Unsa ang Tinuod nga Kaanyag?

Miingon si Presidente Monson niining mensahe, “Sa atong kalibutan, ang moral nga kinaiya kasagaran daw ikaduha ra sa kaanyag o pagkamabihagon. Mahimong manlimbasug ang mga batan-ong babaye sa ilang mga panagway kon si kinsa sila ug unsa nga sila mamahimo. Ikonsiderar kining mga panghunahuna kabahin sa tinuod nga kaanyag gikan ni Elder Lynn G. Robbins sa Seventy:

Ang usa ka batan-ong babaye kansang panagway nagsanag ang kalipay ug hiyas nagdan-ag og kaanindot sa sulod sa kaugalingon.
Ang mahiyasong pahiyum sa tinuod matahum samtang kini nagdan-ag sa hingpit nga natural nga paagi. Kining tinuoray nga kaanyag dili mapintal apan kini usa ka gasa sa Espiritu.
Ang kaligdong usa ka makitang timailhan ug kinahanglanon alang sa kaanyag sulod sa kaugalingon.
Kon kamo wala ganahi sa inyong hitsura, makatabang ang pagtan-aw sa inyong kaugalingon pinaagi sa mga mata niadtong nahigugma kaninyo. Ang dili makita nga kaanyag nga nakita sa mga hinigugma mahimong usa ka salamin alang sa mga paglambo sa kaugalingon.
Ang matang sa lalaki nga gustong minyoan sa usa ka mahiyasong babaye mao usab kadtong “dili magtan-aw” ingon sa makita sa natural nga tawo (tan-awa sa 1 Samuel 16:7). Madani siya niadtong tinuod nga kaanyag nga nagsanag gikan sa usa ka putli ug madasigong kasingkasing. Sama kini ka tinuod sa usa ka batan-ong babaye kinsa nangita og usa ka mahiyasong batan-ong lalaki.
Nagdahum ang atong Amahan sa Langit nga tanan Niyang mga anak mopili sa husto, nga mao lamang ang paagi ngadto sa mahangturong kalipay ug kaanyag sulod sa kaugalingon.
Diha sa Ginoo, walay kompetensya. Ang tanan adunay managsama nga kahigayunan sa pagkulit sa Iyang hitsura diha sa ilang mga panagway (tan-awa sa Alma 5:19). Walay mas tinuod nga kaanyag.

Aron sa pagbasa sa tibuok mensahe, tan-awa sa Lynn G. Robbins, “True Beauty,” New Era, Nob. 2008, 30. Makakita og susamang tambag ang mga batan-ong lalaki sa Errol S. Phippen, “Bati og Nawong nga Piso nga Itik o Halangdong Gansa? Kini Nag-agad ra Kanimo,” Liahona, Okt. 2009, 36.