Hangtud Kita Magkita Pag-usab
Makita nga Kalisdanan
Usa ka buyog ug usa ka sakay sa bus mitabang kanako sa pagkakita nga adunay paagi sa paglingkawas sa kasamok—apan sa kasagaran kinahanglan gayud kita nga mosalig og usa ka tawo kinsa adunay abilidad nga makakita.
Diha sa bus padulong sa trabaho usa ka buntag, milingkud ako sa may bintana. Sa wala madugay nakamatikod ako og usa ka gamay nga buyog nga naninguha nga makagawas sa iyang kaugalingon. Nalaang kini tali sa duha ka mga palid sa bildo sa bintana, ug bisan giunsa pagpaninguha og maayo niini, kini wala makakita og paagi sa iyang paggawas. Nasulod sa usa ka makita nga bilanggoan, kini makakita sa kagawasan apan dili makapangita og dalan sa pag-eskapo. Tingali nahadlok, gipukpok ang mga pako niini sa kasuko ug sa walay pagpanagana gihasmag ang kaugalingon niini paingon sa bildo.
Kanunay ako nga usa ka tawo kinsa dili gusto nga makakita ni bisan kinsa o bisan unsa nga butang nga masakitan. Busa human nagtan-aw sa buyog sulod sa pipila ka panahon, gisugdan ko ang pagsulay sa pagpagawas niini nga kalisud. Apan kulang sa pagsalig ug pagsabut sa akong tinguha sa pagtabang, kini wala mopahimulos sa higayon sa panabang nga akong gitanyag. Sa tinuod, ang tanan nga gihimo niini mao ang pagpadayon sa paglabay sa iyang kaugalingon padulong sa bintana. Sa katapusan misugod ako sa pagkalagot og gamay.
Apan niana misugod ako sa paghunahuna kon sa unsa nga paagi usahay ang mga tawo makaplagan ang ilang mga kaugalingon sa sama nga mga sitwasyon. Masulod kita ngadto sa mga kalisud—ang pipila dili sa atong kaugalingon nga binuhatan. Kita usab naghimo og mga sayop, gani grabe ang uban. Sama sa buyog, mahimo nga bation nato nga binilanggo pinaagi niini nga mga kalisdanan. Sa kaalaot, bisan tuod og ang Ginoo nasayud unsa ang atong kinahanglan aron sa pag-eskapo sa atong mga pagsulay, sa kasagaran kita dili moduol Kaniya—o ngadto niadto nga Iyang gitawag sa paggiya kanato—alang sa tabang sa mga panahon sa atong panginahanglan. Wala kita mopatalinghug sa mga paghunghung sa Espiritu ug sa pagpaningkamot sa pag-atubang sa atong mga hagit sa atong kaugalingon, kay sa magsalig niadtong kinsa adunay mas lapad og panan-aw.
Isip mga Santos sa Ulahing mga Adlaw, kita sa tinuod nasayud kon unsaon pagbuntog sa kalisdanan: kita adunay mga kasulatan, pag-ampo, ug ang pakig-uban sa Espiritu Santo. Gitawag ang atong mga lider sa Ginoo ug andam ug mauyunong motabang.
Sa wala pa ako moabut sa akong hunonganan ug human ang makalolooy nga gamayng buyog nag-antus og maayo, kini nakahimo sa paggawas gkan sa kalisud. Gikan niini akong nakat-unan nga kita usab makabuntog og mga pagsulay—mag-antus og mas gamay kon kita moduol ug mosalig sa Langitnong Amahan ug sa Iyang Anak, si Jesukristo, ngadto kang kinsa ang tanan nga kalisdanan nakita.
Paghulagway pinaagi ni Jorge Cocco