Mga Santos sa Ulahing mga Adlaw nga Taga-Cambodia Pagsulong sa Bag-ong Direksyon
Bisan pa sa hilabihang mga pagsulay nga giatubang sa nangagi, ang mga Santos sa Ulahing mga Adlaw nga taga-Cambodia nakadiskobre nga ang ebanghelyo ni Jesukristo naghatag kanila og rason sa paglaum alang sa umaabut.
Sa tunga-tunga sa kaulahiang bahin sa panahon sa tingpamulak nga may ulan sa Phnom Penh, Cambodia, ang Suba sa Tonle Sap—nag-agas ngadto sa Suba sa Mekong sulod sa pipila ka bulan—nausab ang iyang natural nga pagdagayday ug nausab ang iyang pag-agas padulong ngadto sa pikas direksyon.
Kining kausaban sa direksyon nakahimo sa Tonle Sap Lake sa ulohang bahin sa suba nga mas modako lima ka beses sa iya mismong gidak-on, nagdala og mas daghang gikinahanglang sustansya ngadto sa mga isda ug mga langgam nga nagkaon didto.
Sama sa suba nga nausab ang direksyon, ang miyembro sa Cambodia mibati kon sa unsang paagi ang ebanghelyo ni Jesukristo nakatabang sa pag-usab sa direksyon sa ilang kaugalingong kinabuhi. Ang ilang mga kasingkasing karon nag-awas uban sa hingpit nga kalipay ug kalinaw nga nadala sa ebanghelyo. Naghatag kini og dako nga kalipay ug espiritwal nga pagkaon ngadto sa ilang mga kalag.
Bisan pa og nag-atubang ang nasud og tumang kalisud, nakatabang ang ebanghelyo ni Jesukristo sa daghang mga taga-Combodia nga makita ang kahayag sa bag-ong adlaw nga misanag sa kangitngit sa nangagi.
Pag-usab sa Direksyon
Panahon sa kagubot sa politika sa nasud niadtong mga 1970, daghang taga-Cambodia ang gipapahawa sa ilang mga balay ug nawad-an og mga miyembro sa pamilya.
Si Loy Bunseak, presidente sa Siem Reap Branch sa Cambodia Phnom Penh Mission, nwebe anyos lamang niadtong 1975, sa dihang siya ug ang iyang pamilya gipapahawa sa ilang balay. Sila—uban sa minilyong nga mga tawo—gipugos sa pagbuhat og lisud nga pisikal nga mga buluhaton sa lapad nga mga umahan sa nasud.
Niining panahona, si Presidente Loy nawad-an sa iyang mga ginikanan ug lima niya ka mga igsoon.
Bisan pa sa kalisud, si Presidente Loy kanunay may usa ka butang nga makatabang kaniya nga naagwanta niya ang kasakit.
“Kanunay akong adunay paglaum,” miingon siya.
Ang determinadong paglaum nga mitabang kang Presidente Loy nga maagwanta ang mga pagsulay sa pagkabata mao usab nga paglaum nga nagtabang kaniya sa kaulahian sa pag-ila sa kamatuoran sa ebanghelyo ni Jesukristo.
Tungod kay ang Cambodia usa ka Buddhist nga nasud, nagtubo si Presidente Loy nga walay kahibalo kabahin ni Jesukristo. Misugod siya sa pagkat-on sa Manluluwas sa dihang ang mga misyonaryo sa Simbahan miadto sa iyang balay ug miingon kaniya ug sa iyang pamilya nga aduna silay importante nga mensahe nga ipakigbahin.
“Wala gayud ako makadungog kabahin ni Jesukristo hangtud nga akong nahimamat ang mga misyonaryo,” miingon siya. “Gusto kong makat-on og daghan kabahin Niya.”
Human sa hilabihang seryuso nga pagtuon ug diskusyon, nabunyagan si Presidente Loy ug ang iyang pamilya niadtong 2001.
“Ang mga misyonaryo mitabang kanako sa pagkat-on kabahin sa Basahon ni Mormon, apan nakadawat ako sa akong pagpamatuod sa katinuod niini gikan sa Dios,” miingon si Presidente Loy. “Nakita nako kon sa unsang paagi nga ang mga pagtulun-an sa Basahon ni Mormon mas nakapalipay sa akong pamilya.”
Ang kasinatian ni Presidente Loy kasagaran lamang. Si Khan Sarin, presidente sa Sen Sok Branch sa Phnom Penh Cambodia North District, nalayo sa iyang pamilya samtang batan-on pa ug napugos sa pagtrabaho sa umahan.
“Mibati ako nga walay paglaum niining panahona,” miingon si Presidente Khan. “Wala ako masayud kon ako mabuhi pa.”
Sa paghinumdom, mibati si Presidente Khan nga ang Ginoo mipanalipod kaniya sa kakuyaw sa makadaghan sa iyang kinabuhi. Isip usa ka batan-on siya miapil sa kasundalohan ug gipusil sama kaduol sa mga 20 ka pye (6 m) apan wala maigo. Nakatamak usab siya og daghang mga mina sa yuta apan wala mobuto. Usa ka mina sa yuta nga iyang natamakan mibuto, apan wala siya magrabihe sa pagkasamad.
