Mga Pangutana ug mga Tubag
“Ako nag-ampo ug nagtuon sa mga kasulatan sulod sa dugay na nga panahon, apan ako mora og wala gayud makadawat og tubag sa akong mga pangutana. Ngano nga ang Ginoo wala mopanalangin kanako og usa ka pagpamatuod?”
Ang pipila ka mga tawo naghulagway og mahinuklugon, gani milagroso, nga mga kasinatian diin ilang naangkon ang ilang mga pagpamatuod. Apan labaw sa kasagaran ang usa ka pagpamatuod moabut og hinay-hinay sa hilum nga paagi. Kon ikaw wala makadawat og gamhanan nga espirituhanong saksi, ayaw pagpakawala og kadasig. Nahimo na nimo ang unang lakang ngadto sa pag-angkon og usa ka pagpamatuod pinaagi sa pagtinguha sa pagtuo (tan-awa sa Alma 32:27). Ang imong Langitnong Amahan nahigugma kanimo ug gusto nga mopanalangin kanimo og usa ka pagpamatuod —apan sa Iyang kaugalingon nga panahon ug sa Iyang kaugalingon nga paagi (tan-awa sa D&P 88:68).
Dili ang tanan makadawat og usa ka pagpamatuod sa sama nga paagi. Ang uban mobati og “kainit sa dughan” (tan-awa sa D&P 9:8). Ang uban mobati sa Espiritu Santo nga nagsulti sa mga kamatuoran diha sa ilang mga hunahuna ug mga kasingkasing (tan-awa sa D&P 8:2). Moabut usab ang imong saksi pinaagi sa hinay, hinagawhaw nga tingog sa Espiritu. Hangyoa ang Langitnong Amahan sa pagtabang kanimo sa pag-ila niining malumo nga mga pag-aghat.
Usa ka gamhanan nga paagi sa pag-angkon og pagpamatuod mao ang pagkuha og mga oportunidad sa pagpakigbahin sa ebanghelyo ngadto sa uban. Samtang ikaw nagtudlo sa mga kamatuoran sa ebanghelyo, ang Espiritu makasaksi nganha kanimo, ingon man ngadto sa uban, nga unsa ang imong gisulti tinuod.
Padayon sa pag-ampo uban ang hugot nga pagtuo ug sinseridad, mapailubon nga maghulat alang sa tubag sa Ginoo. Samtang ikaw magsunod sa mga sugo, ikaw mahimong takus sa pakig-uban sa Espiritu Santo, ang tinubdan sa pagpamatuod.
Pag-ampo Kanunay
Nakasabut ako unsa ang imong gisinati. Nanglimbasog ako sa malisud nga mga panahon diin ang akong pagpamatuod nauyog. Ang paagi nga ako nakabuntog niini—ug nakaangkon sa nalig-on nga pagpamatuod nga ako aduna karon—mao ang kanunay nga pagtuon sa kasulatan ug pag-ampo. Nagbasa ako sa akong mga kasulatan matag oportunidad nga ako aduna. Nag-ampo ako buntag ug gabii, naningkamot sa pagbati sa Espiritu. Apan kining tanan ingon og kawang. Apan usa ka adlaw, sa dihang miabut ako sa panimalay gikan sa eskwelahan, miluhod ako sa kilid sa akong katre. Wala ako masayud unsa ako kadugay nag-ampo, apan nakadawat ako og tubag. Pag-ampo lamang sa kanunay. Pagtuon sa mga kasulatan. Makaplagan nimo ang tubag nga imong gipangita.
Christopher W., 15, Nevada, USA
Magpakasinsero
Nasayud ang Langitnong Amahan sa imong kasingkasing bisan sa wala pa ikaw mangayo; naghulat lamang Siya kanimo sa pagdala sa imong mga pangutana diha sa Iyang atubangan diha sa sinsero nga pag-ampo. Ako adunay usa ka personal nga pagpamatuod nga Siya motubag sa mga pag-ampo. Madawat tingali nimo ang diha-diha nga tubag, o tingali kini moabut og dugay-dugay, apan nasayud ako sa tinuoray nga Siya motubag. Pagmapailubon ug padayon diha sa imong pagkamaunungon.
Sharon F., 20, Lagos, Nigeria
Pamati ngadto sa Espiritu Santo
Pag-ampo alang sa paggiya sa pagpangita og personal nga kaalam. Ang Langitnong Amahan namati ug nagtubag sa tanan natong mga pag-ampo. Moabut ang mga tubag pinaagi sa mga pag-aghat sa Espiritu Santo. Pangayo diha sa hugot nga pagtuo, pagmapainubsanon, sunda ang mga sugo, ambit sa sakrament sa katakus, hinay-hinay og pamalandong sa mga kasulatan, ug tinguhaa sa mapailubon nga paagi ang kabubut-on sa Dios.
