AngGahum sa Pag-usab

Pangalan gipugngan

Bisan tuod natawo ako sa Simbahan ug aktibo hangtud sa edad nga 15, nahilayo ako sa ebanghelyo panahon sa akong pagkabatan-on. Nianang higayona, sa pagpangita og usa ka butang nga makapalipay kanako, midangup ako sa druga.

Nanglimbasug ako uban sa nagkagrabe nga pagkaadik, ug ang kinabuhi nako daw sama sa usa ka bati nga salida nga dili na nako mapalong. Bisan pa og gusto kong mohunong, nabantayan nako nga naglisud gyud ko sa pagkontrolar sa akong mga hunahuna o mga lihok. Wala nako makita kon unsay nawala kanako hangtud nga ako napriso tungod sa usa ka krimen nga may kalabutan sa druga. Aduna koy kopya sa Basahon ni Mormon ug nakabasa sa Alma 5:7: “Tan-awa, siya miusab sa ilang mga kasingkasing; oo, siya mipukaw kanila gikan sa lawom nga pagkatulog, ug sila nahigmata ngadto sa Dios. Tan-awa, sila anaa taliwala sa kangitngit; bisan pa niana, ang ilang mga kalag nalamdagan pinaagi sa kahayag sa walay katapusan nga pulong.”

Nasayud ko nga ako anaa taliwala sa kangitngit, ug gusto nakong usbon ang akong kasingkasing.

Dili man sa ingon nga wala ako maningkamot sa pag-usab sa una. Miapil ko sa nagkalain-laing mga programa sa pagbag-o. Naningkamot ko nga mohunong alang sa akong kaugalingon ug alang sa akong pamilya. Kadtong mga butanga maayo man sa sinugdanan, apan kanunay akong masayop. Kining bersikulo sa Alma mihatag kanako og paglaum kang Jesukristo—paglaum nga bisan kon ako walay gahum sa pag-usab sa akong kaugalingon (ug nasayud ako nga wala gayud ako niana), makausab Siya kanako.

Nakahinumdom ako nga akong gihatag ang akong palas-anon sa adiksyon ngadto sa Manluluwas. Nag-ampo ug miangkon ako ngadto sa Langitnong Amahan, “Dili ni nako mahimo sa akong kaugalingon.”

Misulod ako sa programa sa LDS sa pagbag-o, usa ka klase nga adunay 12 ka lakang nga itudlo sa mga misyonaryo, nga managtiayon. Ang mga butang nga ilang gipangtudlo sa klase miluwas kanako. Giamuma nila ang liso sa hugot nga pagtuo nga natanom na sa dugay nga mga panahon, sa dihang bata pa ako misimba ako uban sa akong inahan. Mitudlo ang mga misyonaryo kanako kabahin sa paghinulsol ug pagpasaylo. Labaw sa tanan, mipakita sila kanako og gugma ug misulti ngari kanako nga makakita pa ako og mas dakong gugma gikan sa akong Langitnong Amahan ug Manluluwas. Mibati ko og “dako nga kausaban nga nahimo diha sa [akong] kasingkasing” (Alma 5:12), ug nakita nako nga ang kalipay nga dugay na nakong gipangita anaa ra gayud sa ebanghelyo.

Mga unom na ka tuig sukad nga mihukom ako sa pagbalik ngadto sa akong Manluluwas. Grabing trabaho ang gikinahanglan, apan pinaagi sa kalig-on sa Ginoo, nabuntog nako ang daghang mga babag.

Dili gayud nako unta mahunahuna ang hingpit nga kalipay nga naangkon nako karon sa akong kinabuhi uban sa akong asawa ug mga anak. Naghupot ko karon sa Melchizedek Priesthood ug nakadawat sa mga ordinansa sa templo. Ipasidungog ko kining positibong kausaban sa akong kinabuhi ngadto kang Jesukristo. Siya ang gahum sa kausaban.

Mopamatuod ako sa uban nga nanglimbasog sama nako sa una—ug niadtong naghigugma kanila—nga ang kausaban posible ug kana tinuod gayud. Dili kinahanglang magpakawala kamo sa paglaum. Walay laing agianan padulong sa kalipay, ug kini pinaagi kang Jesukristo.

Pag-ayo Sa Masulub-ong Kasingkasing, ni Michael T. Malm