Dapig sa Ginoo

Ni Presidente Dieter F. Uchtdorf

Ikaduhang Magtatambag sa Unang Kapangulohan

Gikan sa “Higala sa Higala,” Liahona, Abr. 1999, H2–H4.

Sa gamay pa ako, mipuyo ako sa Zwickau, Germany. Ang akong lola may usa ka higala nga may puti, nagdunghay nga buhok. Ang iyang pangalan mao si Sister Ewig, ug gidapit niya ang akong lola ngadto sa simbahan. Sa dihang ang among pamilya miadto didto, nakita namo ang daghan nga mga bata. Kaming tanan nadani sa musika, ilabi na ang pagkanta. Usa ka awit, “Jesus Wants Me for a Sunbeam,” sa tinuod midani kanako.¹ Gibati nako nga duol kaayo ngadto ni Jesus sa diha nga gikanta ko kini. Nasayud ako nga Siya gusto kanako nga mahimong bidlisiw alang Kaniya. Ganahan gihapon ako niana nga awit—ug ang pagpamatuod nga gihatag kanako kabahin sa Manluluwas.

Ang akong tibuok pamilya—gawas kanako, tungod kay ako unom ka tuig pa lamang ang panuigon—gibunyagan nga mga miyembro sa Ang Simbahan ni Jesukristo sa mga Santos sa Ulahing mga Adlaw. Sa dihang ako otso anyos na, gibunyagan ako sa usa ka publiko nga swimming pool sa akong amahan.

Sa diha nga ako 11, ang akong pamilya kinahanglan nga mobiya sa East Germany. Mibalhin kami ngadto sa Frankfurt, West Germany. Mitambong ako sa Frankfurt Branch, diin dili sama ka dako sama sa usa nga didto sa Zwickau. Ang meetinghouse sa Frankfurt gamay, ug kami adunay mga klase sa silong. Gitudloan kami sa mga misyonaryo og importante nga mga baruganan sa ebanghelyo.

Usa ka misyonaryo, si Elder Stringham, midani kanako pag-ayo uban sa iyang mga leksyon kalabut sa Perlas nga Labing Bililhon, ilabi na diin si Moises gitudloan nga siya anak sa Dios (tan-awa sa Moises 1:3–4). Gitudloan usab ako ni Elder Stringham sa kasulatan nga nag-ingon, “Kon ang Dios dapig kanato, kinsa pa man ang batok kanato?” Mga Taga-Roma 8:31). Nakahatag kini kanako og kahupayan ug kaisug, tungod kay niana nga panahon ang kaugmaon ingon og lisud sa Germany. Ang siyudad sa Frankfurt diha sa pagkaguba uban sa mga gibombahan nga mga building. Kana nga pagtulun-an nagpabilin uban kanako sa tibuok nakong kinabuhi. Nagtudlo kini kanako nga kinahanglan ako anaa dapig sa Ginoo. Dili ako makatugot nga dili modapig sa Ginoo.

Naghagit ako kaninyo mga bata sa pagsunod sa mga pulong sa mga propeta. Kon inyong buhaton, makaplagan ninyo ang mga tubag sa inyong mga pangutana, bisan kon kamo 6, 9, 11, 19, o, sama kanako, 69 anyos ang panuigon!

Magpaka-kahayag sa Adlaw alang ni Jesus

Sa dihang si Presidente Uchtdorf unang miadto sa simbahan, nadungog niya ang awit “Jesus Wants Me for a Sunbeam.” Mahimo kang usa ka kahayag sa adlaw diha sa inyong pamilya pinaagi sa pagbuhat og mabination nga mga buhat ug pagbilin og malipayon nga mugbo nga mga sulat sa pasalamat.

Paluta-i ang hulma sa adlaw ngadto sa usa ka nipis nga papel, ug guntinga kini.
Isulat ang pangalan sa usa ka miyembro sa pamilya sa usa ka bahin sa adlaw, ug dayon kolori kini sa imong paborito nga hayag nga mga kolor.
Sa pikas nga bahin, pagsulat og mubo nga sulat nga nagpasalamat sa usa ka miyembro sa pamilya alang sa usa ka butang nga iyang gihimo alang kanimo.
Paghimo og usa ka sekreto nga mabination nga buhat alang niana nga tawo, sama sa paghapnig sa iyang higdaanan o pagpilo sa mga sinina, ug pagbilin og malipayon nga mubong sulat.