Ang Diwa Naghiusa sa Team, mga Miyembro sa Korum
Usa sa labing mahinungdanon nga mga istorya nga imantala sa Africa karong ting-init mao ang football. Apan kini dili kabahin sa World Cup.
Ang labing maayo nga mga team sa football gikan sa tanang bahin sa kalibutan magdula sa South Africa karong bulana, maghandum nga makadaug sa World Cup. Ang mga kauban sa team mag-agad sa usag usa, sa ilang mga coach, ug sa ilang fans aron sila makalahus ngadto sa finals. Taliwala sa mga magdudula ug fans gikan sa matag nasud, ang diwa sa pagtinabangay sa grupo makita gayud nga inyo kining mabati diha sa kahanginan.
Apan walay laing mga miyembro sa team nga mas maunungon ngadto sa usag usa, sa ilang mga coach, ug sa ilang fans kay sa korum sa priests sa Kagiso Ward, Soweto South Africa Stake, bisan og sila dili modula alang sa World Cup. Dili pa lang dugay sa miaging tuig, lima niining mga batan-ong lalaki gipaila-ila ngadto sa Simbahan pinaagi sa ilang coach sa football, kinsa mismo sa iyang kaugalingon usa ka bag-o nga kinabig. Karon sila anaa sa importanteng bahin sa lain nga “team”—ang ilang korum sa priest—ug nagtrabaho uban sa lain nga “coach”—ang ilang bishop—samtang sila nagsunod sa ebanghelyo matag adlaw ug nangandam sa pag-alagad isip full-time nga mga misyonaryo.
Si Coach Solomon Maalamon
Sama sa daghang mga tawo sa South Africa, ang 29-anyos nga si Solomon Eliya Tumane gusto og football. Naggahin siya og mga oras nga walay pagkakapoy sa matag semana nga mag-coach sa Hurricanes Football Club. Gimahal niya ang iyang mga magdudula ug nalipay sa ilang mga kalampusan. Sila nagmahal ug nagtahud kaniya agi og balos. Busa sa dihang nagpamiyembro si Coach Solomon sa Ang Simbahan ni Jesukristo sa mga Santos sa Ulahing mga Adlaw, ang iyang mga magdudula nakuryuso.
“Moabut siya sa praktis gikan pa gayud sa iyang klase sa institute,” miingon si Siyabulela Manyakanyaka, 17, kinsa mokuyog ni “McDonald.” “Makita namo ang mga kasulatan ug mga magasin sa Simbahan sulod sa iyang bag, mao nga kami misugod sa pagpangutana, ug sa pagtubag, siya mobasa ngari kanamo,” miingon si Thapelo Benjamin Sesinyi, 17.
“Naghinam-hinam ako sa pagtudlo niining mga batan-on tungod kay ako nahigugma pag-ayo kanila,” miingon si Coach Solomon. “Gusto nako nga magsubay sila sa husto nga dalan. Misulti ako ngadto sa usa kanila, ‘Mahimo kang maayo nga modula kon ikaw mobasa sa mga kasulatan,’ mao nga silang tanan misugod sa pagbasa sa mga kasulatan. Nalingaw sila niini, busa mitudlo dayon ako kanila mahitungod sa pag-ampo. Dayon usa ka adlaw misurprisa sila kanako. Miabut ko sa praktis og sayo, ug natagpilaw ako sa dihang sila mipukaw kanako ug miingon, ‘Coach, kinanghanglang mobisita kita sa inyong simbahan. ’ Kana mao ang adlaw nga dili gayud nako makalimtan, tungod kay ako nasayud dayon nga sila anaa sa hustong dalan.”
Uban sa Pagtugot
Apan ang coach dili mopadayon nga walay pagtugot sa ginikanan. Miadto siya sa matag balay sa magdudula, matag usa sa matag higayon, sa paghangyo kon maayo ba ang pagdapit sa mga magdudula ngadto sa simbahan. Ang mga ginikanan misugot. “Miadto kami sa simbahan tulo ka semana nga sunod-sunod,” si Thapelo mihinumdom. “Gusto namong magkat-on og daghan pa.” Busa ang coach mihangyo pag-usab sa mga ginikanan alang sa pagtugot, niining higayona alang sa mga magdudula sa pagtuon uban sa full-time nga mga misyonaryo. Ang mga ginikanan misugot pag-usab.
