Mga Ideyasa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo:

“Natukod diha sa Bato,” p. 12: Human sa pagpakigbahin niini nga artikulo, hunahunaa ang paghisgut unsa ang gipasabut nga “kini nga Simbahan natukod diha sa bato ni Kristo, sa baruganan sa direkta ug nagdayon nga pagpadayag.” Pangita og mga ehemplo gikan sa kinatibuk-ang komperensya sa nagpadayon nga pagpadayag.

“Mga Butang Ingon nga Sila Gayud Mao,” p. 22: Hunahunaa ang pagbasa og una sa artikulo ug sa mainampuong paagi pagpili sa mga bahin nga magamit ngadto sa mga panginahanglan sa inyong pamilya. Mahimo ninyong gamiton kini nga artikulo sulod sa duha ka leksyon sa family home evening.

“Ang Imong Misyon sa Kinabuhi Mao Karon,” p. 42: Hangyoa ang usa ka miyembro sa pamilya sa pagpasabut sa interseksyon. Hunahunaa ang pagbasa sa seksyon diha sa artikulo sa “Usa ka Misyon Matag Adlaw.” Dayon hangyoa ang mga miyembro sa pamilya sa pagpakigbahin og kasinatian diin sila o ang uban nakakita og usa ka panginahanglan ug nakahimo sa pagtabang sa pagtuman niini.

“Ang Pagpanikas o Dili Pagpanikas,” p. 50: Human sa pagpakigbahin niini nga istorya uban sa inyong pamilya, hatagi og gibug-aton ang gipahayag, “Ang pagpili sa dili pagpanikas dili lisud tungod kay gihimo ko na kana nga pagpili.” Hunahunaa ang paghisgut sa pangutana, Sa unsa nga paagi nga ang pagpili daan naghimo niini nga mas sayon sa pagbuhat unsa ang husto?

Paghimo og usa ka Barko

Uban sa lawom nga pagdayeg nagtuon ako sa mga kasinatian ni propetang Nephi, nagdayeg ilabi na sa paglahutay ug sa disiplina diin siya mihimo og usa ka barko. Miabut ako sa pagdayeg nga adunay maalamong katuyoan sa Ginoo sa pagsugo kaniya sa pagbuhat sa ingon.

Sa dihang si Presidente Gordon B. Hinckley (1910–2008) mibisita sa Guatemala niadtong 1997, ang iyang tambag nga midulot pag-ayo sa akong kasingkasing mao ang yanong pag-awhag sa paghimo og family home evening. Natandog pinaagi sa mga pulong sa atong propeta, ang akong asawa, upat ka mga anak, ug ako nagsabut ug naghan-ay og usa ka tumong nga kami “mohimo og usa ka barko nga gitawag og family home evening.” Kami nasayud sa paningkamot nga gikinahanglan niini apan naghunahuna usab nga ang Ginoo adunay maalamong katuyoan sa pagsugo kanato sa pagbuhat sa ingon.

Daghang tuig ug gatusan ka home evening ang milabay, ang among barko sa family home evening nagtubo uban sa among pamilya. Ug among nasinati unsa gayud ang gisaad ni Presidente Hinckley. Gikan niining ginagmay nga pagpundok—nga kanunayng gihimo ug uban sa paglahutay—usa ka talagsaong butang ang miabut. Ang gugma alang sa mga ginikanan nagtubo. Ang gugma tali sa igsoong mga lalaki ug igsoong mga babaye nagtubo. Ug ang among gugma alang sa Langitnong Amahan ug sa Manluluwas napalambo. Ang pagdayeg miabut sa among mga kasingkasing alang sa unsa ang yano ug maayo. (Tan-awa sa Gordon B. Hinckley, “Some Lessons I Learned as a Boy,” Ensign, Mayo 1993, 54.)

Rony Saúl García Méndez, Guatemala