Nabugkos sa Usag-usa pinaagi sa Pulong sa Dios

Ni David A. Edwards

Mga Magasin sa Simbahan

Usa ka pundok sa seminary sa Berlin, Germany, mipakigbahin og mga hunahuna mahitungod sa mga kasulatan.

Unsa ang kahulugan sa mga kasulatan ngari kanato? Sa unsa nga paagi kita makabaton og usa ka pagpamatuod niini? Sa unsa nga paagi kita mas makasabut pag-ayo niini?

Sama sa uban nga mga tin-edyer nga Santos sa Ulahing mga Adlaw sa tibuok kalibutan, ang batan-on nga mga babaye sa Dahlem Ward, Berlin Germany Stake, nagpangita og mga tubag niini nga mga pangutana pinaagi sa pagtigum matag buntag sa dili pa moeskwela aron sa pagtuon sa mga kasulatan sa seminary. Ang ilang mga kasinatian uban niini nga mga kasulatan makaepekto og lawom sa ilang mga kinabuhi, ug sila andam ug uyon sa pagpakigbahin sa ilang mga pagbati.

Mga Tubag gikan sa mga Kasulatan

Usa sa importante nga mga kasinatian niining batan-on nga mga babaye sa mga kasulatan mao ang pagpangita og mga tubag sa ilang mga pangutana pinaagi sa pagtuon sa kasulatan.

Usahay kon si Sariah Gruse, 16, magtuon sa mga kasulatan, usa ka tubag mogimaw gikan sa pahina, miingon siya. Apan usahay dili nako makita kana nga kasulatan pag-usab sa paagi nga kini tataw ngari kanako kaniadto, tungod kay ang mga hunahuna ug ang Espiritu nga akong nadawat uban niini mao ang tinuoray nga mitabang kanako.

Si Denise Reiner, 16, adunay susama nga mga kasinatian. Nahinumduman niya nga dihay pangutana, nag-abli sa iyang mga kasulatan, ug dayon nakakita sa tubag diha sa pahina nga iyang giablihan. Kini nga kasinatian midani kaniya, apan sa labing kasagaran, siya miingon, “makamatikod ka nga ikaw gigiyahan og diyutay pa, nga ikaw gayud makakita og tubag sa tanan nimong mga pangutana kon ikaw magbasa sa mga kasulatan kanunay.”

Panaghiusa pinaagi sa mga Kasulatan

Kining mga batan-ong babaye nagtuo nga ang mga kasulatan nagtabang kanato nga mahimong maghiusa isip mga Santos sa Simbahan ni Kristo. “Ang ebanghelyo anaa sa mga kasulatan,” miingon si Elizabeth Clark, 16. “Sa tinuod dili gayud kita kinahanglan nga maglantugi ug magbingkil mahitungod niini. Ang mga baruganan anaa diha. Kana makatabang kanato nga maghiusa.”

Miuyon si Sariah: “Ang ebanghelyo managsama ra sa tibuok kalibutan tungod sa mga kasulatan. Walay sapayan asa ka moadto sa kalibutan. Kanunay ikaw nga mobati og kaharuhay diha sa simbahan tungod kay imong makita ang sama nga mga pagtulun-an ug sama nga mga pagtuo.”

Nagtuo si Sarah Clark, 17, nga ang Basahon ni Mormon mas labi nga importante “tungod kay ang ebanghelyo gipahayag diha niana sa tin-aw nga paagi. Kon kita mosunod niini ug sa uban nga mga kasulatan, kini makatabang kanato nga mahiusa ug magpabilin nga maghiusa.”

Kini nga panaghiusa nag-ugmad sa Espiritu, miingon si Elizabeth. “Kon kitang tanan anaa sa panag-uyon sa ebanghelyo, niana inyong mabati ang Espiritu kon kini gitudlo. Kon adunay panagbingkil, ikaw dili gayud mobati sa Espiritu.”

Mas Maayong Pagsabut pinaagi sa Seminary

Kon kini moabut sa pagpalambo og mas maayong pagsabut niini nga mga kasulatan, kining tanang mga batan-ong babaye mouyon nga ang seminary kinahanglanon kaayo. “Diha sa seminary ikaw daghan og makat-unan mahitungod sa katawhan diha sa mga kasulatan ug ang tibuok nga kasaysayan luyo niini,” miingon si Denise.

“Ang seminary usa ka bahin sa akong kinabuhi,” miingon si Lesley Reiner, 17. “Nasayud ako nga kini importante. Kinahanglan personal ka nga magtuon, ug dayon ang seminary anaa alang kanimo sa pagtuon og dungan.”

Midugang si Sarah, “Kanunay akong naglantaw sa pagtuon sa mga kasulatan matag buntag sa seminary. Ang akong pagpamatuod nalig-on. Nagtuo ako nga usa kini ka espesyal nga panahon.”

Alang kang Sariah, ang seminary nahimo nga usa ka dapit sa pakigbahin sa iyang mga pagbati. “Sa una kini lisud alang kanako tungod kay ang akong inahan mao ang magtutudlo sa seminary ug diha akoy pagbati nga ako sa tinuod dili makapahayag sa akong mga hunahuna,” miingon siya. Apan iyang gibuntog ang iyang mga kahingawa ug nakita ang seminary nga mahimong usa ka dapit sa kasiguroan ug suporta sa pagpahayag sa iyang mga pangutana, mga hunahuna, ug mga pagbati mahitungod sa ebanghelyo.

Ang Epekto sa mga Kasulatan

Ang mga kasulatan adunay usa ka tinuod kaayo nga epekto diha sa mga kinabuhi niining mga batan-ong babaye, ug sila nakahimo sa paggamit sa mga kasulatan sa lain-lain nga mga paagi.

Sama pananglit, ang pagtuon sa kasulatan nakatabang kanila sa pagtubag sa mga pangutana sa uban ingon man sa ilang kaugalingon. “Kon kamo nakasabut sa kasulatan ug sa mga baruganan niini,” miingon si Elizabeth, “kon adunay tawo nga mangutana kaninyo og usa ka butang mahitungod sa ebanghelyo, kamo sa tinuod makapasabut niini og mas maayo tungod kay kamo nakasabut niini sa inyong kaugalingon. Kana nakapasayon kaayo niini.”

Dugang pa, si Denise nakakita og kalig-on ug pagdasig pinaagi sa mga kasulatan. “Kon inyo lamang basahon unsa nga matang sa mga tintasyon ang anaa sa mga tawo kaniadto ug giunsa nila kini pagbuntog, kana makapalig-on kaninyo karon.” miingon siya. “Ug kon kamo magbasa diha sa mga kasulatan mahitungod sa tanan nga mga panalangin sa ebanghelyo, niana inyong mahibaloan unsa ang imong makuha agi og balos alang sa pagkamaunongon, ug kana usab maayo nga mahibaloan.”

Tungod sa epekto sa mga kasulatan diha sa ilang mga kinabuhi, kining mga batan-ong babaye karon nakakita sa ilang mga kaugalingon sa usa ka dalan nga naggiya gani ngadto sa mas dako nga pagsabut ug pagpamatuod. Ug sila mibati nga nabugkos sa usag usa sa panaghiusa sa mga Santos sa Ulahing mga Adlaw bisan asa pinaagi sa pulong sa Dios.

Taliwala sa busy nga dapit sa Berlin nga ulohang siyudad sa Germany, usa ka pundok sa mga estudyante sa seminary nakakat-on sa gahum sa mga kasulatan.