Pagserbisyo diha sa Simbahan
Gitawag ug Gi-Set Apart sa Pag-alagad
Ang pormal nga mga calling sa Simbahan dili kompleto hangtud nga kita ma-set apart pinaagi sa husto nga awtoridad sa priesthood.
Sa usa ka panan-awon nga gihatag ngadto kang Propeta Joseph Smith ug Signey Rigdon sa Hiram, Ohio, niadtong Pebrero 16, 1832, atong makita kining mga pulong sa kahupayan ug pagdasig.
“Ako, ang Ginoo, maloloy-on ug mabination ngadto niadto kinsa mahadlok1 kanako, ug mahimuot sa pagpasidungog niadto kinsa nag-alagad kanako sa pagkamatarung ug diha sa kamatuoran ngadto sa katapusan.
“Dako ang ilang ganti ug walay katapusan ang ilang himaya” (D&P 76:5–6).
Sa akong katuigan isip usa ka miyembro sa Simbahan, nakasinati ako og nagtubo nga pagdayeg kon unsa ang gipasabut sa tinawag sa Dios ug sa gisaad nga mga panalangin uban niana kon motubag sa pagdapit sa Ginoo sa pag-alagad Kaniya.
Kon ang mga lider mag-ampo aron masayud sa kabubut-on sa Ginoo sa dili pa ihatag ang tawag sa pagserbisyo, makadawat sila og pagbati sa kasiguradoan nga nagkumpirmar sa saktong buluhaton nga pagahimoon. Kini importante ug makatagbaw nga makaangkon og personal nga pagsaksi pinaagi sa pag-ampo nga kita gitawag sa Dios. Pinaagi sa Iyang mga sulugoon, ang Ginoo nagdapit kanato sa pag-apil sa Iyang buluhaton aron kita mahimong masayud ug mahigugma Kaniya og mas maayo (tan-awa sa Mosiah 5:13).
Sa pagdawat og tawag sa pag-alagad, mahimong makasinati kita og mga pagbati sa pagkakulang susama sa gibati ni Enoch sa dihang gisangunan siya sa Ginoo sa pagdumala ug pagtudlo sa mga tawo (tan-awa sa Moises 6:31). Ang mga pulong nga “Ang Akong Espiritu anaa kanimo, busa ang imong tanan nga mga pulong Ako mohatag og kaangayan” (Moises 6:34) nakahatag og kasiguradoan ni Enoch nga samtang siya nakaangkon og panan-awon kon unsaon sa Ginoo paghatag og gahum kaniya aron sa pagtumam sa iyang balaang buluhaton. Ang mga kasulatan mirekord og dugang kon unsa ka talagsaong lider si Enoch samtang “siya naglakaw uban sa Dios” (Moises 6:39). Ang kasinatian ni Enoch adunay bililhong mga leksyon alang sa matag usa kanato samtang kita moalagad sa Simbahan sa Ginoo.
Ang baruganan sa pagset-apart niadtong gitawag sa pag-alagad makita diha sa tambag sa Ginoo ngadto ni Moises sa dihang Siya misugo kang Moises nga “ipandong ang imong kamot kang [Joshua]. … Ug magabutang ka sa imong kadungganan sa ibabaw niya” (Numeros 27:18, 20).
Pinaagi niining balaanong sumbanan nga gi-establisar, mahimo kitang mobuntog sa atong indibidwal nga mga kahuyang, limitasyon ug gani oposisyon. Ikonsiderar ang kasinatian nila ni Nephi ug Lehi, ang mga anak nga lalaki ni Helaman: “Ang Balaang Espiritu sa Dios mikunsad gikan sa langit, ug misulod ngadto sa ilang mga kasingkasing, ug sila napuno ingon og may kalayo, ug sila namulong ug kahibulongan nga mga pulong” (Helaman 5:45; tan-awa usab sa mga bersikulo 17–19).
