Mga Anino diha sa Bong-bong
“Ayaw kahadlok, gagmay nga mga bata, kay kamo akò, ug Ako nakabuntog sa kalibutan”(D&P 50:41).
“Ma!” Mihilak si Desiree. “Nahadlok ako!”
Miabut si Mama sa pultahan ni Desiree ug gipasiga ang suga sa kwarto. Mipasiplat si Disiree ngadto sa suok diin anaa ang makahahadlok nga mga anino. Walay bisan unsa nga anaa diha.
“Kaingon ko og nakakita ko og usa ka lobo diha niana nga suok,” miingon si Desiree.
Gigakos ni Mama si Desiree, nagpabati kaniya og kaharuhay ug kawalay kuyaw. “Kon hayag ang suga, makita nato nga wala gayud bisan unsa nga anaa diha,” miingon si Mama.
Sa dihang mibati og kaarang-arang si Desiree, gipalong ni Mama ang suga ug mibalik og katulog. Gipiyong ni Desiree ang iyang mga mata ug naningkamot sa pagkatulog. Dayon gibuka ang iyang usa ka mata ug gitan-aw ang bong-bong. Ang mga anino anaa gihapon diha.
“Ma!” mihilak siya pag-usab.
Niini nga higayon si Mama wala mopahiyom sa diha nga iyang gipasiga ang suga. Ingon og gikapoy siya. Nangutana siya, “Desiree nahinumdom ka unsa ang imong gitan-aw sa telebisyon ganina?”
Mitando si Desiree. Natan-awan niya ang salida mahitungod sa mga lobo.
Milingkod si Mama sa katre ni Desiree. “Unsa ang atong tan-awon sa tinuod makaimpluwensya kanato—sa atong mga hunahuna, sa atong mga lihok, ug gani sa atong mga pagbati.”
“Apan ang salida mahitungod sa mga lobo dili ngil-ad,” miingon si Desiree.
“Unsa ang atong gitan-aw sa telebisyon makaapekto sa atong mga hunahuna, bisan kini dili ngil-ad nga programa. Nagtuo ako nga unsa ang imong gitan-aw karong gabhiona mihatag og bahin sa unsay imong gibati,” mipasabut si Mama.
Naghunahuna si Desiree mahitungod sa unsay gisulti ni Mama. Wala gayud siya makamatikod nga naapektuhan pinaagi sa unsay iyang gitan-aw ganina.
“Wow,” miingon si Desiree. “Magmatngon gayud ako sa pagpili unsa ang akong tan-awon.”
Mipahiyom si Mama. “Maayo kana nga ideya, Desiree.”
“Apan unsa man karong gabii? Nahadlok gihapon ako.”
“Ako adunay ideya,” miingon si Mama. Gikuha niya ang usa ka litrato ni Jesukristo gikan sa gamay nga lamesa ni Desiree ug gitang-tang kini gikan sa kwadro niini. Dayon gipapilit kini og nindot diha sa bong-bong diin nakita ni Desiree ang makahahadlok nga mga anino. “Anaa siya diha kanunay alang kanimo, Desiree. Hinumdumi kana kon ikaw mahadlok,”
Samtang gipalong ni Mama ang suga, usa ka haruhay nga pagbati mipuno sa dughan ni Desiree. Nasayud siya nga ang nasulti ni Mama tinuod. Kanunay nga magbantay si Jesus kaniya, magtabang kaniya, ug maghupay sa iyang mga kahadlok.
Paghulagway pinaagi ni Sam Nielsen; detalye gikan sa Si Kristo ug ang Dato nga Batan-ong Magmamando, ni Heinrich Hofman, sa maayong kabubut-on sa C. Harrison Conroy Co.