Ang Kabubut-on Importante sa Atong Mahangturong Pag-uswag

Gihatagan kita sa atong Langitnong Amahan og kabubut-on. Kining abilidad sa pagpili sa alang sa atong kaugalingon usa ka importanting bahin sa plano sa kaluwasan.

Sa Konseho sa Langit sa kinabuhi sa wala pa dinhi sa yuta, ang Langitnong Amahan mipresentar sa Iyang plano, nga naglakip sa baruganan sa kabubut-on. Mirebelde si Lucifer ug “nagtinguha sa paglaglag sa kabubut-on sa tawo” (Moises 4:3). Tungod niini, siya ug kadtong misunod kaniya gilaglag. Ang nahabilin mipili sa plano sa Langitnong Amahan, nga mitugot kanato sa pag-anhi sa yuta ug pag-angkon og pisikal nga lawas. Kini nagpadala usab og usa ka Manluluwas, si Jesukristo, kinsa moula sa atong mga sala. Pinaagi sa paghinulsol kita mahimong mapasaylo. Misinggit kita sa kalipay (tan-awa sa Job 38:7)!

Kon giunsa nato paggamit ang atong gasa sa kabubut-on dinhi sa yuta makaapekto sa atong mahangturong kalipay o kaalaut. Nagtudlo kanato ang mga kasulatan nga “adunay usa ka balaod, nga dili mausab nga sugo didto sa langit … , diha ang tanan nga mga panalangin gipasikad” (D&P 130:20)—ug niini usab nga balaod adunay “silot nga gipauban” (Alma 42:22). Busa, kon mopili kita sa atong mga gustong buhaton, mipili usab kita sa mga sangputanan sa atong mga binuhatan (tan-awa sa Mga Taga-Galacia 6:7). Hinoon ang mga sangputanan mahimong dili diha-diha dayon, apan mosunod gayud kini. Ang pagpili sa pagsunod sa mga sugo sa Dios modala kanato ngadto sa kalinaw ug kinabuhing dayon. Ang pagpili sa pagdawat sa mga tintasyon ni Satanas modala kanato ngadto sa sala ug kasakit.¹

Ang propeta sa Daang Tugon nga si Josue mipakita sa ehemplo alang kanato sa dihang siya miingon, “Magpili kamo niining adlawa kong kinsa ang inyong alagaron; … apan alang kanako ug sa akong balay, kami mangalagad sa Ginoo” (Josue 24:15).

Ang atong mortal nga kinabuhi usa ka panahon sa pagsulay aron sa pagpakita kon unsaon nato paggamit ang atong kabubut-on (tan-awa sa Abraham 3:25).
Kinahanglan adunay “katugbang sa tanan nga mga butang” aron makita nato ang kalainan sa maayo ug dautan. Naghatag kini kanato og oportunidad sa pagpili. (Tan-awa sa 2 Nephi 2:11–16; D&P 29:39.)
Ang atong Langitnong Amahan mihatag sa matag usa kanato sa Kahayag ni Kristo aron masayud kita sa maayo gikan sa dautan (tan-awa sa Moroni 7:12–17).
Kon mopili kita sa atong gustong buhaton, maayo man o dili, nagpili usab kita sa mga sangputanan uban sa atong mga binuhatan (tan-awa sa Deuteronomio 11:26–28; 30:15–20; Mga Taga-Galatia 6:7; Pinadayag 22:12).
Tungod kay “[kita] gitugutan pagbuhat alang sa [atong kaugalingon],” kita ang responsable sa atong mga binuhatan (tan-awa sa Helaman 14:30–31).
Kon mopili kita sa pagsunod sa mga sugo sa Dios, ang atong mga kapilian modaghan, ug mas aduna kitay kagawasan (tan-awa sa 2 Nephi 2:27; D&P 58:26–28; 93:20).
Kon mopili kita sa pagsupak sa mga sugo sa Dios, ang atong mga kapilian mogamay, ug mahimo kitang bihag sa kadautan (tan-awa sa 2 Nephi 2:29; Juan 8:34).
Ang atong Langitnong Amahan “dili motugot nga [kita] pagapanulayon sa labaw sa [atong] kaarangan; apan … magatagana og lutsanan sa paglikay,” kon mopili kita sa pagbuntog sa tintasyon (1 Mga Taga-Corinto 10:13).
Kinahanglan kitang magmapainubsanon sa atong mga kaugalingon ug “mag-ampo sa kanunay” aron makabuntog kita sa tintasyon (tan-awa sa Alma 13:28).

Human sa Pagkapukan, sila si Adan ug Eva “adunay moral nga kabubut-on o abilidad sa pagpili tali sa maayo ug sa dautan. Nakapahimo kini kanila nga makat-on ug mouswag. Nakapahimo usab kini kanila sa paghimo og sayop nga mga pagpili ug makasala” (Isangyaw ang Akong Ebanghelyo [2004], 58).

Paghulagway sa litrato pinaagi ni Matthew Reier, gawas kon gipahibalo; litrato sa yuta © Corbis; Si Adan ug si Eva Gipapahawa sa Tanaman sa Eden, ni Gary Kapp; paghulagway sa litrato sa usa ka tawo ug kawani sa pulis pinaagi ni Robert Casey