Andastanem Baptaes

I Kam long Marisa Widison

Ol Magasin blong Jos

Huia bae i baptaesem mi?

Huia we bae i baptaesem yu, i nidim blong gat prishud—paoa blong mekem samting long nem blong God. Taem Jisas i bin wantem blong kasem baptaes, Hem i bin go long Jon Baptaes, we i bin gat prishud (luk long Matiu 3:13).

Man we i baptaesem yu bae i kasem raet long bisop o branj presiden.

Bae mi nidim blong go andanit long wota blong kasem baptaes?

Jisas i bin baptaes andanit wota, we i minim se Hem i bin go daon fulwan andanit long wota mo kam antap kwiktaem (luk long Matiu 3:16). Hemia nao olsem wanem bae yu kasem baptaes. taem yu kasem baptaes long wei ia, i rimaenem yumi se yumi livim bihaen olfala laef blong yumi mo folem wan niu laef we yumi dediketem blong givim seves long God mo ol pikinini blong Hem.

Wanem promes mi mekem taem mi kasem baptaes?

Taem yu kasem baptaes, yu mekem wan kavenan, o wan promes wetem Papa long Heven we i wok long tu wei. Yu promesem Hem se bae yu mekem sam samting, mo Hem i promes blong blesem yu. Kavenan ia oli tokbaot insaed ol prea blong sakramen we oli stap talem evri Sandei (luk long D&C 20:77–79). Yu promes:

Blong tingbaot Jisas Kraes.
Blong obei ol komanmen blong Hem.
Blong tekem long yuwan nem blong Kraes, we i minim se blong putum ol wok blong Hem fastaem long laef blong yu mo mekem wanem Hem i wantem be i no wanem we wol i wantem.

Taem yu kipim promes ia, Papa long Heven i promes se Tabu Spirit bae i stap wetem yu mo bae Hem i fogivim ol sin blong yu.

Wanem ia Tabu Spirit?

Presen we i Tabu Spirit i wan long ol impoten presen we i kam long Papa long Heven. Baptaes blong yu long wota i no fulwan kasem we ol man we oli gat Melkesedek Prishud oli givim yu wan blesing blong kasem Tabu Spirit (luk long Jon 3:5).

Tabu Spirit i wan memba blong Godhed. Hem i testifae long saed blong Papa long Heven mo Jisas Kraes mo i helpem yumi save wanem i tru. Hem i helpem yumi blong kam strong long saed blong spirit. Hem i wonem yumi long denja. Hem i helpem yumi blong lanem samting. Tabu Spirit i save helpem yumi filim lav blong God.

Taem oli konfemem yu wan memba blong Jos, Tabu Spirit i save stap wetem yu oltaem sapos yu jusum raet.

From wanem mi mas kasem eit yia stret blong kasem baptaes?

Lod i tijim se ol pikinini oli no save kasem baptaes kasem taem we oli bigwan inaf blong andastanem wanem i defren bitwin raet mo rong, mo ol skripja i talem se long eit yia nao (luk long Moronae 8:11–12; D&C 29:46–47; 68:27).