“Ang mga misyonaryo mihatag matag usa kanamo og kopya sa Basahon ni Mormon,” miingon si McDonald. “Misulti sila kanamo sa pagbasa niini ug sa pag-ampo mahitungod niini tungod kay kini tinuod, busa among gibuhat. Nag-ampo ako ug nagbasa ug nasayran nga ang Basahon ni Mormon tinuod.” Mao usab ang ubang mga magdudula, kinsa dayon gibunyagan ug gikumpirmahan. Lima sa mga miyembro sa team karon mga Santos sa Ulahing mga Adlaw.
Mga Tumong sa Ebanghelyo
Kadaghanan sa mga team naghimo og mga tumong aron mahimo nga kampeon, apan kining lima ka mga batan-on nga mga Hurricane nagpunting usab og laing tumong sa dili kaayo layo nga panahon sa umaabut. Uban sa giya ni Bishop Bongani Mahlubi, ang tawo nga ilang gihunahuna nga usa ka espritwal nga coach, sila nangandam sa pag-alagad og full-time nga misyon.
“Nakadugang sila sa kalig-on sa among ward,” miingon ang bishop. “Ug sila kabahin sa usa ka dakong team sa mga tighupot sa priesthood sa Aaronic ug Melchizedek Priesthood sa tibuok kalibutan. Kining mga batan-ong lalaki nagbuhat sa tanang butang nga nag-uban—sila nagkuyog paglakaw padulong sa eskwelahan, nagdungan pagdula og football, nagdungan pag-adto sa seminary, ug nag-uban pag-alagad sa priesthood. Kon ako motawag og usa ka batan-ong lalaki sa paghangyo kon siya makatabang, tabangan ako sa lima.” Miingon si McDonald nga ang korum sa priest kanunay usab magtuon gikan sa Isangyaw ang Akong Ebanghelyo, ug si Thapelo miingon nga agi og dugang sa pagdapit og mga higala ngadto sa simbahan, ang mga miyembro sa korum nangita niadtong kinsa wala na motambong. “Sa daghang mga pamaagi, nagkat-on kami nga mahimong mga misyonaryo karon,” siya miingon.
“Kanunay kami nga makadungog gikan niining mga batan-ong lalaki diha sa miting sa pagpamatuod,” miingon ang bishop. “Kanunay silang nagsaad ni Coach Solomon nga moalagad sila og full-time nga mga misyon.” Wala nay laing mas makalipay sa ilang coach sa football. “Naghinam-hinam ako nga sila moalagad,” miingon si Solomon.
Paghiusa, kahibalo sa ebanghelyo, ug kaanad sa pagserbsiyo—kadtong tanan kabahin sa usa ka lig-on nga programa sa pagbansay alang sa umaabut nga mga misyonaryo. Ug dugang pa, kining batan-ong mga lalaki nakapalambo na og dakong tinguha sa pagtrabaho og dungan sa pagbuhat og maayo. Sama sa mga team sa football nga nakiglumba alang sa World Cup, sila nag-agad sa usag usa, sa ilang mga coach, ug diha sa ilang fans (apil ang mga miyembro sa ward, mga pamilya, ug mga higala) sa pagdala kanila ngadto sa ilang “pagka-kampeon.” Uban nianang matang sa diwa sa team, ang ilang mga tumong mahimong makab-ut.
Ang magkauban sa team nga sila si Siyabulela “McDonald” Manyakanyaka, Thapelo Sesinyi, Emmanuel Pebe, ug Lawrence Tsetse nagpamiyembro sa Simbahanv sa ehemplo sa ilang coach, si Solomon Tumane (sa tunga).
Gilitratohan ni pinaagi ni Richard M. Romney