Naglukso-lukso dungan sa Tugtog nga Jamaica
Sa usa ka mainit nga gabii sa Kingston, Jamaica, imo tingali nga makit-an si Samuel (edad 10) ug si Giordayne (edad 7) sa gawas naglukso-lukso uban sa ilang duha ka igsoon nga mga lalaki. Samtang naglukso-lukso sila, nagkanta sila duyog sa tugtog:
1, 2, 3, Aunty Lulu,
4, 5, 6, Aunty Lulu,
7, 8, 9, Aunty Lulu,
10, Aunty Lulu,
10, Aunty Lulu.
Si Samuel ug si Giordayne duha ka malipayon nga mga bata kinsa maayo sa daghan nga mga butang. Malingaw silang magdula og mga sport, magtuon og maayo sa eskwelahan, magtabang sa panimalay, ug mahimo nga ehemplo ngadto ngadto sa naglibut kanila uban sa ilang dagko nga mga pahiyum ug malipayon nga mga kinaiya.
Mga Adlaw sa Ting-eskwela
Sa Jamaica, ang mga eskwelahan adunay Adlaw sa Batang Lalaki ug Adlaw sa Batang Babaye matag tuig. Sa Adlaw sa Batang Babaye, ang mga batang lalaki dili moeskwela. Hinoon, ang mga inahan mahimong moadto sa eskwelahan uban sa ilang mga anak nga babaye. Sila adunay talent show, kontest sa spelling, ug uban nga makalingaw nga mga kalihokan.
Napili si Giordayne gikan sa iyang klase sa pag-apil sa kontest sa spelling, ug midaug siya. “Ang akong paboritong pulong nga espilingon mao ang kalikupan,” miingon si Giordayne.
Sa Adlaw sa Batang Lalaki, ang amahan mahimo nga motambong sa eskwelahan uban sa ilang mga anak nga lalaki. Miapil si Samuel sa kontest sa pagsulat. Misulat siya og usa ka artikulo nga nagpasabut kon giunsa niya sa pagpakita og pagtahud sa iyang kaugalingon ug sa uban. Midaug usab siya sa unang ganti.
Usa ka Pagbisita ngadto sa Templo
Naglantaw si Samuel sa adlaw nga siya makatambong sa templo. Alang sa daghan nga mga pamilya sa Jamaica, kini usa ka dako nga sakripisyo sa pagduaw sa templo tungod kay walay templo didto. Mahal ang gasto sa pag-adto sa United States sa pagtambong sa templo.
Maayo gani, ang pamilya ni Samuel ug ni Giordayne nakahimo sa pag-adto. Miingon si Samuel, “Ang akong paborito nga bakasyon sa pamilya mao ang among pag-adto sa Siyudad sa New York sa pagduaw sa akong iyaan. Nakita namo ang Templo sa Manhattan. Kini mao ra gayud ang templo nga akong nakita sukad.”
Nahinangop ang tibuok pamilya sa diha nga ang Templo sa Siyudad sa Panama, Panama giablihan sa pagka-2008 tungod kay kini dili sama kalisud sa pag-adto didto. Kausa o kaduha sa usa ka tuig, ang mga miyembro sa Jamaica nagbiyahe ngadto sa Templo sa Siyudad sa Panama, Panama. “Naghinam-hinam ko sa pag-adto sa templo kon ako mag-12 na,” miingon si Samuel.
Usa ka Tubag sa Pag-ampo
Usa ka higayon ang kompaniya sa ilang amahan pagasirhan. Giawhag ni Giordayne ang iyang pamilya sa pagpangayo sa Langitnong Amahan alang sa panabang. “Makugihon kaayo si Giordayne sa iyang mga pag-ampo. Nagpahinumdom siya kanunay sa among pamilya sa mga butang nga among kinahanglan nga i-ampo,” miingon ang iyang inahan. Ang mga pag-ampo sa pamilya gipangtubag sa diha nga ang ilang papa nakakuha og bag-ong trabaho. “Nasayud ako nga kon kita mag-ampo, ang tanan mahimo nga OK,” masaligon nga misulti si Giordayne.
Duha ka Maayo Kaayo nga mga Magtutudlo
Nangandoy si Samuel nga mahimong usa ka magtutudlo kon siya modako na. Gusto siyang motudlo sa iyang paborito nga mga subject: matematika ug siyensya. Si Giordayne, kinsa nagtahud sa iyang magulang nga lalaki, gusto usab nga mahimong usa ka magtutudlo.
Si Samuel ug si Giordayne mga magtutudlo na karon pinaagi sa pagkamaayo nga ehemplo ngadto sa ilang mga higala. Adunay diyutay lamang nga mga bata sa ilang eskwelahan kinsa mga miyembro sa Simbahan.
“Kon adunay usa ka tawo nga naghimo og usa ka butang nga ngil-ad, sama sa pakigsumbagay, sultihan nako sila sa pagbuhat unsay matarung,” miingon si Samuel.
Mahimuot si Samuel ug si Giordayne sa pagpakigbahin sa ilang mga pagpamatuod, ug ang ilang presidente sa Primary nasayud nga siya makasalig diha kanila sa paghatag og pakigpulong kon ang mamumulong dili makatambong. Sa mga buntag sa Dominggo mobangon sila og hilabihan ka sayo aron sa pag-andam og pakigpulong kon ugaling gikinahanglan sila sa pagpamulong.
Naninguha si Samuel ug si Giordayne sa pagmaunungon sa pagserbisyo sa Ginoo sa tanan nilang buhaton. Miingon si Giordayne, “Nasayud ako nga kon ako adunay hugot nga pagtuo, dili ako malaglag, apan mabuhi ako uban sa Langitnong Amahan ug ni Jesukristo pag-usab.”
Mga litrato sa pamilya ug mga anak sa maayong kabubut-on NIINI NGA nga pamilya; imahe sa bandera © Nova Development; litrato sa mga kahoy sa palma © Getty Images