Ang Imong Misyon sa Kinabuhi Mao Karon

Ni Jan Pinborough

Mga Magasin sa Simbahan

Tulo ka baruganan ang makatabang kanato sa paglakang ngadto sa kaugmaon uban sa mas dako nga pagsalig, kusog, ug hugot nga pagtuo.

Sa mga katuigan sa akong pagkahingkod, migahin ako og daghan nga panahon nga naghunahuna sa akong kaugmaon. Misyon, kaminyoon, edukasyon, trabaho—tanan niini nagpabilin nga mga pangutana, ug ako walay daghang mga tubag. Andam ako nga motuman sa bisan unsa nga misyon nga gihunahuna sa Ginoo alang kanako, kon mahibaloan ko lamang unsa kini.

Ang akong patriyarkal nga panalangin mihatag sa dako nga hulagway sa katuyoan sa akong kinabuhi. Apan sa pipila ka mga paagi gibati nako nga ingon og ako naningkamot sa pagpangita sa akong dalan ngadto sa tindahan sa grocery gamit ang usa ka mapa sa solar system. Unsa kaha kon nahimo nako ang sayop nga pagliko sa usa ka dapit? Makahimo pa ba gihapon ako sa pagpangita ug pagtuman sa misyon nga gitagana sa Ginoo alang kanako?

Sukad niana, nadiskubrehan nako ang tulo ka mga baruganan nga nakatabang kanako sa paglakang ngadto sa wala mahibalo-i uban sa mas dako nga pagsalig, kusog, ug hugot nga pagtuo.

1. Sa Mubo nga Panahon

Ang unang baruganan adunay kalabutan sa pagkabililhon sa karon.

Nagsugod niadtong 1831, daghan sa unang mga Santos mipuyo og mga pito ka tuig sa Kirtland, Ohio. Gibiyaan nila ang mga panimalay, mga negosyo, ug mga umahan sa New York ug Pennsylvania aron sa pagpanimpalad ngadto sa wala pa masinati nga dapit. Ug misulti kanila ang Ginoo nga kini nga dapit mahimo nga temporaryo lamang:

“Ug ako mopahinungod ngadto kanila niini nga yuta alang sa mubo nga panahon, hangtud Ako, ang Ginoo, mosangkap kanila og lain nga paagi, ug mosugo kanila sa paglakaw gikan dinhi;

“Ug ang takna ug ang adlaw wala ihatag ngadto kanila, busa tuguti nga sila molihok diha niini nga yuta sa daghang mga katuigan, ug kini mobalik kanila alang sa ilang kaayohan” (D&P 51:16–17).

Buot nakong ihulagway kadtong unang mga Santos nga naminaw sa mga panudlo sa Ginoo ug nagtrabaho dayon. Gidaro nila ang umahan nga wala nila mahibalo-i nga sila makaani, gitamnan og mga kahoy kansang bunga tingali dili gayud nila makaon, ug gitukod ang usa ka matahum nga templo nga sa katapusan ilang kinahanglan nga biyaan. Naghulagway ako kanila nga nagpuyo og nagkapuliki, mabungahon nga mga kinabuhi, wala magli-li sa walay pag-undang ngadto sa wala mahibalo-i, naghunahuna asa sila sunod moadto ug kanus-a. Milihok sila “sa daghang mga katuigan,” nagsalig nga ang ilang trabaho dili makawang.

Sa panahon nga sila mibiya sa Ohio sa 1838, ang mga Santos mitabang na sa pagpahimutang og lig-on nga pundasyon alang sa umaabut nga pagtubo sa Simbahan. Hunahunaa unsa ang nahitabo sulod nianang bililhon ug mabungahon nga yugto:

Gitukod ni Propeta Joseph Smith ang Eskwelahan sa mga Propeta, gihuman ang iyang dinasig nga hubad sa Biblia, ug gidawat ang daghan nga importante nga mga pagpadayag.
Ang Unang Kapangulohan, ang Korum sa Napulog Duha ka mga Apostoles, ug ang Kapitoan gihan-ay.
Ang Templo sa Kirtland gitukod ug gipahinungod. Didto nakita ni Joseph Smith ug ni Oliver Cowdery si Jesukristo ug gidawat ang mga yawe sa priesthood gikan ni Moises, Elias, ug Elijah.
Ang unang mga misyonaryo gipadala ngadto sa Inglatera.

