Panahon sa Pagpakigbahin
Ang Espiritu Santo Nagpamatuod sa Kamatuoran sa Tanang mga Butang
Diha sa Basahon ni Mormon atong mabasa ang mahitungod ni Lehi ug sa iyang pamilya. Ang Langitnong Amahan migiya kanila ngadto sa usa ka bag-o nga panimalay sa usa ka pinili nga yuta. Nadawat ni Lehi ang usa ka katingalahang gasa gikan sa Dios: usa ka lingin nga bola nga may duha ka buburan nga “nagtudlo sa agianan diin [sila] kinahanglan moagi” 1 Nephi 16:10). Kini nga gasa gitawag og Liahona. Si Nephi miingon nga ang Liahona “molihok sumala sa [among] hugot nga pagtuo ug kakugi ug pagtagad” (1 Nephi 16:28). Ang pamilya ni Lehi nakakat-on sa pagsunod sa mga direksyon sa Liahona.
Nagdawat kita og usa ka katingalahang gasa sa diha nga kita gibunyagan ug gikumpirmahan. Kini mao ang gasa sa Espiritu Santo. Ang gasa sa Espiritu Santo sama sa Liahona. Makakat-on kita sa pagsunod sa Espiritu Santo. Kon kita mosunod sa Iyang mga pag-aghat, makabalik kita sa pagpuyo uban sa Langitnong Amahan ug ni Jesukristo pag-usab.
Hunyo 2010 Scripture Journal
Basaha sa Moroni 10:5.
Pag-ampo ngadto sa Langitnong Amahan aron masayud nga ang Espiritu Santo motabang kanimo.
Sag-uloha ang Moroni 10:5.
Pagpili og usa niini nga mga kalihokan, o paghimo og imong kaugalingon:
-
Tabangi ang lain nga tawo sa pagsag-ulo sa Moroni 10:5.
-
Kuhaa ang kalihokan sa Liahona diha sa pahina 65, ug ibutang kini sa usa ka baga nga papel. Guntinga ang mga lingin ug ang duha ka mga seksyon sulod sa putol-putol nga mga linya. Ipataput ang mga lingin uban sa usa ka metal nga igtataput. Basaha ang mga pangutana diha sa ginunting nga dapit, ug pangitaa ang tubag niini sa pakisayran nga kasulatan diha sa atbang nga bintana. Makasulat ka sa imong mga tubag diha sa imong scripture journal.
-
Pagsulat diha sa imong journal mahitungod sa pipila ka mga panahon nga imong gibati ang Espiritu Santo. Ang pag-ila sa Iyang panabang sa nanglabay motabang kanimo sa pagpaminaw ngadto ug sa pagsunod sa Iyang mga pag-aghat sa umaabut.
-
Pakigsulti ngadto sa imong mga ginikanan, mga magtutudlo, o mga higala mahitungod sa panahon nga sila nagiyahan pinaagi sa Espiritu Santo.
Isulat sa inyong journal o pagdrawing og litrato mahitungod sa unsay imong nahimo. Sa unsang paagi nga ang imong nabuhat nagtabang kanimo sa pagsabut sa Moroni 10:5?
Kinsa ang motudlo kanako sa tanan nga mga butang ug motabang kanako sa paghinumdom?
Sa unsa nga paagi ang Espiritu Santo nagsulti ngari kanato?
Unsaon nako sa pag-ila sa tingog sa Espiritu Santo?
Sa unsa nga paagi kita masayud sa kamatuoran sa tanan nga mga butang?
Paghulagway pinaagi ni James Johnson