman ni Parma sa pagsugod og tabang niadtong nanginahanglan.
Paghatag Unsa ang Nasalbar
Ang Siyudad sa Parañaque, duol sa Manila, naigo sa Bagyong Ketsana niadtong katapusan sa Septyembre. Diha sa kinagrabehang bahin sa bagyo, ang bishop sa usa sa upat ka mga lokal nga ward milangoy tabok og kutob sa liog nga tubig sa baha sa usa ka tabon sa Styrofoam nga cooler sa pagtabang og balhin sa tulo ka pamilya. Sa pagkasunod adlaw walay miting sa sakrament; hinoon, daghang mga miyembro sa naapektohan nga ward, bisan og nag-atubang sa mga epekto sa bagyo sa ilang kaugalingon mismo, nagpundok sa balay tigumanan nga mga naka-pajama, mga naka-short, ug mga naka-jacket, nagdala og pagkaon ug mga sinina nga ihatag ngadto niadtong nanginahanglan. Sulod sa duha ka oras, ang tanang pamilya sa ward nabisitahan, nasusi, ug natabangan.
Dayon, duha lamang ka gabii human ang kadaghanan kanila miubog sa mga guba sa ilang kaugalingong mga baranggay, ang mga miyembro gikan sa dapit sa Parañaque nagtigum diha sa ilang lokal nga balay tigumanan ug nagpundok og 26 ka mga bag sa sinina, diin ilang gihatag, ang tanan gilain-lain ug tagsa-tagsang giimpake.
“Kini mao ang usa sa labing halandumon nga mga home evening alang sa daghang pamilya sa among ward,” miingon si Bishop Franco Advincula.
Usa ka sister gikan sa usa ka pamilya nga nanginahanglan mitawag sa bishop sa pagpangutana kon kanus-a nila ihatag ang ilang mga kontribusyon. “Nahingangha ako, ug wala ako makahunahuna sa hustong mga pulong,” miingon si Bishop Advincula. “Hinoon, nadasig ako nga kinahanglan dili nako ihikaw niining buotan nga sister ang oportunidad sa pagtabang.”
Pagtabang sa Makadaghan
Sa dihang si Ketsana miigo sa Metro Manila, ang presidente sa Alaminos Philippines District, si Porferio Balute Jr., miingon nga siya nadasig sa paghangyo sa mga miyembro sa iyang district sa pagtabang sa ilang mga silingan didto sa habagatan. Apan, daghang mga miyembro sa Alaminos district bag-o pa nga nakaluwas gikan sa Bagyong Emong, diin miigo og mas una og upat ka bulan niadtong Mayo 2009. Kini mao ang bagyo nga nakahimo og dakong kadaot nga miigo sukad diha sa kasadpan nga siyudad sa Pilipinas. Daghan sa mga miyembro naghimo sa ilang panginabuhi sa pangisda o pag-uma, ug ang ilang mga panginabuhian nagguba tungod sa sunod-sunod nga mga baha.
Bisan tuod og siya nagduha-duha sa pagpangayo og daghan niadtong kinsa nanlimbasug pa sa pagbalik og barug, si Presidente Balute nangayo gihapon.
Nianang hapona, ang mga miyembro miabut sa balay tigumanan uban sa 21 ka mga sako sa sinina, usa ka bag sa pagkaon, ug $1,500 sa Pilipinas.
Sa dihang si Parma miigo usa ka semana wala madugay, niining higayona ngadto sa amihanan, ang mga miyembro gikan sa Alaminos district mitubag pag-usab ug mipundok og mas daghang sinina, pagkaon, ug kwarta. Ang pipila kanila gani mihatag sa ilang panahon sa pag-adto ug pag-apud-apod og diretso sa mga kinahanglanon.
“Gusto lamang namo nga motabang,” miingon si Presidente Balute. “Wala gayud kami makaamgo nga kami madugangan og daghan kaayo. Ang among hugot nga pagtuo mitubo, ang among gugma alang sa among isigkatawo nadugangan, ang among mga pagpamatuod nalig-on, ug ang among pagsabut sa gugma sa Manluluwas ug sa Iyang Pag-ula mas milawom.”
Walay Paghunahuna sa Kaugalingon ug Pagkamalaumon
Si Elder Kendall Ayres, kinsa nagserbisyo uban sa iyang asawa diha sa programa sa Perpetual Education Fund, gitawag sa pagdumala ug paghan-ay sa pag-apud-apod sa mga kinahanglanon. Gihulagway niya ang panaghiusa sa Filipino nga mga Santos sa paningkamot sa pagtabang.
“Kini usa ka talagsaon nga talan-awon tungod kay kadtong kinsa nawad-an og labing daghan sa kasagaran nakakapaglag sa ilang kahupayan sa pagboluntaryo ug sa paghatag og tabang ngadto sa uban kinsa naigo og sama ka kusog,” miingon si Elder Ayres. “Akong nasabtan ang mga pamaagi sa ‘pagwagtang sa iyang kinabuhi makakaplag ra niini’ sa paagi nga wala pa gayud nako maangkon sukad sa una. Alang kanako kini dili na usa ka tinuohan—kini usa ka kamatuoran. Aduna pay mas daghan nga mga hangyo sa pag-apil kay sa among gikinahanglan. Ang hilabihang kadaghan sa gihatag nga mga kinahanglanon ug mga paningkamot hapit dili masabtan; kini nahimong usa ka pagpadayag.”
“Sa kinatibuk-an ang mga Filipino mapahiangayon kaayo,” miingon si Elder Benson Misalucha, usa ka Area Seventy sa Philippines Area. Imbis nga tan-awon ang sitwasyon nga positibo o negatibo, “kami nagtan-aw sa sitwasyon ug miingon, ‘Maayo, kini nindot kaayo nga sitwayon, bisan pa og lisud.’”
Ang mga sakyanan nangatuwad o nalubong og katunga diin ang bagyo nga nakaingon sa baha mibiya niini sa Pangasinan, Pilipinas. Ang mga miyembro sa Simbahan mitabang niadtong nanginahanglan, bisan sila mismo sa ilang kaugalingon naapektohan.
Gilitratohan ni Nate Leishman