Ikaw Nasayud Na

Ni Elizabeth Stitt

Mituo ako nga ang Simbahan tinuod, apan kanus-a nako nadawat kana nga saksi?

Usa ka adlaw sa eskwelahan, usa ka klasmeyt ug ako nakahisgot kabahin sa relihiyon. Ang akong klasmeyt nahimong antagonista ug nagsugod sa pagsaway unsay akong gituohan.

Gitan-aw ko niya sa nawong ug miingon, “Nagtuo kamo sa inyong Simbahan tungod lamang kay gimatuto kamo sa inyong mga ginikanan diha niini. Kay kon wala pa, dili kamo motuo.”

Wala ako makahinumdom unsa ang akong gisulti ngadto kaniya, apan nagsige ako og hunahuna mahitungod sa iyang komentaryo ug natingala ngano nga miingon siya niana. Gipadako ako diha sa Simbahan, ug, sa tinuod, wala gayud ako magduda sa mga pagtulun-an sa simbahan o sa mga doktrina. Sukad sa gamay pa ako, mibati ako nga ang Simbahan tinuod. Bisan sa wala pa gani ako bunyagi, gibasa sa among pamilya og dungan ang Basahon ni Mormon, ug nasayud ako nga kini tinuod. Wala lamang ako magtuo; nasayud ako niini ug walay mga pagduda. Apan ako dili makapasabut og usa ka piho nga higayon sa diha nga akong nadawat kana nga saksi. Taud-taod gayud nga kana nakapasamok kanako. Gusto ko nga makabaton og usa ka piho nga kasinatian sa panahon nga ako mag-ampo ug diha-diha dayon ang tubag moabut naghasmag kanako. Kini wala gayud mahitabo.

Apan unsa ang akong mapasabut mao ang usa ka tipik sa higayon sa diha nga ang akong pagpamatuod gimatuod. Human sa akong unang tuig sa high school, mikuyog ako sa uban nga kabatan-onan nga naglibut sa mga dapit sa kasaysayan sa Simbahan. Sa diha nga miabut kami sa Sagrado nga Kakahoyan, ang among giya sa tour midapit kanamo sa pagpangita og personal nga panghimatuod nga unsa ang nahitabo didto tinuod: nga ang Dios Amahan ug si Jesukristo mipakita ngadto ni Joseph Smith ug nagsugod ang Pagpahiuli. Nakakita ako og hilum nga dapit diha sa kakahoyan ug gibasa ang asoy sa Unang Panan-awon. Dayon ako miluhod ug nag-ampo. Nasayud na ako nga ang Unang Panan-awon nahitabo ug nga si Joseph Smith usa ka propeta. Apan sa gihapon ako nangutana. Gihuman nako ang akong pag-ampo, ug walay nahitabo. Walay halangdon nga pagbati, walay panan-awon, walay mga anghel. Wala.

Nakakita ako og usa ka dako nga bato ug milingkod ug miabli sa akong patriyarkal nga panalangin ug misugod sa pagbasa. Gihisgutan sa akong panalangin ang Pagpahiuli sa ebanghelyo, ug diha sa akong hunahuna ang mga pulong gibalik: “Ikaw nasayud na. Ikaw nasayud na.”

Kon ako makabalik pa niana nga tipik sa higayon sa diha nga ang akong higala mihagit kanako sa unsay akong gituohan, ako dili makahibalo kon unsaon nako paghulagway kon sa unsa nga paagi ako nasayud nga ang Simbahan tinuod. Apan ako nanghinaut nga unta akong nasultihan siya nga samtang ang akong mga ginikanan mitudlo kanako sa unsay ilang nasayran nga tinuod, kinahanglan mangita ako niana nga tubag sa akong kaugalingon. Ug akong gibuhat.

Wala nako kinahanglana ang pag-adto ngadto sa Sagrado nga Kakahoyan aron masayud nga ang Simbahan tinuod. Wala nako kinahanglana ang bisan unsa nga mahinungdanon nga kasinatian aron masayud nga ang Simbahan tinuod. Gikinahanglan lamang nako nga mapahinumduman, “Ikaw nasayud na.”