Positibong mga Gamit sa Internet
Ang Internet makahimo og diha-diha dayon nga access ngadto sa daghang mga kapanguhaan nga makalig-on ug makabuhong sa atong mga kinabuhi. Daghang espiritwal nga makapabayaw nga mga Web site nga maghatag og direksyon ug inspirasyon. Ang mosunod nga mga ideya makatabang kaninyo nga padayong nakakonektar sa reyalidad dili gayud madiskonektar gikan sa mga maayong butang nga mahatag sa Internet.
Limitahi ang Inyong Oras
Si Rebecca Renfroe, gikan sa Idaho, USA, sa una mo-blog ug mobasa sa mga blog sa uban hapit kada adlaw. Ang iyang hunahuna kanunay may gana sa “pagsulat”—sa hunahuna nagsulat og blog kabahin sa unsa ang iyang gibuhat ngadto sa iyang mga anak imbis nga mobuhat sa mga butang uban kanila. Nakaamgo siya nga kinahanglan adunay balanse.
Miingon siya, “Mitabang ang Espiritu nako sa pag-ila nga ang pagbaton og blog dili problema—ang paggahin sa akong daghang mga oras ug sa kusog mao ang problema. Sa literal nga paagi nag-usik-usik ako sa akong kinabuhi: gipulihan nako ang dekalidad nga oras uban sa akong mga anak ug akong bana, gipulihan nako ang oras alang sa seryuso, lawom nga pagtuon sa mga kasulatan, ug bisan gani gipulihan ang oras para sa pagkatulog nga nakaapekto sa akong abilidad sa pag-alagad ngadto sa uban, mahimong sensitibo sa Espiritu, ug sa pagpadayon og himsog nga paagi sa pagpakabuhi.
Si Sister Renfroe nakat-on sa dili pagtugot nga ang mga maayong butang mobabag sa mas maayong mga butang, sama sa gitambag ni Elder Dallin H. Oaks sa Korum sa Napulog Duha ka mga Apostoles: “Tungod lamang kay ang usa ka butang maayo kini dili igo nga rason sa pagbuhat niini. … Siyempre maayo ang pagtan-aw og nindot nga salida o sa pagkuha og makalingaw nga impormasyon. Apan dili tanan niana nga matang takus sa bahin sa atong kinabuhi nga atong gihatag sa pagkuha niini. Ang ubang mga butang mas maayo, ug ang uban pinakamaayo.”1
Pilia ang Makapabayaw nga Media
Nakadayeg si Amy Paulsen sa Washington, USA, sa mga Web site nga gihimo sa ubang mga inahan nga naghatag og mga ideya sa leksyon ug mga kalihokan alang sa pagtudlo sa mga bata sa mga baruganan sa ebanghelyo. Kon nagkinahanglan og mga biswal nga tabang, moadto siya sa art online aron makaimprinta. Kon nagkinahanglan siya og mga ideya, makakita siya og mga link sa mga artikulo sa magasin sa Simbahan, mga pakigpulong sa komperensya, ug mga manwal online.
“Nakatabang sa akong bana ug kanako ang Internet sa pag-andam og makahuluganong mga family home evening alang sa among mga anak,” miingon si Sister Paulsen. “Makapahupay nga masayran nga adunay daghang ubang mga inahan kinsa usab ‘motudlo sa ilang mga anak sa pag-ampo, ug sa paglakaw nga matarung atubangan sa Ginoo’” (D&P 68:28).
Gamita ang Internet sa Pagpakigbahin sa Ebanghelyo
Usa ka miyembro, nga si Lin Floyd sa Utah, USA, mimugna og mga Web site sa family history nga adunay mga litrato ug mga kasaysayan sa mga katigulangan. Ang Iyang Web site ug ang uban sama niini nakatabang sa mga tawo nga makat-on og mas daghan kabahin sa Simbahan ug sa doktrina niini. Ang pipila adunay tinguha nga magpabunyag o mobalik sa pagkaaktibo sa Simbahan. Nakakita ang uban og mga tabang alang sa pagbuhat sa family history, pagbuhat sa mga calling, ug paglig-on sa mga kaminyoon.
Adunay daghang positibong mga butang nga mahimo natong buhaton sa Internet. Samtang nag-establisar kamo og mga sumbanan sa paggamit sa Internet—siguradoha nga ang mga site nga inyong bisitahan mopalapad sa inyong hunahuna, mopadaghan sa inyong mga oportunidad, ug mopakaon sa inyong kalag—ang Internet mahimong usa ka talagsaong kapanguhaan nga mopalambo sa inyong personal nga kinabuhi ug mopalig-on sa inyong pamilya.
Gamit ang mga Web site sa Simbahan, mahimo kamong mopakigbahin sa ebanghelyo, mangandam sa mga leksyon, ug moapil sa buluhaton sa family history.
Mga paghulagway sa litrato pinaagi ni John Luke.