Lagyo nga Family Home Evening
Isip usa ka pamilya kanunay kami nga maghimo og family home evening; hinoon, ang akong amahan kanunay nagbiyahe sulod sa dugay na nga mga panahon alang sa iyang panarbaho. Usahay kana nagpasabut nga siya atua sa laing lugar kon panahon na alang sa family home evening.
Unya duha ka tuig ang milabay, sa diha nga ang akong amahan nakakuha og iyang kaugalingon nga laptop, usa sa akong mga igsoon naghunahuna, “Nganong dili himoon ang atong mga family home evening uban ni Papa pinaagi sa Internet?”
Sukad niana nga panahon, kon ang akong amahan layo panahon sa family home evening, kami magsabut lamang og oras, ug ikonektar namo. Makakita ug makadungog kami niya, ug siya makakita ug makadungog namo. Ang Internet ug ang computer nagtugot sa among amahan sa pag-apil sa among mga family home evening.
Kami dili kinahanglan nga mobiya sa among naandan nga eskedyul: kon kini turno na ni Papa sa paghatag og leksyon, pananglit, ihatag niya kini. Usa sa mga tradisyon sa among pamilya mao ang pagtimbang-timbang sa among personal nga mga katuyoan sa matag semana; kini wala na gayud mahunong. Ug lain nga importante nga butang: ang among pagbasa sa Basahon ni Mormon isip usa ka pamilya karon nagpadayon na, tungod kaya kami wala nay mga ikabalibad sa dili pagbasa.
Naggamit usab ang akong amahan sa Internet aron makakontak namo sa lain nga mga paagi. Kon siya layo gikan sa among panimalay sa Peru, iyang ikonektar ug makahibalo unsa ang among gibuhat ug hain kami. Ug kon kini panahon na alang sa mga interbyu o mga pagtambag sa pamilya, kini gihimo diha sa gitakda nga oras, bisan kon siya nagbiyahe.
Adunay daghan nga maayo ug magamit nga mga pag-uswag sa teknolohiya nga sa kasagaran wala nato gamita sa maayo tungod kay nahadlok kita sa ilang dili husto nga paggamit ug ang kadaot nga ilang mahimo kanato. Bisan pa niana, kon gamiton nato ang mao nga teknolohiya sa maalamon ug mapainubsanon nga paagi, kini mahimo nga dako kaayo nga tabang.
Kami sa among pamilya mibati nga mapasalamaton kaayo alang sa Internet tungod kay kini nahimo nga usa ka dako kaayo nga himan alang sa pagkuha sa mga babag nga tingali sa lain nga paagi magpalayo sa among pamilya.
Usa sa akong mga igsoon nangutana, “Nganong dili himoon ang atong mga family home evening uban ni Papa pinaagi sa Internet?”
Paghulagway sa litrato pinaagi ni David Stoker