Mensahe sa Unang Kapangulohan
Ang mga Langgam nga Kanaryo nga may Abuhon [Gray] sa Ilang mga Pako
Dul-an sa 60 ka mga tuig ang milabay, samtang nangalagad ako isip usa ka batan-on nga bishop, si Kathleen Mckee, usa ka biyuda sa akong ward, namatay. Uban sa iyang mga butang mao ang tulo ka binuhing langgam nga mga kanaryo. Ang duha, yellow tanan og kolor, nga ihatag ngadto sa iyang mga higala. Ang ikatulo, si Billie, adunay yellow nga kolor nga may gamay nga abuhon nga kolor sa iyang mga pako. Misulat si Sister Mckee niining mubo nga sulat alang kanako. “Mahimo ba nga ikaw ug ang imong pamilya makahimo og balay alang kaniya? Dili siya ang labing nindot, apan ang iyang awit mao ang labing nindot.
Si Sister McKee susama gayud sa iyang yellow nga langgam nga kanaryo nga may abuhon sa mga pako. Wala siya mapanalangini og kaanyag, wala magasahi og maayong pamarug, o napasidunggan og kaliwatan. Apan ang iyang awit nakatabang sa uban nga mas andam nga modala sa ilang mga palas-anon ug mas makabuhat sa ilang mga buluhaton.
Napuno ang kalibutan sa yellow nga mga kanaryo nga may abuhon sa ilang mga pako. Ang nakapait lamang gamay ra gyud kaayo ang nakakat-on sa pagkanta. Ang pipila mao ang mga batan-on kinsa wala makaila kon kinsa sila, mahimo sila nga unsa o gani unsa ang ilang gusto; ang ila lamang gusto mao ang mailado. Nagbako na ang uban tungod sa katigulangon, nagpas-an sa mga problema, o napuno sa pagduha-duha—nagpuyo sa ilang mga kinabuhi nga ubos sa sukod sa ilang mga kapabilidad.
Sa pagpuyo nga labing maayo, kinahanglang palamboon nato ang kapasidad sa pag-atubang sa kasamok uban sa kaisug, kasagmuyo uban sa pagkamadasigon, ug ang kadaugan uban sa pagkamapainubsanon. Mangutana kamo, “Sa unsang paagi nga atong makab-ut kining mga tumong?” Tubag nako, “Pinaagi sa pagbaton og tinuod nga panglantaw kon si kinsa gayud kita!” Kita mga anak nga lalaki ug babaye sa usa ka buhi nga Dios, kansang panagway kita gilalang. Hunahunaa kana: gilalang diha sa panagway sa Dios. Dili kita matinud-anong motuo niini kon wala kita makasinati og lawom nga bag-ong pagbati sa kalig-on ug gahum.
Sa atong kalibutan, ang moral nga kinaiya kasagaran daw ikaduha ngadto sa pagkaanyag o pagkamabihagon. Apan sa dugay na nga panahon mitambag ang Ginoo ngadto ni Samuel ang propeta mipalanog: “Ang Ginoo nagatan-aw dili ingon sa makita sa tawo; kay ang tawo nagatan-aw sa panagway sa gawas, apan ang Ginoo nagatan-aw sa kasingkasing” (1 Samuel 16:7).
Kon mangita ang Manluluwas og usa ka tawo nga adunay hugot nga pagtuo, Siya wala mopili kaniya gikan sa hut-ong sa mga nagpakaaron ingnon sa kaugalingon kinsa makita diha kanunay sa sinagoga. Hinoon, mitawag Siya kaniya gikan sa mga mananagat sa Capernaum. Maduha-duhaon, walay edukasyon, madasigong si Simon nga nahimong Pedro, Apostol sa hugot nga pagtuo. Ang yellow nga langgam nga kanaryo nga may abuhon sa iyang mga pako nakapasar alang sa tanang pagsalig ug makanunayong gugma sa Agalon.
Kon mopili ang Manluluwas og usa ka misyonaryo sa kadasig ug gahum, dili Niya kini makit-an sa Iyang mga tigsuporta apan diha sa Iyang mga kaaway. Si Saulo ang tiglutos nahimong si Pablo ang misyonaryo.
Mipili ang Manunubos og dili hingpit nga mga tawo aron sa pagtudlo sa pamaagi sa pagkahingpit. Gibuhat na Niya kini. Buhaton ni Niya karon—gani sa yellow nga mga langgam nga kanaryo nga may abuhon sa ilang mga pako. Nanawag Siya kaninyo ug kanako sa pag-alagad Kaniya dinhi sa yuta. Kinahanglan hingpit ang atong pasalig. Ug sa atong pagpanlimbasug, kon kita madagma, mangamuyo kita: “Giyahi kami, o giyahi kami, halangdong Tiglalang sa mga tawo, gikan sa kangitngit sa pagpaningkamot pag-usab.”1
Ang pag-ampo ko mao nga kita mosunod sa ehemplo sa Tawo sa Galilea, kinsa makitang nakig-uban sa mga kabus, sa giyatak-yatakan, sa linupigan, ug sa gisakit. Unta usa ka matinud-anon nga awit ang magagikan sa atong mga kasingkasing samtang ato kining buhaton.
Paghulagway pinaagi ni Steve Kropp
Paghulagway sa litrato pinaagi ni Christina Smith; paghulagway pinaagi ni Maryn Roos