Ang hingkod nakong mga katuigan hilabihan kaayo ka bililhong “gagmay nga panahon” gihatag ngari kanako sa Ginoo. Sa panahon sa hingkod natong katuigan, ang mga pisikal ug mental nga kusog anaa sa ilang kinatumyan. Makapahimulos kita niini pinaagi sa paghukom sa pagsalig diha sa Ginoo ug sa paglihok “sa daghang katuigan.” Dayon kini nga mga katuigan mahimo nga usa ka gihalad nga panahon sa talagsaon nga pagkamabungahon, pagtubo, pagkat-on, ug pagserbisyo.

2. Usa ka Misyon Matag Adlaw

Ang ikaduha nga mahinungdanon nga baruganan miabut gikan sa usa ka yano nga pagkaamgo. Ang akong misyon sa kinabuhi wala maghulat kanako diha sa hanap ug layo nga kaugmaon. Kini matag adlaw ug nagpadayon.

Gipasabut ni Presidente Brigham Young (1801–77): “Walay lalaki o babaye dinhi niini nga Simbahan kinsa wala magmisyon. Kana nga misyon molungtad hangtud nga sila buhi pa.”¹ Sa lain nga pulong, ang akong misyon sa kinabuhi nasugdan na. Wala kaayo nako kinahanglana nga makit-an kini kay sa pag-ila niini.

Nakit-an nako ang usa ka paagi sa pag-ila niini pinaagi sa pagsabut sa tulo ka mga elemento nga kabahin na sa akong kinabuhi:

Usa ka talagsaon nga hut-ong sa personal nga mga gasa.
Usa ka talagsaon nga hut-ong sa personal nga mga hagit.
Piho nga mga panginahanglan sa kalibutan nga buot sa Ginoo nga akong atubangon.

Sa yano nga pagkasulti, kita nagtuman sa atong misyon sa matag panahon nga kining tulo ka mga elemento nagsapaw ug kita nagpili sa paglihok. Hunahunaa kon sa unsa nga paagi kini mi-epekto diha sa kinabuhi ni Jose sa Daang Tugon (tan-awa sa Genesis 37–47).

Si Jose adunay daghan nga mga gasa. Gimatuto siya sa usa ka pamilya nga adunay kahibalo sa Dios, ug usa siya ka manununod sa pakigsaad sama kang Abraham. Siya adunay espirituhanon nga gasa sa paghubad og mga damgo.

Siya usab adunay daghan nga mga hagit. Kini ingon ngari kanako nga ang pipila sa mga hagit ni Jose milakip og usa ka amahan nga mipakita og may pinalabi, maigihon nga managsoong mga lalaki, ug ang iyang kaugalingon nga pagkakulang og kabuot sa pagtagad kanila. Sa iyang batan-on nga kinabuhi siya gibaligya ngadto sa pagkaulipon diha sa usa ka langyaw nga nasud, gibutang-butangan og sala sa imoral nga pamatasan ug gibalhog sa bilanggoan.

Apan si Jose andam usab sa paglihok, ginamit ang iyang mga gasa ug ang iyang mga hagit sa pagtubag sa piho nga mga panginahanglan diha sa iyang kalibutan. Sa daghan nga mga okasyon, lakip sa pagkabilanggo, mipili siya sa paggamit sa iyang espirituhanon nga gasa sa paghubad sa mga damgo sa mga tawo. Kini nga pagpili, nakapahimo, pag-abli og oportunidad sa pagtrabaho alang sa faraon, sa pagtipig og pagkaon alang sa Ehiptohanong mga katawhan. Tungod kay siya maunungon ug kugihan sa iyang buluhaton, si Jose nakahimo og usa ka makaluwas sa kinabuhi nga misyon, nagluwas og daghan, lakip sa iyang kaugalingon nga pamilya, gikan sa kagutom.

Ang mga gasa ug ang iyang mga hagit natipon sa pagbutang kaniya diha sa usa ka talagsaon nga posisyon sa pagtubag sa diha nga ang kagutom miabut sa yuta. Tungod kay si Jose mao kinsa siya ug hain siya ug tungod kay siya mipili sa paglihok nga maunungon ug masulundon, mituman siya sa usa ka talagsaon nga misyon sa pag-alagad sa Ginoo, sa katawhan sa Ehipto, ug sa iyang kaugalingon nga pamilya.