Ana Mae R., 20, Davao Oriental, Philippines
Ihatag ang Imong Pagpamatuod
Gitudlo sa mga lider sa Simbahan nga agi og dugang sa pagpangutana, kinahanglan kita nga makigbahin sa atong mga pagpamatuod kon unsa ang atong gusto nga masayran, bisan tuod wala pa nato madawat ang usa ka lig-on nga tubag. Nag-ampo ako alang sa usa ka pagpamatuod sa makadaghan nga higayon ug wala madawat ang saksi nga akong gipangita hangtud gipakigbahin nako ang akong pagpamatuod sa ebanghelyo ug sa Pagpahiuli. Bisan tuod wala pa ako makabaton og lig-on nga pagpamatuod, nadawat ko kanang tataw, malumo, gamhanan nga panghimatuod sa Espiritu Santo. Nasayud ako nga kon ikaw makigbahin sa imong pagpamatuod, ang Ginoo molig-on niini.
Aura O., 18, Huila, Colombia
Pagpuasa ug Pag-ampo
Ang pag-ampo ug puasa moandam sa espirituhanong yuta diin ang imong pagpamatuod motubo, ug ang inyong pagpamatuod mahimo nga kalig-on ug angkla sa pagtabang kanimo sa pagsagubang sa matag pagsulay ug pagtintal. Ang usa ka pagpamatuod maangkon pinaagi sa pagkamakanunayon; ang atong kakugi nagtabang kanato sa pagbati sa kamatuoran. Kinahanglan gayud nga magpuasa kita sa makadaghan nga panahon sama sa gibuhat ni Alma (tan-awa sa Alma 5:45–46). Tingali ang imong pagpamatuod gamay pa sa una, apan samtang magpadayon ka sa pag-ampo ug pagsiksik sa mga kasulatan, magsugod ka sa pagkakita sa mga bunga sa imong hugot nga pagtuo.
Elder Zubieta, 20, Colombia Cali Mission
Pangitaa ang Balaan nga Pagpadayag
Isip usa ka bag-o nga kinabig ako adunay oportunidad sa pag-adto sa templo aron sa pagpahigayon og pipila ka mga pagbunyag alang sa akong mga katigulangan. Samtang mibarug ako diha sa tubig aron sa pagpahigayon niining sagrado nga ordinansa, ako adunay lig-on nga pagbati nga ang bunyag alang sa patay balaan. Sukad niana nakahimo ako og pagpamatuod sa mga bunyag alang sa patay. Sa akong pagsabut, ang pagpamatuod gipasabut isip balaan nga pagpadayag ngadto sa tawo nga may hugot nga pagtuo. Sa pag-angkon og pagpamatuod, kinahanglan gayud kita nga mag-ampo, magtuon sa mga kasulatan, ug magsunod sa mga pagtulun-an ni Jesukristo. Diha sa gamot sa matag pagpamatuod kinahanglan gayud ang usa ka matarung nga kinabuhi; kay kon dili, ang Espiritu dili makasaksi sa buhat sa Ginoo sa atong panahon.
Mariam N., 19, Accra, Ghana
Ayaw Gayud Pag-undang
Ang pag-angkon og pagpamatuod mahimong madugay. Adunay daghan nga mga butang nga imong mahimo sa pag-angkon og dili matarug nga pagpamatuod. Ayaw lamang gayud pag-undang og pangayo sa Langitnong Amahan alang sa mga tubag sa imong mga pag-ampo.
Wilben G., 18, Benguet, Philippines
Pagbaton og Pailub
Usahay ang atong mga pag-ampo dili matubag diha-diha dayon. Ang mga tubag mahimong madugay ug moabut sumala sa mga tinguha sa kasingkasing sa tawo. Usa sa mga kalidad sa usa ka Santos mao ang pagpailub. Padayon sa pag-ampo, pagtuon sa mga kasulatan, pagsunod sa mga sugo, ug paminaw sa mga pagpamatuod sa uban. Hatagi usab og higpit nga pagtagad ang mga pag-aghat sa Espiritu Santo. Mahimo nga moabut ang tubag sa panahon nga wala nimo damha kini.
Chioma O., 15, Abia, Nigeria
Pagmalinawon
Ang Langitnong Amahan kanunay andam nga motubag kanato; hinoon, usa ka butang sulod kanato usahay makapugong kanato gikan sa pagdawat sa mga tubag nga atong gitinguha. Nagtuo ako nga ang labing maayo nga paagi sa pag-angkon og pagpamatuod mao ang pagmalinawon, sa espirituhanon ug sa pisikal nga paagi. Niana nga paagi, kon kita mag-ampo ug magbasa sa mga kasulatan, maandam kita sa pagdawat.
Monica N., 19, Lima, Peru