Bag-oha ang Imong Espirituhanong Kahimtang

Ang mga young adult sa tibuok Simbahan mitubag sa pakigpulong ni Elder David A.Bednar sa fireside “Mga Butang Ingon nga Sila Gayud Mao,” nga iyang gihatag sa Mayo 2009 (tan-awa sa pahina 22 niini nga isyu), pinaagi sa pagbana-bana sa ilang paggamit sa mga computer, mga cell phone, ug uban nga mga teknolohiya. Dinhi, pipila kanila nagsulti mahitungod sa mga kalainan nga ilang gihimo agi og pagtubag sa mensahe ug sa mga panalangin nga ilang nadawat isip usa ka resulta.

Ang Panginahanglan sa Pagtumong

Ang uban nga mga teknolohiya sama sa madala-dala nga mga gamit nga motukar, makapalayo kaninyo sa pagtutok unsa ang mga panghitabo sa imong palibut. Ang pakigpulong ni Elder Bednar nakatabang kanako sa pagkaamgo nga samtang ako nag-andam sa pag-alagad og misyon, kinahanglan nga ako mahimong mas anad sa pakigsulti sa uban nga mga tawo. Nasayud ako nga kinahanglan nakong paminusan ang pagsalig sa teknolohiya, gani bisan kini makalingaw. Isip usa ka misyonaryo ako magkinahanglan sa pagtumong diha sa uban nga mga tawo ug sa buhat nga akong pagabuhaton alang sa Ginoo.

Andrew Hovey, Massachusetts, USA

Mga Pakigrelasyon Gilig-on

Ang mensahe ni Elder Bednar maoy usa nga usahay wala kaayo hatagi og pagtagad o gani gibaliwala tungod kay ang negatibo nga mga epekto sa dili husto nga paggamit sa teknolohiya tingali ingon og walay bili. Karon akong naamgohan nga ako kinahanglan molikay og bisan unsa nga makabalda kanako nga mahiuyon sa Espiritu. Sama pananglit, ang pipila sa mga gamit nga ikahatag sa akong cell phone, sama sa mobile banking services, dali ug sayon. Bisan pa niana, ang uban nga mga gamit kasagaran usik sa panahon ug makakuha sa akong atensyon ug tumong gikan sa mga butang nga mas importante.

Karon ako naghimo og dugang nga mga paningkamot sa personal nga pagduaw sa akong mga higala ug pamilya kay sa paggamit og uban nga elektronik nga komunikasyon. Tungod niini, ang akong mga pakigrelasyon nalig-on. Karon ako adunay mas dako gani nga pagdayeg alang sa mga butang nga sa tinuod importante sa akong kinabuhi.

Jayoung Lee, Seoul, Korea

Usa ka Pasalig sa Akong Kaugalingon

Gitimbang-timbang nako ang akong paggamit sa teknolohiya ug naamgohan nga tingali pipila sa teknolohiya nahimo nga dakong bahin sa akong inadlaw-adlaw nga kinabuhi. Mihimo ako og pasalig sa akong kaugalingon sa paghatag og bili sa akong oras ug sa paggamit niini nga maalamon. Kay sa maglingkod diha sa computer ug maghimo og pakighigala sa mga network, maayo pa nga akong igahin ang akong oras sa pagbasa og maayo nga basahon o pagkat-on og usa ka bag-o nga kahanas nga mohatag kanako og mga kasinatian sa pagkat-on ug mopauswag og pagtubo. Naningkamot ako sa paggahin og mas daghan nga oras uban sa mga tawo sa pagpalig-on sa panaghigalaay ug pakigbahin og nindot nga mga katawa.

Ruth Barilea, Manila, Philippines

Mga Lit-ag sa Teknolohiya

Nanag-iya ako og negosyo sa cell phone ug ako usa ka elektronik nga enhinyero, busa ang teknolohiya kanunay na nga kabahin sa akong inadlaw-adlaw nga kinabuhi. Ang internet, mga video game, electronic media ug mga himan—tanan gihunahuna nga mohatag og maayo nga kalingawan. Bisan pa niana, kadaghanan niini mahimo nga daling gamiton sa dili matarung nga mga paagi.

Dili ako makahunahuna kon unsay bation sa atong Langitnong Amahan kon kita mahulog ngadto sa mga lit-ag sa teknolohiya. Tungod sa dinasig nga mga pulong ni Elder Bednar, ako mihimo og tumong sa kanunay nga paggamit og teknolohiya sa husto nga paagi ug sa paggahin sa akong oras sa maalamon nga paagi.

Christian Alejandro Zerlin, Managua, Nicaragua