Apan kining tulo ka mga elemento wala magsapaw diha lamang sa mga kinabuhi sa katawhan nga atong nabasahan sa mga pahina sa mga kasulatan. Nagsapaw kini matag adlaw sa atong matag kinabuhi.

Usa ka hingkod nga babaye adunay gasa sa pagsulat ug pipila ka personal nga kasinatian uban ang kaguol. Sa diha nga ang iyang tin-edyer nga igsoong babaye nagsagubang og malisud nga sitwasyon sa eskwelahan, nakahimo siya sa pag-ila nga ang iyang igsoong babaye anam-anam na nga nawad-an og paglaum. Namati sa mga pag-aghat sa Espiritu, gisulatan niya ang iyang igsoon nga babaye og nagsunod-sunod nga maanindot nga mugbong mga sulat, usa alang sa matag adlaw ilabi na sa malisud nga duha ka semana nga panahon. Niana nga gamay nga pagpili sa pag-atubang sa panginahanglan sa iyang igsoon nga babaye, kini nga batan-ong babaye nagpuyo didto sa iyang misyon.

Sa higayon nga kining pagpili sa pagpamati sa Espiritu ug sa paglihok nga nagpadayon matag adlaw, matag semana, matag tuig, kini nagmugna og usa ka mas dako nga sumbanan nga sa kadugayan atong maila isip ang misyon nga gihatag sa Ginoo kanato nga atong tumanon.

3. Humilom Kamo ug Ilha

Sa mga tuig lapas sa akong pagka-20 karon, sa katapusan ako nakaila nga ang akong kinabuhi nabukhad sa mao gayud nga paagi nga gihulagway sa akong patriyarkal nga panalangin sa daghang katuigan nga milabay. Kana sa tinuod wala mahimo tungod kay ako sa eksakto nasayud unsa ang akong gibuhat ug asa ako dad-on sa akong kaugmaon. Sa labing tinuod ako wala masayud.

Dihay pipila ka mga kalisdanan sa akong kinabuhi ug mga kapakyas nga nakapatingala kanako kon kini natipas ba sa dalan. Apan ang nahitabo niini, dili kinahanglan nga ako maguol. Nasayud kanunay ang Ginoo kon asa na ako ug kon asa ang gusto Niya nga akong adtoan. Kanunay akong naningkamot sa akong labing maayo nga pagsunod sa Iyang mga sugo, pagserbisyo Kaniya, ug sa pagpamati sa Espiritu. Bisan tuod sa kasagaran ako dili makasabut niini niana nga higayon, karon ako makaila nga ang Iyang kamot kanunay nga naggiya sa akong kinabuhi.

Kining katuigan sa pagkahingkod puno sa importanteng mga desisyon ug pipila ka tiunay nga kabalaka ug kaugtas. Apan mas dako nga pagsalig moabut kon kita magkat-on nga mosalig sa gahum sa Ginoo sa pagpahinabo sa iyang katuyoan alang sa atong kinabuhi—matag adlaw. Niana kita mas maayo “magpakahilom, ug ilhon nga [Siya mao] ang Dios” (Salmo 46:10). Ug sa pagbuhat sa ingon, nagsinati kita og kalinaw.

Ang unang mga Santos sa Kirtland milihok “sa daghang katuigan,” masaligon nga ang ilang mga buhat dili makawang. Samtang kamo usab nagsalig diha sa Ginoo ug naglihok “sa daghang katuigan,” kamo makahimo sa labing maayo sa matag yugto sa inyong kinabuhi.

Tungod sa iyang mga gasa, iyang mga hagit, ug iyang pagkamaunungon, si Jose sa Ehipto makatuman og usa ka talagsaon nga misyon sa pag-alagad sa Ginoo ug sa uban. Kining sama nga tulo ka elemento nagsapaw matag adlaw sa atong matag mga kinabuhi

Paghulagway sa litrato pinaagi ni John Luke;Panahon, Mga Talento, ug Tanan nga Anaa Kanimoni Garth Oborn, dili mahimong kopyahon