Tungod sa kakuyaw sa mga kahimtang nga nasudlan sa mga sundalo, gibuhat nila ang tanan aron maprotektahan. Ang pipila sa mga sundalo nagpapatik tungod kay nagtuo sila nga ang mga patik makatabang kanila nga magpabiling luwas.
“Sa wala pa ako mamiyembro sa Simbahan, wala akoy nahibaloan bisan unsa nga butang,” miingon si Presidente Khan. “Karon nasayran nako nga si Jesukristo—dili mao ang patik—nga miluwas kanako.”
Human nakighimamat ang asawa ni Presidente Khan, nga si Suon Sokmo, sa mga misyonaryo ug nabunyagan, nahimuot siya pag-ayo sa mga kausaban nga nahitabo kaniya. Midawat siya sa iyang pagdapit sa pagtuon og dungan sa mga kasulatan, ug sa wala madugay mihukom nga magpabunyag.
“Ang labing importante nga butang nga ako gyud nga nadawat sa akong kinabuhi mao ang pagpamatuod nga naangkon nako gikan sa pagtuon sa mga kasulatan,” miingon siya.
Si Pich Sareth, usa ka miyembro sa Phnom Penh 12th Branch sa Phnom Penh Cambodia North District, nakasinati usab og mga pagsulay sa bata pa kaayo nga edad. Siya singko anyos lamang sa dihang siya nahilayo sa iyang pamilya ug napugos sa pagtrabaho sa umahan. Usahay mangita siya og mga kasag o mga baki nga mahimo niyang kaunon aron siya mabusog.
Ang asawa ni Brother Pich, si Seng Tha, ug ang iyang pamilya gipugos usab sa pagpahawa sa ilang balay. Tungod kay siya kwatro anyos pa lamang ug gamay pa, wala siya pugsa sa pagtrabaho, sama sa ubang mga bata. Nahilayo siya sa iyang pamilya kasagaran sa adlaw ug gibantayan siya sa mga tigulang nga babaye kinsa dili makatrabaho.
Human nakighimamat sa mga misyonaryo niadtong 1995, si Brother Pich ug ang iyang asawa misugod sa pagkat-on kabahin sa gugma sa Langitnong Amahan alang kanila. “Kon ako adunay mga problema, makita nako nga ang pag-ampo nakatabang kanako sa pagsulbad niini,” miingon si Brother Pich. “Nasayud ako nga ang Langitnong Amahan nag-atiman.
Human mihukom si Brother Pich nga magpabunyag, nakaangkon usab og pagpamatuod ang iyang asawa kabahin sa ebanghelyo ug nagpabunyag.
Usa ka Dako nga Kalipay
Sukad sa ilang mga bunyag, si Brother Pich ug ang iyang pamilya nakaila sa hingpit nga kalipay nga miresulta gikan sa pagbaton og pagpamatuod kang Jesukristo. Mogahin og panahon matag adlaw ang pamilyang Pich sa pagbasa sa kasulatan. Samtang nagbuhat sila niini, ang hingpit nga kalipay sa ebanghelyo mituhop sa ilang mga kalag.
“Mibati kami nga anaa na sa sakto nga dalan karon, ug gusto namong magpabilin niining pig-ot nga dalan ug mopadayon sa paglambo,” miingon si Sister Seng. “Mapasalamaton ako matag adlaw nga mahimo namong mauban ang among mga anak niini nga dalan.”
Ang hingpit nga kalipay nga gibati ni Presidente Loy miabut sa duha ka direksyon—ngadto sa iyang katigulangan ug ingon man sa iyang mga kaliwatan. Mibisita si Presidente Loy ug ang iyang pamilya sa Templo sa Hong Kong China niadtong 2004. Wala lamang ma-sealed si Presidente Loy ngadto sa iyang asawa ug mga anak, apan ang makaluwas nga mga ordinansa sa templo nakompleto usab para sa iyang amahan, inahan, ug mga igsoon nga nangamatay.
“Gani dili nako mapasabut ang hingpit nga kalipay nga akong gibati sulod sa templo,” miingon si Presidente Loy. “Nasayud ako nga ang akong pamilya gipalig-on. Nasayud ako nga ang templo gikinahanglan aron ang mga pamilya mopuyo hangtud sa kahangturan.”
Si President Khan ug ang iyang pamilya usab adunay oportunidad nga ma-sealed isip usa ka mahangturon nga pamilya didto sa Templo sa Hong Kong. “Ang pagbati nga gibati nako sa templo usa ka butang nga wala pa gyud nako mabati sukad sa una. Lisud ang pagpadayag sa akong mga pagbati,” miingon si Presidente Khan.