Pagtudlo pinaagi sa Espiritu
Sa usa ka pagpadayag ngadto kang Joseph Smith, mihatag ang Ginoo sa mosunod nga mga pangutana: “Busa, Ako ang Ginoo nangutana kaninyo niini nga pangutana—ngadto sa unsa kamo gi-orden?”2 (D&P 50:13). Mitubag ang Ginoo, “Sa pagsangyaw sa akong ebanghelyo pinaagi sa Espiritu, gani ang Maghuhupay nga gipadala aron sa pagtudlo sa kamatuoran” (D&P 50:14).
Klaro, nga adunay mga limitasyon kabahin sa paagi nga kita motudlo niining sagradong mga kamatuoran:
“Hinumdumi nga kana nga moabut gikan sa kahitas-an sagrado, ug kinahanglan gayud ipamulong uban sa pag-amping, ug pinaagi sa pagtugot sa Espiritu” (D&C 63:64).
“Siya nga gi-orden ngari kanako ug gipadala ngadto sa pagsangyaw sa pulong sa kamatuoran pinaagi sa Maghuhupay, diha sa Espiritu sa kamatuoran, siya magsangyaw ba niini pinaagi sa Espiritu sa kamatuoran o sa lain nga paagi?
“Ug kon kini pinaagi sa uban nga paagi kini dili gikan sa Dios” (D&P 50:17–18).
Kon gitawag kita og usa ka posisyon sa Simbahan isip usa ka lider o usa ka magtutudlo, ang atong buhat mao ang pagtudlo sa pulong sa Dios pinaagi sa Espiritu sa Dios, dili sa “mga pilosopiya sa mga tawo nga giapila og pipila ka mga kasulatan.”3 Sama nila ni Enoch, Nephi, ug Lehi, makadawat usab kita og tabang gikan sa taas pinaagi sa mga pag-aghat sa Espiritu Santo.
Malagmit kitang moingon nga ang pagkadungog o pagkabasa og impormasyon kabahin sa usa ka doktrina o baruganan paigo na. Apan ang ingon ana nga paagi nagpakita og kakulangan sa pag-ila og mas lawom nga pagsabut sa mga baruganan nga moabut pinaagi sa personal nga pagpadayag (tan-awa sa Job 32:8). Ikonsiderar kining makapadasig nga obserbasyon ni Hyrum Smith, ang igsoong lalaki sa Propeta: “Isangyaw una ang mga baruganan sa Ebanghelyo—isangyaw kini pag-usab: mabantayan ninyo nga sa pipila ka mga adlaw bag-ong mga ideya ug dugang kahayag kabahin niini ipadayag diha kaninyo. Mahimo ninyo kining palapdon hangtud nga inyo kining masabtan pagklaro.”4
Pagsunod sa Ehemplo sa Manluluwas
Ang atong labing talagsaon nga ehemplo sa tanang mga butang mao si Ginoong Jesukristo, kang kinsa nahisulat:
“Ug, sa nakatapus na si Jesus sa pagpamulong niining mga sultiha ang mga panon sa katawhan nanghibulong sa iyang mga pagpanudlo:
“Kay kanila nagpanudlo man siya ingon nga may kagahum, ug dili sama sa ilang mga escriba” (Mateo 7:28–29; tan-awa usab sa Joseph Smith Translation, Matthew 7:36–37).
Si Alma, ang talagsaong propeta sa Basahon ni Mormon, mihulagway niini nga paagi. “Ug karon, ang pagsangyaw sa pulong adunay dako nga kalagmitan sa pagdala sa mga katawhan sa pagbuhat niana nga diin makiangayon—oo, kini adunay labaw nga gamhanan nga sangputanan diha sa mga hunahuna sa mga katawhan kay sa espada, o sa bisan unsa pa, diin nahitabo ngadto kanila—busa si Alma naghunahuna nga kini angay nga sila kinahanglan mosulay sa hiyas sa pulong sa Dios” (Alma 31:5).
Kon saligan uban sa sagradong responsibilidad sa pagtudlo sa ebanghelyo, atong sundon ang ehemplo sa Manluluwas ug modeklarar uban Kaniya, “Ang gitudlo ko dili akong kaugalingon, kondili iya sa nagpadala kanako” (Juan 7:16).
Paghulagway sa litrato pinaagi ni Matthew Reier