Smol Misinari blong Bubuwoman Deni
Emilia Maria Gimaraes Koria i stap long Federal Distrik, Brasil.
“From taem we wan man i toktok wetem paoa blong Tabu Spirit, paoa blong Tabu Spirit i karem toktok ia i go long ol hat blong ol pikinii blong ol man” (2 Nifae 33:1).
Vito i bin stap wetem mama mo sista blong hem long hom blong Bubuwoman Deni. Bubuwoman blong Vito i bin sik mo i no save muvaot long bed blong plante wik. Hem i bin stap hemwan nomo long rum blong hem.
Vito i bin disaed se bae hem i save stap wetem Bubuwoman Deni. Evri dei, taem hem i kam hom afta skul, hem i tekem wan kopi blong Liahona i go long rum blong Bubuwoman mo ridim ol stori we oli stap long ol pej blong ol pikinini i go long hem.
Afta we hem i ridim evri kopi blong Liahona we famle blong hem i bin gat, hem i stat blong ridim Buk blong Momon mo Baebol long hem. Bubuwoman Deni i no bin wan memba blong Jos, be hem i lavem blong harem Vito i rid long hem. Hem i bin hapi blong lanem abaot gospel.
Bubuwoman i bin askem plante kwestin. Sapos Vito i no bin save ol ansa, hem i askem Praemeri tija blong hem o lukluk insaed long ol skripja. Bubuwoman i bin singaotem Vito, smol misinari blong hem.
Bubuwoman Deni i bin talem Vito se hem i bin lanem plante samting long hem. Hem i promes se bae hem i go long jos wetem Vito taem hem i kam oraet. Wanem we hem i bin lanem i mekem hem i wantem blong kam oraet gud mo stadi moa abaot gospel.
Taem Bubuwoman i oraet, hem i bin kipim promes blong hem. Hem i bin go long jos wetem Vito blong lanem moa abaot wanem we Vito i bin tijim hem. I no longtaem nating afta, Bubuwoman i kasem baptaes mo konfemesen. Vito i bin helpem hem blong lanem se gospel i tru.
Taem Vito i kam bigwan, hem i kam wan fultaem misinari long Boston Masajusets Misin. Bifo hem i go, hem i bin go long tempol—wetem Bubuwoman Deni.
Emilia Maria Gimaraes Koria i glad blong givim ol foto ia