Mga Sustansya alang sa Pagpakabuhi
Salamat sa pagkasangyaw sa ebanghelyo, ang mga miyembro sa Cambodia nagdawat og espirituhanong sustansya nga ilang gikinahanglan aron mabuhi. Bisan tuod ang Simbahan nagtubo sa Cambodia, naglaum ang mga miyembro nga kining pagtubo mao lamang ang sinugdanan sa usa ka dako nga pagtubo sa ebanghelyo sa ilang nasud.
Sama sa mga isda ug mga hayop nga nakadawat sa gikinahanglang mga sustansya sa dihang miawas ang Tonle Sap Lake, ang nagtubo nga gidaghanon sa mga taga-Cambodia nagdawat sa espirituhanong sustansya nga ilang gikinahanglan, salamat sa dakong mga tinguha nga anaa sa mga kasingkasing sa mga miyembro sa pagsangyaw sa ebanghelyo.
“Kon tabunan ang usa ka takuri, moawas kini inig bukal,” miingon si Presidente Khan. “Kini mao ang pagbati nga anaa sa akong kasingkasing. Kinahanglan nakong ablihan ang akong kasingkasing aron sa pagsulti sa tanan unsa ang gibati niini.”
Naglaum si Presidente Loy nga ang malungtarung epekto sa ebanghelyo nga gipangtudlo sa iyang panimalay mao nga ang iyang mga anak nga babaye mopadayon sa paggakos sa ebanghelyo ug motudlo sa ilang mga anak.
“Human ako masayud kabahin ni Jesukristo, ang tanang butang nahimong mas maayo sa akong kinabuhi ug uban sa akong pamilya,” miingon siya. “Ang pagkaanaa sa priesthood sa among panimalay nakapahiusa kanamo. Kon kami adunay problema, manglingkud kami ug hisgutan kini isip usa ka pamilya.”
Sukad nga ang gobyerno sa Cambodia mitugot og legal nga pag-ila sa Simbahan niadtong 1994, liboan ka mga taga-Cambodia ang midawat sa ebanghelyo. Ang pamilyang Pich naglaum nianang adlawa nga ang ebanghelyo masangyaw sa tanang bahin sa nasud. Miingon si Brother Pich, “Ako naglaum nga moabut ang adlaw nga adunay templo sa Cambodia.”
Miuyon si Sister Seng: “Ang Langitnong Amahan ug ang Iyang Anak, nga si Jesukristo, buhi. Ang akong paglaum alang sa umaabut mao nga ang Simbahan mopadayon sa pagtubo aron ang usa ka templo matukod.
Miila si Presidente Khan sa mga pamaagi nga ang iyang kinabuhi nausab tungod sa iyang pagkat-on sa Manluluwas. Nagtuo siya nga ang ebanghelyo ni Jesukristo mao lamang ang butang nga makaayo sa mga taga-Cambodia sa nangaging mga pagsulay.
“Human ako mahimong miyembro sa Simbahan, nawala kanako ang daghang kasakit nga gibati nako sa mga butang nga nahitabo sa nangagi. Nakadawat ako og bag-ong kahayag nga wala gayud nako sa una,” miingon siya. “Ang tanang mga butang mabati nga bag-o.”
Gilitratohan ni Chad E. Phares, gawas kon gipahibalo
Sa pikas nga pahina: Si Loy Bunseak, usa ka branch president ug tiggiya sa turista sa Siem Reap, nagpakita sa mga bisita sa karaang mga templo sa siyudad. Nakakita usab siya og oportunidad sa pagtudlo kabahin sa mga templo sa mga Santos sa Ulahing mga Adlaw pinaagi sa pagpakita og usa ka litrato sa Templo sa Hong Kong sa iyang tour van. Sa wala: Bisan nga gibati og nawad-an sa paglaum sa mga panahon sa iyang pagkabata, si Khan Sarin presidente sa Sen Sok Branch mipasakop sa Simbahan human nga ang iyang asawa, nga si Suon Sokmo, midapit kaniya sa pagtuon sa mga kasulatan uban kaniya. Ibabaw: Phnom Penh.
Ubos: Usa ka bag-ohay lamang nga nahuman nga balay-tigumanan nga mipaigo sa nagtubo nga gidaghanon sa mga miyembro sa kapital nga siyudad sa Cambodia nga mao ang Phnom Penh. Ilawom: Samtang bata pa sila, si Pich Sareth ug ang iyang asawa, si Seng Tha, nalayo sa ilang mga pamilya sulod sa dugay nga panahon. Mibati sila nga mapasalamaton nga adunay oportunidad sa paggahin og oras uban sa ilang mga bata ug padak-on sila diha sa Simbahan.
Sa luyo © Getty Images; litrato sa Templo sa Hong Kong China pinaagi ni Craig Dimond
Bisan daghan ang karaang mga arkitektura ug mga templo sa Cambodia, ang ebanghelyo nagdala og usa ka balatian sa pagbag-o ngadto sa mga kinabuhi sa mga miyembro sa Simbahan dinhi.
Sa luyo © Getty Images